Kõrã Eo Iturin Aebõj Lal̦ Eo

Ãlikin kar Kwõjkwõjin Kijoone eo, Jesus im rũkal̦oor ro an rar etal ñan Sameria ke rej jepl̦aakl̦o̦k ñan Galili. Im ke rar epaakel̦o̦k bukwõn eo etan Saikar, Jesus ear bõjrak ilo ijo rej n̦aetan aebõj lal̦ eo an Jekob. Ke ej kakkije iturin aebõj lal̦ eo, rũkal̦oor ro an rar etal im kappoktok kijeer m̦õñã.

Juon kõrã ear itok im itõk dãn ilo aebõj lal̦ eo. Im Jesus ear ba ñan kõrã eo: “Jouj im letok lim̦õ aebõj.” Im kõrã eo ear ba: ‘Etke kwõj kõnnaantok ñan ña? Ña juon kõrã in Sameria. Emo an RiJu kõnnaan ippãn RiSameria.’ Ak Jesus ear ba ñane: ‘El̦aññe kwaar jel̦ã wõn ña, kwõnaaj kar kajjitõk lim̦õm̦ dãn ippa im inaaj kar lewaj dãnnin mour.’ Kõrã eo ear kajjitõk, ‘Ta mel̦el̦ein am̦ ba men in ke ejjel̦o̦k am̦ kein itõk dãn?’ Jesus ear ba ñane: ‘Jabdewõt eo inaaj lel̦o̦k lim̦en dãn, ejãmin bar maro.’ Kõrã eo ear ba: “Irooj, kwõn letok dãn in ñan eõ.”

Innem Jesus ear ba ñane: ‘Etal im ãñintok l̦eo pãleem̦ ñan aebõj lal̦ in.’ Kõrã eo ear ba: ‘Ejjel̦o̦k pãleõ.’ Im Jesus ear ba: ‘Kwõj kwal̦o̦k m̦ool. L̦alem kõttan am̦ m̦are, im kiiõ kwõj jokwe ippãn juon em̦m̦aan ak kwõjjañin m̦areiki.’ Im kõrã eo ear ba: ‘Ij kab kile kiiõ bwe kwõj juon rũkanaan. Armej ro aõ rej tõmak bwe kõm maroñ kabuñ ñan Anij ioon tol̦ in, ak RiJu ro rej ba bwe jej aikuj kabuñ ñan Anij ilo Jerusalem wõt. Ij tõmak bwe ñe Messaia eo enaaj itok, enaaj katakin kõm kõn kilen ad kabuñ ñan Anij.’ Innem Jesus ear ba juon men me ejjañin kar jiroñ jabdewõt kake. Ear ba: ‘Ña Messaia eo.’

Kõrã eo ear kaiurl̦o̦k ñan bukwõn eo an im karoñ RiSameria ro. Ear ba: ‘Em̦õj aõ lo Messaia eo. Ejel̦ã aolep men kõn ña. Itok im lale!’ Kõn men in, rar l̦oorel̦o̦k ñan aebõj lal̦ eo im roñjake ke Jesus ej katakin er.

RiSameria ro rar kũr Jesus bwe en tõn jokwe ippãer ilo bukwõn eo aer. Ium̦win ruo raan, ear katakin armej ro im elõñ iaaer rar likũt aer tõmak ilo e. Rein rar ba ñan kõrã in Sameria eo: ‘Ãlikin ammim kar roñjake katak ko an Jesus, kõm kiiõ jel̦ã bwe e eo ej lukkuun rũlo̦mo̦o̦r eo ad.’