Lõta eo jãn Kumi eo Ej Lale Aolep Eklejia ko an Ri Kõnnaan ro an Jeova

Yokwe Kom̦ ro me Rej Yokwe Jeova:

Jijej ear ba: “Kom̦ naaj jel̦ã m̦ool eo, im m̦ool eo enaaj kanemkwoj kom̦.” (Jon 8:32, UBS) Elukkuun l̦ap an em̦m̦an naan kein! Jemaroñ jel̦ã kõn katak ko rem̦ool, meñe jej pãd im mour ilo “raan ko ãliktata” me el̦ap an ajeeded katak ko reriab. (2 Timote 3:1) Kwõj ke keememej iien eo m̦oktata im kwaar kile bwe em̦ool katak ko jãn Baibõl̦ eo? Joñan in el̦ap am̦ kar m̦õn̦õn̦õ!

Eaorõk bwe jen jel̦ã kõn katak ko rem̦ool jãn Baibõl̦ eo im jen niknik ilo ad kwal̦o̦ki ñan ro jet. Bõtab, ebar eaorõk bwe jen mour ekkar ñan katak ko rem̦ool im jej katak kaki. Bwe jen maroñ kõm̦m̦ane men in, jej aikuj pãd wõt ilo yokwe eo an Anij. Ta eo jej aikuj kõm̦m̦ane bwe jen maroñ pãd wõt ilo yokwe eo an Anij? Jijej ear uwaake kajjitõk in ilo kar boñõn eo ãliktata in an kar mour ioon lal̦. Ear ba ñan rũkal̦oor ro an retiljek: “El̦aññe kom̦ij pokake kien ko aõ, kom̦ naaj pãd wõt ilo yokwe in aõ, ãinwõt aõ kar pokake kien ko an Jema, im ij pãd wõt ilo yokwe eo An.”​—Jon 15:10, UBS.

Jijej ear maroñ pãd wõt ilo yokwe eo an Anij kõnke ear pokaki kien ko an Jemen. Eñin men eo jej aikuj bar kõm̦m̦ane rainin. Bwe jen maroñ pãd wõt ilo yokwe eo an Anij, jej aikuj jerbali katak ko rem̦ool ilo aolep men ko jej kõm̦m̦ani raan otemjej. Ilo ejja boñõn eo wõt, Jijej ear ba: “Kiiõ kom̦ jel̦ã men kein. Enaaj l̦ap ami m̦õn̦õn̦õ el̦aññe kom̦ naaj kõm̦m̦ani.”​—Jon 13:17, UBS.

Kõmij kõjatdikdik bwe bok in enaaj jipañ eok bwe kwõn wõnm̦aanl̦o̦k wõt im jerbali katak ko rem̦ool ilo mour eo am̦. Im kõmij bar kõjatdikdik bwe bok in enaaj jipañ eok bwe kwõn “pãd wõt ilo yokwe eo an Anij” ilo am̦ kõttare “mour indeeo.”​—Jud 21, UBS.