Rej Kare Stipen Kin Dreka

LEO ej bukwelõlõ ijin ej Stipen. Ej juõn dri kaloran Jisõs e tiljek. Ak lale mõk men eo ej walok ñõn e kiõ! Lõmarein rej kare kin dreka ko relap. Ta unin air kijirate Stipen ñõn joñan eo me rej kõmõne men nana in ñõn e? Jen lale.

Anij e ar jibañ Stipen bwe en kõmõn men in kabwilõñlõñ ko remõn. Lõmarein rejjab kõnan men in, inem rej akwail iben kin an katakin armij ro mol eo. Ak Anij ej lelok elap meletlet ñõn Stipen, im Stipen ej kwalok bwe lõmarein r’ar katakin men ko rejjab mol. Men in ej kalaplok air illu. Kin men in rej jibwe e, im ãñintok armij ro bwe ren riõp nae e.

Pris eo elap ej kajitõk iben Stipen: ‘Emol ke men kein armij ro rej ba?’ Stipen ej uak ikijen an kwalok juõn bwebwenato emõn jen Baibel eo. Ilo jemlokin bwebwenato eo, ej kwalok kin wãwen armij ro re nana r’ar drike dri kanan ro an Jeova etto. Inem ej ba: ‘Komij einwõt armij rõn. Kom ar mõn Jisõs, dri korijeran Anij, im kom ar jab bokake kien ko an Anij.’

Men in ej lukkun kaillu dri tel ro an kabuñ! Rej kijdrekin ñiir ilo air illu. Ak ilo ien in Stipen ej reiliñlok im ba: ‘Lo! Ij lo Jisõs ej jutak i anbijmaroñõn Anij i lõñ.’ Ke ej ba nan in, lõmarein rej binej lojilñiir kin peir im ettõrlok ñõn iben Stipen. Rej jibwe e im ibere lok ñõn nabwijin jikin kwelok eo.

Ijin rej wutik kobe ko air im lilok ñõn likao eo etan Saul bwe en lali. Kwoj lo ke Saul? Inem jet ian lõmaro re jino kare Stipen kin dreka. Stipen ej bukwelõlõ, einwõt am loe, im ej jar ñõn Anij im ba: ‘Jeova, kwon jab kajeik ir kin men nana in rej kõmõne.’ E jela bwe dri tel ro an kabuñ r’ar mone jet iair. Elikin an ba nan in, e mij Stipen.

Ñe armij rej kõmõne juõn men e nana ñõn yuk, kwoj kajeoñ ke in bar kõmõn juõn men e nana ñõn ir, ak kajitõk iben Anij bwe en kokkure ir ke? Stipen im Jisõs r’ar jab kõmõn eindrein. R’ar joij wõt ñõn ro me r’ar jab joij ñõn ir. Jen kajeoñ in anõk joñõk eo airro.