Jisõs Ej Kaejmour Ro Dri Nañinmij

KE JISÕS ej itoitak ilo eneo, ej kemour ro dri nañinmij. Enan in men in kabwilõñlõñ kein rej konono kaki ilo jikin kwelok ko relap im ko redrik. Kin men in armij ro rej bõktok ñõn iben ro re kirro im bilo im jaroñroñ, im elõñ bar ro jet re nañinmij. Im Jisõs ej kemour ir otemjej.

Emotlok jilu dre yiõ kiõ jen ke Jon e ar baptaisi Jisõs. Im Jisõs ej jiroñ dri jilik ro an bwe mõttõn jirik e naj ilok ñõn Jerusalem, ijo re naj mõn e na ie, inem e naj jerkakbiji jen ro re mij. Ak ilo ien in, Jisõs ej kemour wõt ro dri nañinmij.

Juõn ran, Jisõs ej katakin ilo ran in Sabat. Sabat eo ej juõn ran in kakije ñõn dri Ju ro. Kõra eo kwoj lo e ijin e ar lukkun nañinmij. E ar mollok iomin 18 yiõ, im e ar jab maroñ jutak jimwe. Inem Jisõs e ar likit pein ion, im e ar jino jutak. E mour!

Men in ej lukkun kaillu dri tel ro an kabuñ ko. ‘Eor jiljino ran ko me jen kar jerbal ie,’ juõn iair ej lamij ñõn jar in armij ro. ‘Ran kein ej ran in ami itok in kemour, ejjab ilo ran in Sabat!’

Ak Jisõs ej uak: ‘Kom armij nana. Jabrewõt iami e naj kar kotlok kiru ass eo an im tellok e im kairak e ilo ran in Sabat. Inem etke kõra in, eo im e ar nañinmij iomin 18 yiõ, en jab mour ilo ran in Sabat?’ Uak eo an Jisõs ej kajook lõmarein re nana.

Tokelik, Jisõs im dri jilik ro an rej ilok ñõn Jerusalem. Ke rej ber ilikin wõt jikin kwelok in Jer’i-ko, ruo dri oor re bilo rej roñ bwe Jisõs ej itok. Inem rej lamij im ba: ‘Jisõs, kwon jibañ kimro!’

Jisõs ej kirtok lõmaro re bilo, im kajitõk: ‘Ta eo komro kõnan bwe in kõmõn non kom?’ Rej ba: ‘Iroij, kwon kõmõn bwe mejem ren bellok.’ Jisõs ej uñir mejeir, im e mõkõj an mejeir lolokjen! Kwo jela ke ta unin an Jisõs kõmõn aolepen men in kabwilõñlõñ kein remõn? Kinke ej yokwe armij ro im kõnan bwe ren tõmak e. Inem je maroñ liki bwe ilo ien eo ej iroij einwõt Kiñ, ejelok juõn ion lõl enaj bar nañinmij.