Ro Bõran Family—Kejbãrok juõn Manit Emõn kin Men ko Lor Jitõb
1 Meñe ear mour iumin elõñ yiõ ko ibwiljin ro rar kabuñ ñan ekjap im kõmman nana ilo Babylon, armij ro rar jelã kajjen Daniel einwõt juõn eo ear karejar ñan Jehovah “ilo tiljek.” (Dan. 6:16, 20, NW) Ewi wãwen an kar kejbãrok mour in jitõb eo an? Lokbook eo ilo Bible ej kalikar bwe ear wõr juõn manit ekwon ibben ñan kõmman jerbal ko ewõr kõttair ñan kabuñ eo emol. Ñan wanjoñok, ear juõn manit ibben ñan jar jilu alen ilo juõn ran ilo bo eo imweo imõn. (Dan. 6:10, NW) Ejelok bere, ear bareinwõt kajutak manit ko jet kin men ko lor jitõb, einwõt an read Kien eo. Kin men in, ke ear iion melejoñ ko rar jelet mour eo an, Daniel ear tiljek wõt ilo an karejar ñan Jehovah, im kar lomor e ilo kabwilõñlõñ.—Dan. 6:4-22, NW.
2 Eindein lok wõt rainin, jej aikwij kate kij ñan “ekil . . . ilo niknik.” (Ep. 6:18) Lal eo jej jokwe ie ej “berwõt ilo dri nana eo.” (1 Jon 5:19) Jumae ak melejoñ ko remaroñ walok ilo jidimkij im melejoñe tõmak eo ad. Ilo eñtan eo elap, ri karejar ro an Anij renaj kein kõjjeroro an Gog in Magog ke ej tarinaik ir, im enaj einwõt ñe ejelok ial in ko jen e. Men in enaj aikwiji ad lukkun liki Jehovah.—Ezek. 38:14-16, NW.
3 “Juõn key eaorõk ej ilo ad kõmman bwe read, katak, im bwebwenato kin Bible eo einwõt juõn family en juõn wãwen mour.” Eindein kar kwalok kake ilo nan in kabellok eo ilo 1998 drama eo ilo district convention eo etan “Family ko—Kõmman bwe Read Bible Kajjojo Ran En Wãwen Mour eo Am!” Ear wõnmanlok: “Ñe family ko rej keini air lor juõn program rot in im rej kõmmane ilo juõn wãwen ej kõmman bwe Bible eo en emmourur, manit in emaroñ lap an jelet family eo. Ej kalaplok jelãlokjen eo ad. Ej kakajurlok tõmak eo ad. Im ej letok ñan kij joñok ko remõn—maan im kõrã ro elap air tiljek ilo ien ko etto—ro remaroñ lujur kij, im kamakit kij ñan jutak kin mol eo.” Ñe jej etale jet wãwen ko kin juõn manit emõn kin men ko lor jitõb, ro bõran family ko ren bukõt juõn ak ruo wãwen ko ñan kakõmanmanlok program in men ko lor jitõb an family eo air.
4 Etale Nan in Anij Ran Otemjej: “Ñe enaj ejelok jumae ñan iroij eo an Ailiñ in Anij im emwij kõmanman ankil an ion lal einwõt ilañ, ejelok armij ro relej—ejelok menin mour ko bareinwõt—renaj ‘kaeñtan ak kokkure.’ (Ais. 11:9; Mat. 6:9, 10)” Nan kein rar walok ilo Examining the Scriptures Daily—2001 ilo nan in kamelele ko ñan unin tel eo an September 11. Nan in kakememej in emol an kar lap an kainemõn! Einwõt bõran juõn family, ewõr ke manit eo ñan etale unin tel in ran im nan in kamelele ko ran otemjej ibben family eo am? Men in elap an wõr tokjen. Elañe ebin an aolep bed ibben don ilo jibboñ, bõlen kwomaroñ kõmmane tokelik ilo ran eo. Juõn jemen ear ba: “Ilo ien mõñã ilo jota kar ien eo emõntata ñan am etale eon eo ilo Bible ñan ran eo.
