Meletlet eo ñan “Kalmenlokjen kin Ta eo Enaj Walok”
“REJ armij ro rar luji maroñ in kõmmanwa eo air im ejelok meletlet ilo ir. Elañe rar meletlet, renaj kar melele menin im kalmenlokjen kin ta eo enaj walok ñan ir.”—Deuteronomy 32:28, 29, Beck.
Moses ear konono nan kein ñan Ri Israel ro ke rar jutak tõrerein Enen Kallimur eo. Moses ear kanan kin juõn ien ñe renaj karmijeteik Jehovah im jab kalmenlokjen kin tokjen ko kin makitkit ko air. Ilo ebeben ko tokelik, armij ro in Israel—ekoba elõñ king ro—rar kajekdon nan in kakkõl ko an Anij.
Ñan wanjoñok, Solomon ear jelã kin kien eo ñan jab mareik ri kabuñ ro an anij ro jet ijellokin Jehovah. (Duteronomi 7:1-4) Mekarta, ear belek “elõñ kõra ro drua.” Kar ta tokjen eo? Bible eo ej ba: “Ke Solomon e lõlap, limaro belen kar karel buruen ñõn anij ro jet; inem buruen e jab wãppen iben Jeova an Anij, einwõt buruen Devid jemen.” (1 Kiñ Ro 11:1, 4) Meñe ear juõn emaan emeletlet, Solomon ear likjap in ‘kalmenlokjen kin ta eo enaj walok’ elañe ear rupe kien eo an Anij.
Ta kin kij? Jemaroñ bõprae ad iion elõñ eñtan ko elañe jej kalmenlokjen kin bebe ko ad kin mour. Ñan wanjoñok, rej kakabileklek Christian ro bwe ren “mõke karreoik [ir] jen etton otemjej in kõniek kab ar.” (2 Dri Korint 7:1) Menin ej juõn menin meletlet, ak elõñ rejjab kalmenlokjen kin ta eo emaroñ walok elañe rej kajekdon nan in kakabilek in an Paul. Ñan wanjoñok, elõñ jodikdik ro rej katton enbwiniir ilo air kõbatat, im rej lemnak bwe menin ej kõmman air einwõt meletlet im armij ro reritto. Elap an kaburomõjmõj ke, tokelik ilo air mour, elõñ rej eñtan kin abañ ko kin menono eo air, lung cancer, ak emphysema!
Elap an aorõk ñan kalmenlokjen kin tokjen ko rej walok jen bebe im makitkit ko ad. Kin un emõn, Paul ear je: “Bwe jabrewõt eo armij ej jeor e, men in e naj bareinwõt marmir e. Bwe eo ej jeor ñõn kõniekin, jen kõniekin e naj marmir wabõnbõn; a eo ej jeor ñõn Jitõb, jen Jitõb e naj marmir mour in drio.”—Dri Galetia 6:7, 8.