KATAK 7
Juõn Eman E Beran
KE oran armij ro e ar jino orlok ion lõl, elõñ wõt iair r’ar kõmõni menko renana einwõt Kein. Ak juõn eman e ar oktak. Etan lein ej I’nok. I’nok e ar juõn eman e beran. Armij ro i bellakin r’ar kõmõni menko re lukkun nana, ak I’nok e ar jerbal wõt ñõn Anij.
Kwo jela ke ta unin armij ro ilo ien eo r’ar kõmõn elõñ menko re nana? Eokwe, lemnõk, Wõn eo e ar kõmõn bwe Adam im Iv ren jab bokake Anij im mõña leen wijki eo me Anij e ar ba ren jab mõña jen e? Aet, kar juõn enjel enana. Baibel eo ej naetan Setan. Im ej kate bwe aolep ren oktak im nana.
Juõn ran Jeova Anij e ar jiroñ I’nok bwe en kõjellaik armij ro kin juõn men me r’ar jab kõnan roñ. Kar eñin: “Juõn ran Anij enaj kokkure aolep armij ro re nana.” Bwelen armij ro r’ar lukkun illu ke r’ar roñ nan in. Bwelen r’ar kajeoñ in mõn I’nok. Inem I’nok e ar aikwij in lukkun beran bwe en kennanek armij ro kin men eo Anij e ar bojak in kõmõne.
Anij e ar jab kotlok bwe en to an I’nok mour i bwiljin armij ro renana. I’nok e ar mour iomin 365 yiõ, juõn ien e karu. Etke jej ba e karu 365 yiõ? Kinke armij ro ilo ran ko r’ar kajurlok jen kiõ im e ar aitoklok air mour. Lale mõk, nejin I’nok, etan Me-tu’se-la, e ar mour iomin 969 yiõ!
Eokwe, elikin an kar I’nok mij, armij ro r’ar nanalok wõt. Baibel eo ej ba bwe “lemnõk otemjej i buruiir renana wõt aolepen ien,” im bwe “e obrok lõl kin koaroñ.”
Kwo jela ke juõn ian un ko unin an kar lap nana ion lõl ilo ran ko? Ej kinke Setan e ar lo juõn wãwen ekãl bwe en karel armij ro ñõn air kõmõni menko renana. Jenaj katak kin men in kiõ.
Jenesis 5:21-24, 27; 6:5; Hibru 11:5; Jud 14, 15.