Jesus Ej Mej ilo Juon Jikin Etan Golgota

Bũrij ro rel̦l̦ap rar bõkl̦o̦k Jesus ñan m̦weo im̦õn kabna eo etan Pail̦at. Pail̦at ear kajjitõk ippãer: ‘Ta eo kom̦ij kinaaketok em̦m̦aan in kake?’ Rar uwaak im ba: ‘L̦ein ej ba e kiiñ.’ Im Pail̦at ear kajjitõk ippãn Jesus: “Kwe ke Kiiñ eo an ri-Ju?” Jesus euwaak im ba: “Aelõñ eo aõ ejjab m̦õttan lal̦ in.”

Innem Pail̦at ear ba bwe ren bõkl̦o̦k Jesus ñan ippãn Herod, l̦eo ej irooj in Galili, bwe en maroñ lale ñe ewõr ruõn. Ke Herod ear jab lo ruõn, ear bar jilkinl̦o̦ke ñan ippãn Pail̦at. Innem Pail̦at ear ba ñan armej ro: ‘Kõm̦ro Herod kar jab lo ruõn em̦m̦aan in. Inaaj kõtl̦o̦ke.’ Ak armej ro rar lam̦õj im ba: ‘M̦ane! M̦ane!’ Kõn men in, rũttarin̦ae ro rar deñõte Jesus kõn juon to, kapilouki, im kade. Rar pirõke raan kãlõklõk ko im likũti ioon bõran im kajjirere kake e im ba: ‘Yokwe eok! Kiiñ en̦ an RiJu ro.’ Bar juon alen, Pail̦at ear ba ñan armej ro: ‘Ijjab lo ruõn em̦m̦aan in.’ Ak rar lam̦õj im ba: ‘Totoiki ilo jurõn al̦al̦.’ Innem Pail̦at ear kõtl̦o̦k e bwe ren m̦ane.

Innem rũttarin̦ae ro rar bõkl̦o̦k Jesus ñan juon jikin etan Golgota im dilaiki ñan ioon juon jurõn al̦al̦, im ãlikin rar kajutake. Jesus ear jar im ba: ‘Jema, kwõn jol̦o̦k aer bõd bwe rejaje ta eo rej kõm̦m̦ane.’ Armej ro rar kõm̦m̦an kõjak kake im ba: ‘El̦aññe kwe Nejin Anij, kwõn to lal̦tak jãn al̦al̦ n̦e im lo̦mo̦o̦ren kwe make.’

Juon iaan rinana ro me ear toto iturin, ear ba ñane: “Kwõn kab keememej ña ñe kwõnaaj pãd ilo Aelõñ eo am̦.” Jesus ear kallim̦uri im ba: “Kwõnaaj pãd ippa ilo Pedetaij.” Ilo iien in ej raelep wõt, ak ear jok marok ioon ãneo ium̦win 3 awa. Jet iaan rũkal̦oor ro ekoba Meri, jinen Jesus, rar jutak iturin jurõn al̦al̦ eo ear toto ie. Jesus ear ba ñan Jon bwe en kab kõjparoke Meri im lale ãinwõt ñe bar jinen.

Ãliktata Jesus ear ba: “Ededel̦o̦k!” Innem ear jillo̦k im bõk kũtuon im mej. Ilo iien eo wõt, ear l̦ap an m̦akũtkũt lal̦. Im ilo tampel̦ eo, katiiñ eo ikõtaan Jikin eo Eokkwõjarjar im Jikin Eokkwõjarjar Otem Kwõjarjar ear potak ñan ruo m̦õttan. Juon iaan rũttarin̦ae ro ear ba: ‘Em̦ool bwe e Nejin Anij.’