5 Elañe ededelok an wõr juõn manit emõn ibbemi ñan etale unin tel eo ilo ran otemjej einwõt juõn family, kimij nebar kom. Bõlen kom maroñ kalaplok tokjen eo komij bõke ilo ami read juõn mõttan ilo Bible ilo ejja ien eo wõt. Jet ewõr manit eo ibbeir ñan read aolepen katak eo ijo unin tel eo ear walok jen e. Ro jet rej read katak ñan katak manlok, im jidik kin jidik rej read aolepen juõn book ilo Bible. Read Bible kajjojo ran naj jibañ family eo am ñan kaddeklok juõn mijak emõn in jab kaburomõj Jehovah im naj kamũlallok kõnan eo air ñan kõmanman ankil an.—Dut. 17:18-20.
6 Program an family eo am ñan read Bible im etale unin tel ilo ran eo emaroñ laplok an wõr tokjen elañe komij bõk jejjo minute ko ñan bwebwenato kin ewi wãwen kom maroñ jerbale kamelele eo. Ministry School book eo, peij 60, ej letok nan in rejañ in: “Kwomaroñ . . . kãlet jejjo eon ko jen schedule in read Bible ñan week eo, bwebwenato kin meleleir, inem bõkmantak kajitõk rot kein: ‘Ewi wãwen ej letok nan in tel ñan kij. Ewi wãwen jemaroñ kajerbal eon kein ilo jerbal in kwalok nan eo ad? Ta eo rej kwalok kin Jehovah im kin wãwen eo ej kõmman men ko, im ewi wãwen an men in kalaplok kamolol eo ad kin e?’ ” Bwebwenato rot in kin men ko ilo jitõb naj jibañ aolep ilo family eo am bwe ren “jelalokjen ta eo ankil an [Jehovah].”—Ep. 5:17.
7 Katak an Family eo: Keini in kõmman katak an family eo kajjojo week ej juõn wãwen emõn ro bõran family ko remaroñ kwalok ñan ro nejiir bwe men ko lor jitõb ren men ko moktata. Juõn likao ej kememej: “Jet ien joñan an kar mõk Papa kin an jerbal ear lukkun mejki, ak meñe eindein ear kõmman katak an family eo, im men in ear jibañ kim ñan melele kin aorõkin.” Ajiri ro bareinwõt remaroñ kõmman ijo kunair ñan kõmman bwe en wõr tõbrakin karõk in. Juõn family eo ear wõr ratimjuõn nejiir rar keini air ruj ilo lalem awa ñan katak einwõt juõn family kinke ear ejelok bar juõn ien emõn.
8 Bwe en keie katak in family eo, bõran family eo ej aikwij ‘kejbãrok men in katakin ko an.’ (1 Tim. 4:16) Ministry School book eo, peij 32, ej ba: “Jemaroñ ba bwe juõn katak in family ekeie ej jino kin juõn katak kin aikwij ko an family eo make. Ewi wãwen ro uan family eo am rej wõnmanlok ilo jitõb? . . . Ñe kwoj jerbal ibben ro nejõm ilo jerbal in kwalok nan, rej mõnõnõ ke in kwalok kajjiir einwõt Ri Kennan ro an Jehovah ñan ro mõttair? Rej lañliñ ke kin program eo am kin read im katak Bible einwõt juõn family? Rej kõmman ke bwe wãwen Jehovah en wãwen mour eo air? Ilo am lukkun lale men in enaj kalikar kin ta kwe, einwõt bõran family eo, kwoj aikwij kõmmane ñan kaddeklok kadkad ko ilo jitõb ilo kajjojo uan family eo.”
9 Kwelok ko an Congregation eo: Kebojak kin im bed ilo kwelok ko an congregation eo en juõn mõttan eaorõk ilo manit eo am week otemjej. (Hib. 10:24, 25) Jet ien, kwonaj maroñ kebojak kin jet ian kwelok ko einwõt juõn family. Jen am kõttar mae minute eo eliktata, kwomaroñ ke karõk ñan kebojak mokta lok iman? Juõn manit ekwon kin men in enaj kakõmanmanlok emõnin kebojak eo am im tokjen ko kwoj bõki jen kwelok ko.—Ken. 21:5.
10 Emõn im ekkeini kõmmane rej kadkad ko kadkadin juõn manit ekeie ilo jitõb. Ta elañe wãwen ko ibbam rej kõmman bwe en bin am kebojak kin aolep kwelok ko? Ministry School book eo, peij 31, ej letok nan in rejañ in: “Kwon bõprae am kakaiuriur in kebojak kin katak ko ñan baj kõmmane wõt, ak elaplok an nana, ñan jab kebojak kin jabdewõt iair kinke kwojjab maroñ kamaat aolep. Jen men in, kwon lale ewi joñan eo kwomaroñ keboji, im en let am kebojak kaki. Kwon kõmmane ilo kajjojo week. Tokelik, kate yuk ñan kalaplok schedule in katak eo am ñan kobaik kwelok ko jet.”
