Jesus Ej Jepl̦aak ñan Lañ

Jesus ear iioone rũkal̦oor ro an ilo Galili. Im ear lel̦o̦k ñan er juon kien elukkuun aorõk. Ear ba: ‘Kom̦win ilo̦k im kõm̦m̦an rũkal̦oor jãn aelõñ ko otemjej. Kom̦win katakin er kõn men ko iar katakin kom̦, im peptaiji er.’ Innem ear kallim̦ur im ba: ‘Keememej bwe aolep iien inaaj pãd ippemi.’

Ãlikin an kar Jesus jerkak jãn mej, ear pãd ijin ioon lal̦ ium̦win 40 raan. Im ium̦win raan ko 40, ear wal̦o̦kl̦o̦k ñan elõñ bukwi rũkal̦oor ro an ilo Galili im ilo Jerusalem. Ear katakin er kõn katak ko raorõk im ear kõm̦m̦an elõñ menin bwilõñ ko. Innem kar iien eo ãliktata Jesus ear wal̦o̦k ñan rijjilõk ro an ej ilo Tol̦ Olivet.

Ilo raan ko m̦oktal̦o̦k, Jesus ear ba ñan rijjilõk ro an ilo kar Jerusalem: ‘Kom̦win jab em̦m̦akũt jãn Jerusalem. Kom̦win kõttare wõt men eo Jema ear kallim̦ur kake.’ Ak rar jab mel̦el̦e ta eo ej ba. Kõn men in, ilo iien in ãliktata ej wal̦o̦k ñan er, rar kajjitõk ippãn: ‘Irooj, kwõj ke Kiiñ eo an aelõñin Israel kiiõ?’ Jesus euwaak im ba: ‘Ejjañin jejjet iien eo Jeova ear karõke bwe in Kiiñ. Ak m̦õttan jidik kom̦ naaj bõk kajoor jãn jetõb kwõjarjar eo an Anij, im kom̦ naaj aõ rikõnnaan. Kom̦win ilo̦k im kwal̦o̦k naan ilo Jerusalem, Judia, Sameria, im ilo jikin ko rettol̦o̦ktata ioon lal̦.’

Innem Jesus ear jino wanlõñl̦o̦k ñan lañ im juon kõdo̦ ear pineje ke ej ilo̦k. Rũkal̦oor ro an rej reilõñl̦o̦k wõt ak rejjab loe.

Innem rar ilo̦k jãn Tol̦ Olivet im etal ñan Jerusalem. Elõñ alen aer kar koba ippãn doon im jar ilo juon em̦ ilo ruum̦ eo itulõñ. Rar kõttar an Jesus kaalikkar ñan er ta ko ren kõm̦m̦ani ilo jerbalin kwal̦o̦k naan im ilo jerbal ko jet an eklejia.