Jen Ien Kõmõnmõn Ñõn Ibij Liplip Eo

Lõñ im lõl r’ar itok jen ia? Ekijkan an kar al, aliñ im iju ko, kap elõñ menko ion lõl in walok? Baibel eo ej letok uak eo emol ilo an ba bwe Anij e ar kõmõnmõni. Inem buk in ar e jino kin bwebwenato ko jen Baibel eo im rej kwalok kin ien kõmõnmõn.

Jej katak bwe men ko moktata me Anij e ar kõmõnmõni kar jitõb ro einwõt e. Rein r’ar enjel ro. Ak Anij e ar kõmõnmõn lõl in ñõn armij ro einwõt kij. Inem Anij e ar kõmõnmõn man im kõra eo im naetair Adam im Iv im dror ir ilo juõn jikin kallip e aibujuij. Ak r’ar jab bokake Anij im e ar jab tellokeir bwe ren mour manlok wõt.

Jen ien kõmõnmõn Adam mantak ñõn ien ibij liplip eo, 1,656 yiõ ko r’ar motlok. Iomin ien in elõñ armij ro re nana r’ar mour. Ilo lõñ, jitõb ro je ban lo ir kin mejer r’ar ber, Setan im enjel ro an re nana. Ion lõl, kar Kein im elõñ bar armij ro re nana, kap jet eman ro re kanuij in driibin im kajur. Ak e ar bareinwõt wor armij ro remõn ion lõl—Ebel, Inok im Noa. Ilo Mõttõn in kein Ka JUÕN je naj konono kin aolepen armij rein im men ko r’ar walok.