Jetõb Kwõjarjar An Anij ej Itok Ioon Rũkal̦oor Ro

Joñoul raan jãn iien eo Jesus ear jepl̦aak ñan lañ, jetõb kwõjarjar eo an Anij ear itok ioon rũkal̦oor ro. Eñin kar raanin Pentekost eo ilo iiõ eo 33, im armej ro jãn elõñ jikin rar itok ñan Jerusalem im kwõjkwõj ippãn doon. Ear wõr enañin 120 rũkal̦oor ro an Jesus rar koba ippãn doon ilo juon em̦ ilo ruum̦ eo itulõñ. Innem ilo jidimkij, ear wal̦o̦k juon men ekabwilõñlõñ. Ioon bõran kajjojo rũkal̦oor ro, ear wal̦o̦k juon men ãinwõt kijeek, im aolepeer rar jino kõnono kajin ko reoktak jãn doon. Innem juon ainikien el̦ap ãinwõt ainikien kõto el̦ap ear koobrak aolepen m̦weo.

Rilotok ro jãn jikin ko jet me rar itok ñan Jerusalem, rar roñ ainikien eo im rar ettõr ñan m̦weo bwe ren lale ta eo ear wal̦o̦k. Rar bwilõñ ke rej roñ an rũkal̦oor ro kõnono ilo kajin ko jet. Rar ba: ‘Etke armej rein jãn Galili remaroñ kõnono ilo kajin ko ad?’

Innem Piter im rijjilõk ro jet rar jutak im̦aan armej ro. Piter ear kwal̦o̦k ñan er kõn wãween an kar Jesus mej im bwe em̦õj an Jeova kõjerkakpejeiki. Ear ba: ‘Jesus epãd lañ kiiõ ituanbwijmaroñin Anij, im ear letok jetõb kwõjarjar ãinwõt kar kallim̦ur kake. Eñin unin kom̦ij roñ im loi menin bwilõñ kein.’

Naan ko an Piter rar lukkuun tõpar bũruon armej ro. Rar kajjitõk im ba: “Ta eo kõmij aikuj kõm̦m̦ane?” Ear ba ñan er: ‘Kom̦win ukel̦o̦k jãn jerawiwi ko ami im peptaij ilo etan Jesus. Im kom̦ naaj bõk menin letok eo, jetõb kwõjarjar.’ Ilo raan eo wõt, enañin 3,000 armej rar peptaij. Jãn iien eo m̦aanl̦o̦k, ear m̦õkaj an jino lõñl̦o̦k rũkal̦oor ilo Jerusalem. Ikijjeen jipañ jãn jetõb kwõjarjar, rijjilõk ro rar maroñ kajutak elõñl̦o̦k eklejia ko bwe ren maroñ katakin rũkal̦oor ro aolepen men ko Jesus ear jiroñ er bwe ren kõm̦m̦ani.