Family Ko, Nebar Amij Einwõt Mõttan Congregation Eo An
“Ilo jar ko I naj nebar Jeova.”—SAM 26:12.
1. Ta eo ej juõn mõttan eaorõk ilo kabuñ eo emol ijellokin katak im jar ilo mweo?
KABUÑ ñan Jehovah ekoba jab jar im katak Bible ilo mweo wõt ak bareinwõt jerbal ko einwõt mõttan congregation eo an Anij. Kar kakiene Israel eo etto ñan “kokweloktok armij ro, man im kõra, im ajiri,” ñan katak kien eo an Anij bwe ren jelã etetal ilo ial eo an. (Duteronomi 31:12; Joshua 8:35) Kar rejañ ritto ro im ‘man rõn im kõra rõn emõn drer’ ñan bõk kunair ilo jerbal in nebar etan Jehovah. (Sam 148:12, 13) Lajrak ko einlok wõt rej jerbal bareinwõt ilo congregation in Christian. Ilo Kiiñdom Hall ko ibelakin lal, maan ro, kõrã ro, im ajiri ro rej mõnõnõ in bõk kunair ilo katak ko me ri kwelok ro remaroñ uak, im elõñ rej lo elap mõnõnõ ñe ewõr kunair.—Dri Hibru 10:23-25.
2. (a) Etke kebojak ej juõn mõttan eaorõk ñan jibañ ro redik ñan lañliñ kin kwelok ko? (b) Wanjoñok eo an wõn eo eaorõk?
2 Emol, emaroñ juõn jerbal elap ñan jibañ ro redik ñan kaddek juõn manit emõn ñan bõk kunair ilo makitkit ko an congregation eo. Elañe jet ajiri ro me rej itok ibben jemeir im jineir ak rejjab mõnõnõ in bed ilo kwelok eo, ta eo emaroñ abañ eo? Emol, enañin aolep ajiri ro ejjab aetok air maroñ roñjake im ebidodo air mõk. Kebojak lok iman emaroñ jibañ kamadmõde abañ in. Elañe ejelok kebojak lok iman, ajiri ro rejjab maroñ bõk kunair ilo kwelok ko ilo juõn wãwen ewõr tokjen. (Jabõn Kennan Ko 15:23) Elañe ejelok kebojak lok iman, enaj bin air kõmman wõnmanlok ilo jitõb eo ej kajuburueir. (1 Timote 4:12, 15) Ta eo jemaroñ kõmmane? Mokta, ro jemen im jinen ajiri ro rej aikwij kajitõk elañe ir make rej kebojak kin kwelok ko. Wanjoñok eo air ej juõn kilan ekajur. (Luk 6:40) Karõk ilo emõn kin katak in family eo emaroñ juõn men eaorõk bareinwõt.
Kalek Burueir
3. Ilo ien katak in family eo, etke rej aikwij kate ir ñan kalek burueir, im menin ej aikwiji ta?
3 Katak in family eo en jab ñan baj kobrak bõrair kin jelãlokjen ak bareinwõt ñan kalek burueir. Menin ej aikwij air jelã jimor kin abañ ko me ro uan family eo rej jelmaiki im juõn itoklimo ilo yokwe kin kajjojo iair. Jehovah ej “melejoñ buru.”—1 Kronikel 29:17.
4. (a) Ta melelen “ejelok air jelalokjen”? (b) Ta eo ej koba ilo “bõk meletlet”?
4 Ta eo Jehovah ej lo ñe ej melejoñe buru ko an ro nejid? Enañin aolep renaj ba bwe rej yokwe Anij, im men in ej juõn menin nebar. Ak, juõn eo ej dik wõt ak ej kab jino an katak kin Jehovah ewõr joñan an jelã kin wãwen ko an Jehovah. Kinke ejelok iminene ibben, emaroñ “ejelok an jelalokjen,” einwõt Bible eo ej ba. Bõlen un ko unin ej kõmman men ko ejjab nana aolep ien, ak ej bõk ien ñan kõmman bwe buruen en ilo juõn wãwen Anij ej buñburuen kake. Men in ej kitibuj ad kõmman bwe lemnak ko, kõnan ko, men ko jej yokwe, im eñjake ko ad ilo mour ren ekkar ñan ta ko Anij ej buñburuen kaki, ñan joñan eo armij ro rejjab wãppen remaroñ. Ñe juõn armij ej jek nalõmen armij eo iloa ilo juõn wãwen ekwojarjar, ej “bõk meletlet.”—Jabõn Kennan Ko 9:4; 19:8.
