Anij E Jino Kõmõn Men Ko

AOLEPEN menko remõn iber rej itok jen Anij. E ar kõmõnmõn al bwe en letok maram ñõn kij ilo ran, im aliñ im iju ko bwe en wor maram in boñ. Im Anij e ar kõmõnmõn lõl in bwe jen jokwe ion.

Ak al, aliñ, iju ko im lõl in kar jab menko moktata im Anij e ar kõmõnmõni. Kwo jela ke ta eo e ar kõmõn moktata? Mokta Anij e ar kõmõnmõn ro einwõt e. Je ban lo rein, einwõt je ban lo Anij. Baibel ej naetan rein enjel ro. Anij e ar kõmõnmõn enjel ro bwe ren jokwe iben i lõñ.

Enjel eo moktata me Anij e ar kõmõnmõn kar juõn eo ejej uan. E ar manjien Anij, im e ar jerbal iben Jemen. E ar jibañ Anij kõmõnmõn menko otemjej jet. E ar jibañ Anij kõmõnmõn al, aliñ, iju ko im bareinwt lõl in ar.

Kar ewi wãwen lõl in ien eo? Ilo jinoin ejelok en e ar maroñ jokwe ion lõl. Ejelok kar jabrewõt men ijellokin juõn lojit in dren eo e ar kalibubu aolepen ene. Ak Anij e ar kõnan bwe armij ren jokwe ion lõl. Inem e ar jino kaboj menko ñõn kij. Ta eo e ar kõmõne?

Eokwe, mokta lõl e ar aikwij maram. Inem Anij e ar kõmõn maram eo jen al bwe en rome lõl. E ar karõke bwe en wor ien boñ im ien ran jimor. Tokelik Anij e ar kõmõn bwe ene emera en walok jen loan dren in lojit eo.

Ilo jinoin e ar ejelok jabrewõt men ion eneo. E ar einwõt pija eo kwoj lo ijin. E ar ejelok wut ko ak wijki ko ak men in mour ko. Ejañin kar wor jabrewõt iik i lojit. E ar lõñ wot menko Anij e ar aikwij in kõmõni bwe lõl en lukkun juõn jikin emõn bwe men in mour ko im armij ro ren jokwe ion.