Jesus Ej Kããlõt Rijjilõk Ro 12

Ãlikin an kar Jesus kwal̦o̦k naan ium̦win juon jimattan iiõ, kiiõ ej itõn kõm̦m̦ane juon pepe el̦ap an aorõk. Wõn ro enaaj kããlõt er bwe ren jerbal ippãn? Wõn ro enaaj katakin im kammineneik er ñan tõl Kũrjin ro? Jesus ear kõn̦aan bwe Jeova en tõle ilo pepe in. Kõn men in, ear etal ñan juon tol̦ bwe en makel̦o̦k iaan im ear jar aolepen boñõn eo. Ilo jibboñõn raan eo tok juon, Jesus ear kũrtok jet iaan rũkal̦oor ro an im ear kããlõt 12 iaaer bwe ren an rijjilõk. Kwõj keememej ke etan l̦õm̦arein? Etaer kar Piter, Andru, Jemes, Jon, Pilip, Bartolomu, Tomas, Matu, Jemes nejin Alpiõs, Tadiõs, Saimõn im Judas Iskariõt.

Ekkã an kar rijjilõk ro 12 itoitak ippãn Jesus. Ãlikin an kar katakin im kammineneik er, ear jilkinl̦o̦k er bwe ren make kwal̦o̦k naan. Im Jeova ear lel̦o̦k kajoor ñan er bwe ren maroñ kadiwõjl̦o̦k jetõb ko rettoon jãn ippãn armej ro im kõmour ro renañinmej.

Jesus ear watõk rijjilõk ro an 12 bwe rej ro jeran, im el̦ap an kar lõke er. Bõtab Parisi ro rar watõk rijjilõk ro bwe rej jet armej ro rettã im ejabwe jel̦ãl̦o̦kjen̦ ko ippãer. Ak Jesus ear kammineneik im kõpooj er ñan aer kõm̦m̦ane jerbal eo aer. Rein rar maroñ pãd ippãn Jesus ilo iien ko raorõktata ilo mour eo an, ãinwõt ilo iien eo m̦okta jãn an kar mej im ãlikin an kar jerkakpeje. Ãinwõt Jesus, enañin aolep rijjilõk ro an rar itok jãn Galili. Im jet iaan rijjilõk rein em̦õj aer m̦are.

Rijjilõk ro rar jab weeppãn im rekõn kõm̦m̦an bõd. Jet iien rar jab l̦õmn̦ak m̦okta jãn aer kõnnaan im rar kõm̦m̦ani pepe ko rejjab em̦m̦an. Ewõr iien rar jaje kõttar ak jaje kijenmej. Joñan rar bar akwããl kõn wõn eo iaaer eaorõktata. Bõtab, rein rar jet armej ro rem̦m̦an me rar yokwe Jeova. Tokãlik renaaj kar m̦õttan armej ro jinointata ilo eklejia eo an Kũrjin ro me renaaj kar kõm̦m̦ani jerbal ko raorõk ãlikin an Jesus mej.