5, 6. Ewi wãwen ro jemen im jinen remaroñ jibañ ro nejiir ñan ‘bõk meletlet’?
5 Ro jemen im jinen remaroñ ke jibañ ro nejiir ñan ‘bõk meletlet’? Emol, ejelok juõn armij emaroñ likit juõn buru emõn ilo bar juõn armij. Kij kajjojo jej anemkwoj in kãlet, im elap ijo ej wawa ion men ko jej lemnak kaki. Bõtab, ilo air jerbale lolokjen, ro jemen im jinen ajiri roi ekkã air maroñ tuuri lemnak ko an ro nejiir, im jelã ta eo iburueir im tu-ia rej aikwiji jibañ ie. Kajerbal kajitõk ko einwõt ‘Ewi lemnak eo am kin menin?’ im ‘Ta eo kwo lukkun kõnan kõmmane?’ Inem, lukkun roñjake. En jab le jen joñan am emmakit ñan uak eo an. (Jabõn Kennan Ko 20:5) Juõn mejatoto in joij, melele, im yokwe ej aorõk elañe kwo kõnan tõbar buruen.
6 Ñan kakajurlok kadkad ko remõn, en emakijkij am bwebwenato kin leen jitõb ko—kajjojo wãwen ko—im jerbal ibben don einwõt juõn family ñan kaddeki. (Dri Galetia 5:22, 23) Kaddek ilo ir juõn yokwe kin Jehovah im kin Jesus Christ, jab ilo am baj ba wõt bwe jej aikwij yokwe ir ak ilo ad bwebwenato kin un ko unin jej aikwij yokwe ir im ewi wãwen ad maroñ kwalok yokwe rot en. (2 Dri Korint 5:14, 15) Kakajurlok kõnan eo ñan kõmman men ko rejimwe ilo am kõmmanwa ibbeir kin tokjen ko renaj walok jeni. Kalek juõn kõnan ñan bõprae lemnak, konono, im mwil ko renana ilo am bwebwenato kin tokjen ko renana renaj walok jen men kein. (Amos 5:15, New World Translation; 3 Jon 11) Kwalok kin ewi wãwen lemnak, konono, im mwil ko—meñe emõn ak nana—remaroñ jelet kõtan eo air ibben Jehovah.
7. Ta eo jemaroñ kõmmane ñan jibañ ajiri ro ñan jerbale abañ ko air im ñan kõmman bebe ko ilo juõn wãwen eo enaj kejbãrok air ebake wõt Jehovah?
7 Ñe juõn ajiri ej iion juõn abañ ak ej aikwij kõmman juõn bebe eaorõk, jemaroñ kajitõk ibben: ‘Ewi am lemnak kin wãwen eo Jehovah ej watõk menin? Ta eo kwoj jelã kin Jehovah me ear kõmman an eindein am uak? Kwar jar ñan e kin menin ke?’ Jen ien eo emõkajtata, jibañ ro nejõm ñan kalek juõn manit ilo mour eo an ñan kõmman jibadbad ko ñan jelã ankil an Anij inem kõmmane. Ñe rej ejaak juõn kõtan ebak ibben Jehovah, renaj lo mõnõnõ in etetal ilo ial ko an. (Sam 119:34, 35) Menin enaj kalek ilo ir juõn kamolol kin jerammõn eo ilo air mõttan congregation eo an Anij eo emol.
Kebojak kin Kwelok ko an Congregation eo
8. (a) Ta eo emaroñ jibañ kij ñan kobaik ilo katak in family eo ad aolep men ko me jej aikwij lale? (b) Ewi aorõkin katak in?
8 Elõñ men ko jej aikwij lale ilo ien katak in family eo. Ewi wãwen am maroñ lale aolepeir? Kwoj jab maroñ kõmman aolepeir ilo ejja ien eo wõt. Ak enaj juõn menin jibañ ñan kõmman juõn checklist (lajrak in men ko kwoj aikwij kõmmani). (Jabõn Kennan Ko 21:5) Jen ien ñan ien, eliji im lale ta eo kwoj aikwij etale. Kwon kwalok am itoklimo ilo wõnmanlok eo an kajjojo uan family eo. Karõk in kin katak in family eo ej juõn mõttan eaorõk kin jelãlokjen in Christian, eo ej keboj kij kin mour in kiõ im kin mour indio eo ej itok.—1 Timote 4:8.
