Daniel Ej Pãd ilo Ro̦ñin L̦aiõn

Bar juon kiiñ ear jino irooj ioon Babil̦on. Etan kiiñ in ej Dariõs, RiMidia eo. Kiiñ in ear kile bwe Daniel kar juon armej ej make wõt em̦m̦an. Ear kããlõte bwe en lale im tõl enañin aolep em̦m̦aan ro reutiej ilo ãneo. Em̦m̦aan rein rar ebbanbane Daniel im rar kõn̦aan bwe en jako. Rar jel̦ã bwe Daniel ekõn jar ñan Jeova jilu kõttan kajjojo raan. Kõn men in, rar ba ñan Dariõs: ‘O kiiñ, ej aikuj wõr juon kien me ej kaalikkar bwe aolep rej aikuj jar ñan kwe wõt. Jabdewõt eo ejjab pokake kien in, naaj aikuj jol̦o̦ke ñan lowaan ro̦ñin l̦aiõn en̦.’ Ear em̦m̦an men in ippãn kiiñ eo, im kõn men in ear jaini kien in.

Ke Daniel ear roñ kõn kien in ekããl, ear etal ñan m̦weo im̦õn. Innem ear jubukwe im jal̦l̦o̦k ñan wũntõ eo epel̦l̦o̦k, im jar ñan Jeova. Em̦m̦aan ro rar ebbanbane rar loe an jar, im rar ettõrl̦o̦k ñan ippãn Dariõs im ba: ‘Daniel ejjab pokake eok. Ej jar ñan Anij en̦ an jilu kõttan kajjojo raan.’ Ak Daniel ear utiej ippãn Dariõs im ear jab kõn̦aan bwe en mej. Ilo aolepen raan eo, ear pukot kilen an maroñ lo̦mo̦o̦rene Daniel. Ak ear ejjel̦o̦k an kiiñ eo maroñ ñan ukote kien eo em̦õj an kar jaini. Kõn men in, ear aikuj ba ñan rijerbal ro an bwe ren jol̦o̦ke Daniel ñan lowaan ro̦ñ eo me elõñ l̦aiõn ko rem̦õrõ ie.

Ilo boñõn eo, Dariõs ear lukkuun inepata kõn Daniel. Joñan, ear jab maroñ kiki. Ilo jibboñõn raan eo tok juon, ear m̦õkaj im ettõrl̦o̦k ñan ro̦ñ eo im ikkũr lal̦l̦o̦k ñan Daniel im ba: ‘Anij eo am̦ ear ke lo̦mo̦o̦ren eok?’

Innem Dariõs ear roñ ainikien an Daniel ikkũrl̦o̦k ñane im ba: ‘Enjel̦ eo an Jeova ear kiil lo̦ñiin l̦aiõn kein. Rar jab kij ña ñan jidik.’ Dariõs ear lukkuun m̦õn̦õn̦õ! Ear ba ñan rijerbal ro bwe ren kotak lõñtak Daniel jãn lowaan ro̦ñ eo. Im rar lo an ejjel̦o̦k jidik kurar in kinej ilo ãnbwinnin. Innem kiiñ eo ear ba: ‘Bõk l̦õm̦aro rar kinaake Daniel im jol̦o̦k er ñan lowaan ro̦ñ en̦.’ Ke rar jol̦o̦k er ñan lowaan ro̦ñ eo, l̦aiõn ko rar kajju kiji er im kañ er.

Innem Dariõs ear kõm̦m̦ane juon kien im jilkinl̦o̦k ñan armej ro. Ear jiroñ er im ba: ‘Aolep rej aikuj mijak Anij eo an Daniel. Ear lo̦mo̦o̦ren Daniel jãn l̦aiõn kan̦.’

Kwõj ke jar ñan Jeova kajjojo raan ãinwõt kar Daniel?