Naanin Ijjino ko ñan Jebta 14

Kũrjin ro jinoin rar kajeedede nuuj eo em̦m̦an kõn Aelõñ eo ñan ijoko rettol̦o̦ktata ioon lal̦. Jesus ear kwal̦o̦k ñan er jikin ko ren kwal̦o̦k naan ie, im ilo kabwilõñlõñ ear kõm̦m̦an bwe ren jel̦ã kajin ko an armej ro bwe ren maroñ katakin er. Jeova ear kõkajoor im kaperan er bwe ren kate wõt er meñe elõñ rar lukkuun jum̦aik er.

Jesus ear kwal̦o̦k ñan rijjilõk Jon juon pijen me ej kwal̦o̦k kõn aiboojoj eo an Jeova. Im ilo bar juon pijen, Jon ear loe an Aelõñ ak kien eo ilañ anjo̦ ioon Setan im jol̦o̦ke jãn an irooj. Bareinwõt, Jon ear loe an Jesus irooj ãinwõt juon Kiiñ ippãn 144,000 ro me rej irooj ippãn. Ejjab men in wõt, ak ear bar loe an aolepen lal̦ in erom juon pedetaij im an aolep kabuñ ñan Jeova ilo aenõm̦m̦an im bõrokuk.