9. Ta mejenkajjik ko ikijen kebojak kin kwelok ko jemaroñ jerbale jidik kin jidik ilo katak in family ko ad?
9 Katak in family eo am ej kobaik ke ami kebojak kin kwelok ko an congregation eo? Elõñ karõk ko kom maroñ jerbale jidik kin jidik ñe komij katak ibben don. Jet iair remaroñ aikwij bõk week ko, alliñ ko, ak meñe yiõ ko ñan kõtõbraki. Lemnak kin mejenkajjik kein: (1) kajjojo uan family eo en bojak in uak ilo kwelok ko an congregation eo (2) kajjojo ej aikwij kate e ñan uak ilo nan ko an make; (3) kobaik eon ko ilo uak ko air; im (4) etale katak eo kin mejenkajjik eo ñan jerbale ilo mour eo am. Aolep men kein remaroñ jibañ juõn armij ñan kadeloñ mol eo ilo buruen.—Sam 25:4, 5.
10. (a) Ewi wãwen ad maroñ lale kajjojo kwelok ko an congregation eo? (b) Etke ewõr tokjen menin?
10 Meñe katak in family eo am ekkã an wawa ion katak eo ilo Imõniaroñroñ ñan week eo, jab kajekdon aorõkin an kajjojo armij ak family eo aikwij kebojak kin Congregation Book Study, Theocratic Ministry School eo, im Service Meeting eo. Men kein rej bareinwõt mõttan ko raorõk ilo program eo ñan katakin kij ñan etetal ilo ial eo an Jehovah. Jen ien ñan ien kom maroñ kebojak kin kwelok ko einwõt juõn family. Ilo ami jerbal ibben don, kabel ko ami ñan katak renaj emõnlok. Tokjen menin, kom naj bõk elaplok tokjen ko remõn jen kwelok ko. Ijellokin men ko jet, bwebwenato kin tokjen ko rej itok jen an keini ami kebojak kin kwelok kein, im kin aorõkin ami karõk juõn ien ejejjet kin men kein.—Dri Epesõs 5:15-17.
11, 12. Ewi wãwen ad maroñ bõk tokjen jen ad kebojak kin al ko ilo congregation eo, im ewi wãwen ad maroñ kõmmane menin?
11 Ilo “Mour Ekkar Ñan Wãwen Anij” Convention ko, kar rejañ kij ñan kebojak kin bar juõn mõttan in kwelok ko ad—ñan al. Kwar kõmmane ke men in? Ad kõmman eindein emaroñ jibañ kabin mol ko ilo Bible ilo lemnak ko ad im buruõd im ilo ejja ien eo wõt kalaplok mõnõnõ eo ad kin kwelok ko an congregation eo.
12 Kebojak ko me rej kitibuj ad konono im bwebwenato kin melele eo kin nan ko ilo jet ian al ko kar karõki emaroñ jibañ kij ñan al jen buruõd. Ilo Israel eo etto, elap air kar kajerbal kein kajañjañ ko ilo air kabuñ. (1 Kronikel 25:1; Sam 28:7) Ewõr ke juõn ilo family eo am emaroñ kajerbal juõn kein kajañjañ? Etke komij jab kajerbal kein kajañjañ eo ñan kamelmel juõn ian al ko ñan week eo, inem al al eo einwõt juõn family. Bar juõn wãwen ej ñan kajerbal cassette in roñjake eo. Ilo jet ene ko eaibujuij an ro jeid im jatid al meñe ejelok kein kajañjañ ko. Ñe rej etetal ilo ial ko ak kõmman jerbal eo air ilo jikin kallip ko, ekkã air al al ko kar karõki ñan kwelok ko an congregation eo ilo week eo.—Dri Epesõs 5:19.
Kebojak an Family eo kin Jerbal in Kwalok Nan
13, 14. Etke bwebwenato ko einwõt juõn family me rej keboj buruõd kin jerbal in kwalok nan raorõk?
13 Kwalok nan ñan ro jet kin Jehovah im karõk eo an ej juõn mõttan eaorõk ilo mour ko ad. (Aiseia 43:10-12; Matu 24:14) Meñe rej dik ak ritto, ej laplok ad lañliñ kin jerbal in im ej laplok ad maroñ kõtõbraki elañe jebojak. Ewi wãwen ad maroñ kõmman menin iloan dolul in family eo?
