Jesus Ej Kwal̦o̦k kõn Aelõñ Eo

Ãlikin wõt an kar Jesus peptaij, ear jino an kwal̦o̦k naan im ba: ‘Aelõñ eo an Anij epaak.’ Rũkal̦oor ro an rar l̦oorl̦o̦k e ijoko ear ilo̦k ie l̦o̦k ilo Galili im Judia. Ke Jesus ear jepl̦aak ñan bukwõn eo an ilo Nazeret, ear etal ñan im̦õn kabuñ eo. Ear kõpel̦l̦o̦k bok lemlem eo an Aiseia im riit ilo juon ainikien el̦l̦aaj im ba: ‘Jeova eo ear letok jetõb kwõjarjar eo an bwe in maroñ kwal̦o̦k kõn nuuj eo em̦m̦an.’ Ta mel̦el̦ein men in? Mel̦el̦ein bwe un eo el̦aptata unin an kar Jeova lel̦o̦k jetõb kwõjarjar eo an ñan Jesus ej bwe en kwal̦o̦k kõn nuuj eo em̦m̦an, ejjab bwe en kõm̦m̦ani menin kabwilõñlõñ ko wõt, men eo me armej ro rar kõn̦aan loe an kõm̦m̦ane. Innem ear jiroñ ro rar roñjake im ba: ‘Rainin em̦õj an jejjet kanaan eo.’

Ãlikin, Jesus ear etal ñan Lom̦al̦o in Galili, ijo ear iioone emãn rieo̦ñõd ro me renaaj tokãlik oktak im erom rũkal̦ooran. Ear kũr er im ba: ‘Kom̦win itok ippa im inaaj kõm̦m̦an bwe kom̦win rieo̦ñõd armej.’ Rein emãn kar Piter, Andru, Jemes, im Jon. Rar m̦õkaj im ilo̦k jãn peejnej in eo̦ñõd eo aer im l̦oor e. Rar etal ñan aolep jikin ko ilo Galili im kwal̦o̦k naan kõn Aelõñ eo an Jeova. Rar kwal̦o̦k ilo im̦õn kabuñ ko an RiJu, jikin wia ko, im ilo ial̦ ko. Elõñ armej rar l̦oorl̦o̦k er ñan ijoko rar etal ie l̦o̦k. Ennaan ko kõn Jesus rar m̦õkaj im tõpar aolep jikin, ekoba ijoko rettol̦o̦k ãinwõt Siria.

Tokãlik Jesus ear lel̦o̦k kajoor ñan jet iaan rũkal̦oor ro an bwe ren kõmour armej im kadiwõjl̦o̦k jetõb ko rettoon jãn ippãer. Jet rar etal ippãnl̦o̦k ke ear kwal̦o̦k naan jãn jikin ñan jikin. Elõñ kõrã ro retiljek ãinwõt Meri Magdalini, Joanna im Susanna im bar ro jet rar jipañ im lale aikuj ko an Jesus im rũkal̦oor ro an.

Ãlikin an kar Jesus katakin im kammineneik rũkal̦oor ro an, ear jilkinl̦o̦k er bwe ren kwal̦o̦k naan. Ke rar itoitak ilo aolepen Galili, elõñ bar armej rar oktak im erom rũkal̦ooran Jesus im peptaij. Joñan an kar lõñ rar kõn̦aan erom rũkal̦oor, Jesus ear waanjoñak kake er ñan juon jikin kallib epojak ñan m̦adm̦õd. Ear ba: ‘Kom̦win jar ñan Jeova im kajjitõk bwe en jilkintok elõñl̦o̦k rijerbal ñan jikin m̦adm̦õd eo an.’ Tokãlik ear kããlõt 70 iaan rũkal̦oor ro an im karuo l̦o̦k iaaer im ba bwe ren ilo̦k im kwal̦o̦k naan iaolepen Judia. Rar katakin jabdewõt armej kõn Aelõñ eo. Ke rũkal̦oor ro rar jepl̦aaktok, rar kijooror in kõnnaanek Jesus kõn ta ko rar wal̦o̦k. Ejjel̦o̦k jabdewõt men Setan Tepil̦ emaroñ kõm̦m̦ane ñan kabõjrak jerbalin kwal̦o̦k naan.

Jesus ear jipañ rũkal̦oor ro an bwe ren kab wõnm̦aanl̦o̦k wõt im kõm̦m̦ane jerbal in eaorõk ãlikin an naaj jepl̦aak ñan lañ. Ear ba ñan er: ‘Kom̦win ilo̦k, im kwal̦o̦k kõn nuuj eo em̦m̦an ñan riaelõñ ko otemjej. Katakin er kõn Naanin Anij im peptaiji er.’