Ilo Ial Eo Ñõn Damaskõs

KWO jela ke wõn in ej babu ilõl? Ej Saul. Kememij, e eo e ar lali kobe ko an lõmaro me r’ar kare Stipen kin dreka. Lale mõk maram en e kajur! Ta in e walok?

Elikin an mij Stipen, Saul ej tel ro jet bwe ren bukõt ro dri kaloran Jisõs im kokkure ir. Ej ilok jen im ñõn im im iberlok ir inabwij im jolok ir na ilo prisõn. Elõñ ian dri kalor ro rej ko ñõn jikin kwelok ko jet im kwalok “nuj emõn” eo ie. Ak Saul ej ilok ñõn jikin kwelok ko jet bwe en jibwe ro dri kaloran Jisõs. Kiõ ej ilok ilo ial eo an ñõn Damaskõs. Ak ilo ial eo, men in kabwilõñlõñ in e walok:

Ilo jidrimkij, juõn maram jen lõñ ejaromrom ibellakin Saul. Ej buñ lõllok ñõn lõl, einwõt ar lo ijin. Inem juõn ainiken ej ba: ‘Saul, Saul! Etke kwoj kokkure iõ?’ Lõmaro mõttõn Saul rej lo maram eo im roñ ainiken eo, ak rejjab melele ta eo ej ba.

‘Iroij, wõn kwe?’ Saul ej kajitõk.

‘Ña Jisõs, eo kwoj kokkure,’ ainiken eo ej ba. Jisõs ej ba nan in kinke ñe Saul ej kokkure ro dri kaloran Jisõs, Jisõs ej watok men in einwõt rej kokkure e mõke.

Kiõ Saul ej kajitõk: ‘Iroij, ta eo in kõmõne kiõ?’

‘Kwon jerkak im ilok ñõn Damaskõs,’ Jisõs ej ba. ‘Ijen naj jiroñ yuk men eo kwon kõmõne.’ Ke Saul ej jerkak im kabellok mejen, ejjab maroñ lo jabrewõt. E bilo! Kin men in, lõmaro mõttõn rej jibwe pein im tellok e ñõn Damaskõs.

Kiõ Jisõs ej kennan ñõn juõn ian ro dri kaloran ilo Damaskõs, im ba: ‘An-e-nai’õs, kwon jerkak. Kwon ilok ñõn ial eo etan Jimwe. Ilo mweo imõn Judas kwon kajitõk kin juõn eman etan Saul. Emwij aõ kãlet e bwe en juõn dri korijera ejej uan.’

An-e-nai’õs ej bokake. Ke ej iion Saul, ej likit pein ion im ba: ‘Iroij eo e ar jilkintok iõ bwe kwon bar lolokjen im obrok kin jitõb kwojarjar.’ Im e mõkaj an wutlok jen mejen Saul juõn men einwõt kilin iik, im ej bar lolokjen.

Anij ej kajerbal Saul ilo juõn wãwen elap bwe en kwalok nan ñõn armij in elõñ ailiñ ko. Re jino añiñin e kin ãt in, dri jilik Paul, eo im e naj laplok ar katak kake tokelik. Ak mokta, jen lale ta eo Anij ej jilkinlok Piter bwe en kõmõne.