14 Einwõt ilo aolep men ko rej kitibuj kabuñ eo ad, eaorõk ñan keboj buruõd. Jej aikwij bwebwenato jab kin ta eo jenaj kõmmani wõt ak bareinwõt etke jenaj kõmmani. Ilo ran ko an Kiiñ Jehoshaphat, kar kameleleik armij ro kin kien eo ekwojarjar, ak Bible eo ej jiroñ kij bwe “armij re jañin kar kabin burueir.” Men in ear kõmman bwe en bidodo air kabo ir jen kabuñ eo emol. (2 Kronikel 20:33; 21:11) Mejenkajjik eo ad ejjab ñan baj kadeloñ report in jerbal in kwalok nan eo ad, im bareinwõt ejjab ñan lelok book im magazine ko. Jerbal in kwalok nan eo ad en juõn wãwen ad kwalok yokwe ñan Jehovah im ñan armij ro rej aikwiji juõn ien emõn ñan kãlet mour. (Dri Hibru 13:15) Ej juõn jerbal eo jemaroñ “dri jerbal iben Anij.” (1 Dri Korint 3:9) Ej juõn jerammõn elap! Ñe jej bõk kunad ilo jerbal in kwalok nan, jej kõmmane ilo ad jerbal ibben enjel ro rekwojarjar. (Reveles̃õn 14:6, 7) Ejelok juõn ien emõnlok ñan kalek kamolol kin menin jen ilo bwebwenato ko an family eo, elañe ilo katak eo ad ilo kajjojo week ak ñe jej bwebwenato kin juõn unin tel ekkar ilo Examining the Scriptures Daily!
15. Ñããt eo jemaroñ kebojak einwõt juõn family kin jerbal in kwalok nan?
15 Jet ien kwoj kajerbal ke ien am katak ibben family eo ñan jibañ ro uan family eo ñan kebojak kin jerbal in kwalok nan ilo week eo? Elañe kwoj kõmmane emaroñ bõktok tokjen ko relap. (2 Timote 2:15) Emaroñ jibañ ñan kõmman bwe jerbal eo air en wõr melelen im keie. Jet ien, kwomaroñ karõk bwe aolepen juõn ien katak en ñan kebojak rot in. Elaplok an emakijkij, kwomaroñ jerbale wãwen ko in kwalok nan ilo bwebwenato ko rekadu lok ilo tu-jemlokin katak in family eo ak ilo bar juõn ien ilo week eo.
16. Etale aorõkin kajjojo buñten nee ko kar kõlajraki ilo paragraph eo.
16 Ilo kwelok ko an family eo remaroñ etale juõn lelkan in buñten nee ko, einlok wõt kein: (1) Keboj juõn ennan emõn eo ej koba juõn eon remaroñ readi jen Bible eo elañe ewõr ien emõn. (2) Kõmman bwe kajjojo armij en wõr, elañe emaroñ, juõn ieb in kwalok nan, juõn Bible, juõn book in jeje, juõn pen ak pencil, tract ko, im book ko jet. Ieb in kwalok nan eo ejjab aikwij juõn eo elap wõnãn, ak en karbõb. (3) Bwebwenato kin ia eo im wãwen eo remaroñ kwalok nan ilo jabdewõt ien emõn tok. Elikin kajjojo buñten nee ko lolorjake ami jerbale nan in kakabilek eo ilo ami jerbal ibben don ilo jerbal in kwalok nan. Kwalok nan in rejañ ko, ak jab kauweik ir kin elõñ point ko.
17, 18. (a) Kain kebojak rot einwõt juõn family emaroñ jibañ ñan kõmman bwe jerbal in kwalok nan eo ad en laplok an wõr tokjen? (b) Ta wãwen kebojak in jemaroñ kõmmane ilo kajjojo week?
17 Juõn mõttan elap ilo jerbal eo Jesus Christ ear jitõñ ri kalor ro an ñan air kõtõbraki kar ñan kõmman ri kalor ro. (Matu 28:19, 20) Kõmman ri kalor ro ej kitibuj elaplok jen air baj kwalok nan wõt. Ej aikwiji air katakin. Ewi wãwen katak in family eo am emaroñ jibañ kom bwe en bolemen ami kõmmane?