11 Ñe emõkaj an family ko tõkeãktok ñan kwelok ko, men in ej jibañ ir ñan bõk juõn lemnak ejimwe ñan kaibujuij Jehovah im ñan bõk tokjen jen nan in jiroñ ko ej litoki. Ewõr ke manit in ibben family eo am? Ej aikwij karõk ko remõn im jibañ jen aolep ro ilo family eo. Elañe emakijkij am lo bwe family eo am ej aikwij kakaiuriur im ewõr air inebata ilo boñin kwelok ko, kwomaroñ ke kõmman oktak ko ilo schedule eo am? Ewõr ke men ko kom maroñ kõmmani lok iman? Elañe juõn uan family eo ej aikwij kõmman elõñ men ko, ro jet remaroñ ke jibañ? Enaj kar kadiklok ke inebata elañe ear mõkajlok an aolep bojak ñan etal ñan kwelok eo jejjo minute ko lok iman? Karõk ko remõn rej kowõnmanlok jitõb in ainemõn ilo family eo im ilo congregation eo jimor.—1 Kor. 14:33, 40.
12 Jerbal in Kwalok Nan: Karõk ien ko ñan bõk kunair ilo jerbal in kwalok nan ej bar juõn mõttan in juõn manit emõn kin men ko lor jitõb. Juõn likao etan Jayson ej kememej: “Ilo family eo aõ, jibboñ in Saturday ien otemjej kar karõke kin jerbal in kwalok nan. Men in ear emõn ñan iõ kinke ilo an laplok aõ bõk kunaõ ilo jerbal in kwalok nan, ear laplok aõ lo emõn eo ij kõtõbrake im ear laplok aõ lañliñ kake.” Elõñ ro me rar rittolok ilo family ko an Ri Kennan ro ear eindein air lo bwe ilo an kar wõr ibbeir juõn ien eo kar karõke ñan kwalok nan kajjojo week men in ear jibañ ir ñan kõmman wõnmanlok einwõt Ri Christian ri karejar ro.
13 Juõn manit ekwon emaroñ bareinwõt jibañ ñan kõmman bwe ien eo family eo am ej kajerbale ilo jerbal in kwalok nan en laplok an kalañliñ im wõr tõbrak. Ewi wãwen an maroñ tõbrak men in? July 1, 1999, Watchtower ilo kajin English (10/1/99 Imõniaroñroñ), ilo peij 21, ear kõmman nan in rejañ in: “Jet ien kwoj kajerbal ke ien am katak ibben family eo ñan jibañ ro uan family eo ñan kebojak kin jerbal in kwalok nan ilo week eo? Elañe kwoj kõmmane emaroñ bõktok tokjen ko relap. (2 Timote 2:15) Emaroñ jibañ ñan kõmman bwe jerbal eo air en wõr melelen im keie. Jet ien, kwomaroñ karõk bwe aolepen juõn ien katak en ñan kebojak rot in. Ilo emakijkij, kwomaroñ jerbale wãwen ko kin kwalok nan ilo bwebwenato ko rekadu lok ilo tu-jemlokin katak in family eo ak ilo bar juõn ien ilo week eo.” Family eo am enañin kajeoñ ke in kõmmane men in?
14 Etal Wõt im Kõmman Wõnmanlok: Jen katak in, kwar lo ke wãwen ko ear emõn an family eo am jerbali? Nebar ir, im kajeoñ in kalek ion men kein. Elañe kwoj lo wãwen ko komij aikwij kakõmanmanloki, kãlet juõn ak ruo men ko kom maroñ jerbali mokta. Ñe men kein rej erom einwõt mõttan manit eo am kin men ko lor jitõb, inem jerbale juõn ak ruo men ko jet. Kwon bõk juõn lemnak emõn im kõmmanwa. (Pil. 4:4, 5) Jej aikwij lukkun kate kij ñan kajutak juõn manit emõn kin men ko lor jitõb, ak elap an wõr tokjen, bwe Jehovah ej kamol ñan kij: “Ñan eo ej jerbal ekkar ñan juõn lajrak ekwon, I naj kõmman bwe en lo lomor an Anij.”—Sam 50:23, NW.