Re Mõn Jisõs

LALE mõk men nana eo ej walok! Rej mõn Jisõs. Emwij air dror e ion juõn alal. Rej drilaiki pein im neen. Etke jabrewõt en kõnan kõmõn men in ñõn Jisõs?

Ej kinke jet armij rej drike Jisõs. Kwo jela ke wõn rein? Juõn iair ej enjel nana eo Setan, Devil eo. Ej e eo im e ar maroñ ukõt Adam im Iv bwe ren jab bokake Jeova. Im ej Setan eo e ar kõmõn bwe ro rej drike Jisõs ren kõmõn men nana in.

Mokta jen air drilaik Jisõs ijin ion alal eo, ro an dri kijirat rej kõmõn men ko re nana ñõn e. Kwoj kememij ke wãwen air dreloñ ilo jikin kallip in Get-sem’a-ni im jibwe? Kar wõn dri kijirat rein? Aet, kar dri tel ro an kabuñ ko. Eokwe, jen lale ta eo ej walok kiõ.

Ien eo dri tel ro an kabuñ rej jibwe Jisõs, dri jilik ro an rej ko. Rej likit Jisõs lok ian iben ro an dri kijirat, kinke re lukkun mijõk. Ak dri jilik ro Piter im Jon rejjab ilok etolok. Rej lorlok armij ro bwe ren lale ta eo ej walok ñõn Jisõs.

Pris ro rej ãñinlok Jisõs iben lallab eo, An’as, eo im e ar pris eo elap mokta. Ejjab to an armij ro ber ijo. Kiõ rej ãñin lok Jisõs ñõn mweo imõn Kai’e-pas, eo ej pris eo elap kiõ. Elõñ dri tel ro an kabuñ rej kweloktok ñõn mweo imõn.

Ijin ilo mweo imõn Kai’e-pas, rej kõmõn juõn ien ekajet. Rej ãñin tok armij ro bwe ren riõp nae Jisõs. Aolep dri tel ro an kabuñ rej ba: ‘Jisõs en mij.’ Inem rej emmõje mejen, im ubrare kin peir.

Ilo ien eo ej walok men kein, Piter ej ber inabwij i melan mweo. E molõ boñin eo, inem armij ro rej kejojõ kijeek. Im ke rej kamãnãn ir iturin kijeek eo, juõn ledrik, korijeran pris eo ej kalimjek Piter im ba: ‘Le in e ar bareinwõt mõttõn Jisõs.’

‘Jaab, I ar jab! Piter ej uak.

Jilu alen an armij ro ba ñõn Piter bwe ekõn ber iben Jisõs. Ak kajojo ian alen kein Piter ej ba bwe ejjab mol. Ke Piter ej ba men in alen jilu, Jisõs ej oktak im kalimjek e. Piter e lukkun buromõj kin an riõp, im ej ilok im jõñ.

Ke e jino tak al jibboñ in Friday eo, pris ro rej ãñin lok Jisõs ñõn jikin kwelok eo air elap, etan San’hi-drin. Ijin rej konono im bebe kin men ko re naj kõmõn ñõn e. Rej ãñin lok e iben Pontiõs Pailat, eo ej iroij in bukwon in Ju-di’a.

‘Armij in e nana,’ pris ro rej jiroñ Pailat. ‘En mij.’ Elikin an kwalok elõñ kajitõk ko, Pailat ej ba: ‘Ijjab lo ruen likao in.’ Inem Pailat ej jilkinlok Jisõs iben Herod An’ti-pas. Herod ej iroij in Gal’i-li, ak ej jokwe ilo Jerusalem. Herod ejjab bar lo jabrewõt men enana iben Jisõs, im kin men in ej kajeblak e ñõn Pailat.

Pailat e kõnan kotlok Jisõs. Ak ro an Jisõs dri kijirat re kõnan kotlok bar juõn dri kalibuj, ak en jab Jisõs. Lein ej dri kwot eo etan Bar-ab’as. Kiõ e iten auõ in raelip ke Pailat ej ãñin lok Jisõs ñõn nabwij in mweo. Ej ba ñõn armij ro: ‘Lo! Ami Kiñ!’ Ak pris ro relap rej lamij im ba: ‘Jolok armij in! Mõn e! Mõn e!’ Kin men in Pailat ej kotlok Bar-ab’as, ak rej ãñin lok Jisõs bwe ren mõn e.

Elikin raelip in Friday eo rej drilaik Jisõs ion juõn alal. Kwo ban lo ir ilo pija eo, ak ilo tu-anbijmaroñõn im tu-anmiñin Jisõs rej bareinwõt mõn ruo dri koaroñ ion alal. Mokta jirik jen an Jisõs mij, juõn ian dri koaroñ ro ej ba ñõn e: ‘Kwon kememij iõ ñe kwoj ber ilo am ailiñ.’ Im Jisõs ej uak im ba: ‘Ij kalimuri yuk bwe kwo naj ber ibã ilo Paredais.’

Menin ejjab juõn kalimur emõn ke? Kwo jela ke paredais et eo Jisõs ej konono kake? Paredais eo me Anij e ar kõmõnmõn e ilo jinoin e ar ber ia? Aet, ion lõl. Im ñe Jisõs ej iroij einwõt kiñ i lõñ, e naj kajeblak lein ñõn mour bwe en mõnõnõ ilo Paredais eo ekãl ion lõl. Ejab je maroñ mõnõnõ kin men in ke?