18 Einwõt juõn family, bwebwenato kin wõn ro emõn ami jeblak ñan ibbeir. Jet iair remaroñ kar bõk book ak magazine ko; ro jet rar baj roñjake. Kom maroñ kar iion ir ilo jerbal eo jen em-ñan-em ak ke kom ad kwalok nan ilo jabdewõt ien emõn tok ilo imõn wia eo ak ilo school eo. Kõtlok bwe Nan in Anij en tel yuk. (Sam 25:9; Ezekiel 9:4, NW) Bebe kin wõn ro kajjojo iami ekõnan bar jeblak ibbeir ilo week eo. Ta eo kom naj konono kake? Bwebwenato in family eo emaroñ jibañ kajjojo uan ñan kebojak. Keboj jet eon ko ñan kwaloki ñan armij eo ej itoklimo im bareinwõt point ko rekkar jen brochure eo Ta Eo Anij Ekõnan Bwe Jen Kõmmõne? ak book eo Knowledge That Leads to Everlasting Life. Ñe komij bar jeblak en jab lap ami etali. Bõkmantak juõn kajitõk me kwonaj uake ilo trip eo tok juõn. Etke komij jab kõmman bwe en juõn manit an family eo kajjojo week ñan karõk kin wõn ro kajjojo uan family eo enaj jeblak ñan ibbeir, ñããt eo enaj kõmmane, im ta eo enaj kajeoñ in kõtõbrake. Menin enaj kõmman bwe jerbal in kwalok nan eo an aolepen family eo en wõr tõbrak.
Wõnmanlok im Katakin Ir kin Ial eo an Jehovah
19. Ñan an ro uan family eo wõnmanlok im etetal ilo ial eo an Jehovah, ta eo rej aikwij loe, im ta eo enaj jibañ ir ñan bõke?
19 Am juõn bõran family ilo lal in enana ej juõn aitwerõk elap. Satan im demon ro an rej kate ir ñan kokkure mour in jitõb an ri karejar ro an Jehovah. (1 Piter 5:8) Bareinwõt, ilo ran kein ro jemen im jinen ajiri ro rej iion elap ijjibed ko, elaptata ro jemen im jinen me ejako rejetair. Ebin lo ien ñan kõmman aolep men ko kwo kõnan kõmmani. Ak ewõr tokjen am kate yuk kõmmane, meñe kwoj aikwij jerbale juõn wõt buñten nee ilo juõn ien, im jidik kin jidik kakõmõnmõnlok program in katak eo am einwõt juõn family. Ej juõn jinekjej eokmãnãn buru ñan lo bwe ro rejitenburu ibbam rej etetal ilo ial eo an Jehovah ilo tiljek. Ñan lo tõbrak in etetal ilo ial eo an Jehovah, ro uan family eo rej aikwij lo mõnõnõ in bed ilo kwelok ko an congregation eo im ñan bõk kunair ilo jerbal in kwalok nan. Bwe en mol menin, kwoj aikwij kebojak—kebojak eo ej kalek buru im ej kamaroñ kajjojo armij ñan bõk kunan ilo juõn wãwen ewõr tokjen.
20. Ta eo emaroñ jibañ elõñlok ro jemen im jinen ajiri ro ñan lo lañliñ rot eo me 3 John 4 ej kwalok kake?
20 Ikijen ro ear jibañ ir ilo jitõb, ri jilek John ear je: “Ejelok lõñliñ iba elap jen in, bwe in roñ kin an ro nejiõ etetal ilo mol.” (3 Jon 4) Katak in family ko me rej kõmmani ilo air lemnak kin mejenkajjik ko ralikar im ro bõran family ko rej jerbal ilo juõn wãwen ejoij kin aikwij ko an kajjojo uan family eo elap an kamaroñ ir ñan lo lañliñ rot in. Ilo air kaddek juõn kamolol kin mour ekkar ñan wãwen Anij, ro jemen im jinen renaj jibañ family eo air ñan lañliñ kin wãwen mour eo emõntata.—Sam 19:7-11.
Kwomaroñ ke Kamelele?
◻ Etke kebojak kin kwelok ko raorõk ñan ajiri ro nejid?
◻ Ewi wãwen ro jemen im jinen remaroñ jibañ ro nejiir ñan ‘bõk meletlet’?
◻ Ewi wãwen katak in family eo ad emaroñ jibañ kij ñan kebojak kin aolep kwelok ko?
◻ Ewi wãwen kebojak kin jerbal in kwalok nan einwõt juõn family emaroñ jibañ kij bwe en laplok an bolemen wãwen ad kwalok?
[Pija eo ilo peij 29]
Kamelmel kin al ilo kwelok ko bwe ewõr tokjen