Wãwen Jisõs Ej Katakin

JUÕN ran Jisõs ej jiroñ juõn eman bwe en yokwe dri turin. Leo ej kajitõk iben Jisõs: ‘Wõn dri turiõ?’ Eokwe, Jisõs e jela lemnõk ko an lein. Leo ej lemnõk bwe ro wõt im rej mõttõn ailiñ eo an im kabuñ eo an rej dri turin. Inem jen lale ta eo Jisõs ej ba ñõn e.

Jet ien Jisõs ej katakin ikijen an kwalok juõn bwebwenato. Eñin men eo ej kõmõne kiõ. Ej bwebwenato kin juõn dri Ju im juõn dri Sa-mer’i-a. Emwij ar katak bwe enañin aolep dri Ju ro rej drike ro dri Sa-mer’i-a. Eokwe, eñin bwebwenato eo an Jisõs:

Juõn ran, juõn dri Ju e ar wonlõltak ilo juõn ial jen tol ko ñõn Jer’i-ko. Ak dri koaroñ ro r’ar kelok ion. R’ar bõk mõnni eo an im mõn e ñõn ñe e iten mij.

Tokelik, juõn pris in dri Ju e ar itok ilo ial eo. E ar lo leo emwij mõn e. Ta eo kwoj lemnõk e ar kõmõne? Eokwe, e ar baj ilok ñõn tu-rãjit in ial eo im wonmanlok wõt ilo ial eo. Inem bar juõn armij e kijejeto kin kabuñ e ar itok. E ar juõn dri Livai. E ar bwijrak ke? Jaab, e ar jab bar bwijrak in jibañ armij eo emwij mõn e. Kwo maroñ lo an pris eo etal wõt ilo ial en lok.

Ak lale mõk lein ijin iben armij eo emwij mõn e. Ej juõn dri Sa-mer’i-a. Im ej jibañ dri Ju eo. Ej kabit kinej ko kinjen kin uno. Tokelik ej bõklok dri Ju eo ñõn juõn jikin eo me e maroñ kakije im kejmour e ie.

Elikin an kajemlok bwebwenato eo an, Jisõs ej ba ñõn leo me e ar kajitõk iben: ‘Ilo am lemnõk, wõn eo ian lõmarein jilu e ar jerbal einwõt dri turin armij eo me r’ar mõn e? Kar pris eo ke, dri Livai eo ke, ak dri Sa-mer’i-a eo ke?’

Leo ej uak im ba: ‘Dri Sa-mer’i-a eo. E ar kwalok joij ñõn armij eo me r’ar mõn e.’

Jisõs ej ba: ‘Ejimwe am uak. Inem kwon ilok im jerbal ñõn ro jet einwõt e.’

Emõn ke ibõm wãwen an Jisõs katakin? E kanuij lõñ men ko elap tokjeir im je maroñ katak elañe jej roñjake menko me Jisõs ej ba ilo Baibel eo, jejjab ke?