Jehovah Ej Ad Jikin Kone
“Kinke kwar ba: ‘Jehovah ej aõ jikin kone,’ . . .ejelok jorrãn enaj walok ñan yuk.”—PSALM 91:9, 10, NW.
1. Etke jemaroñ ba bwe Jehovah ej jikin kone eo ad?
JEHOVAH ej juõn jikin kone emol ñan armij ro an. Elañe jej ajelok aolepen ad ñan e, jemaroñ ‘bõk ekkeen ilo jabdewõt wãwen, ak jeban kenak ellãlok jen ad maroñ makitkit; bwok, ak ejjab bwe ejelok ialin deod; matõrtõr, ak jejjab make iad im jaje jen et; jolallok, ak jejjab jako.’ Etke? Kinke Jehovah ej letok ñan kij “kajur eo ellãlok jen joñan ekkar.” (2 Corinthians 4:7-9, NW) Aet, Jemed ilañ ej jibañ kij ñan ad jibadõk juõn mour ekkar ñan Anij, im jemaroñ bõk ñan buruõd nan ko an ri jeje sam: “Kinke kwar ba: ‘Jehovah ej aõ jikin kone,’ kwar kõmman Eo Eutiej Tata make jikin am jokwe; ejelok jorrãn enaj buñõt yuk.”—Psalm 91:9, 10, NW.
2. Ta eo jemaroñ ba kake kin Sam 91 im ta eo ej kallimur kake?
2 Nan ko ilo Sam 91 emaroñ kar Moses eo ear jei. Juõn ennan ilo jeje ej naetan e make einwõt eo ear je Sam eo kein ka 90, im ilokantok 91 Sam ilo an ennan eo jab kwalok kin bar juõn ri jeje. Bõlen Sam 91 ear ukoktak al kake; einwõt ba, juõn armij emaroñ kar al mokta kin (91:1, 2), ibben juõn jar in ri al ro rej uak (91:3-8). Jeltokin remaroñ kar roñ ainikien juõn ri al (91:9a) im kar uake jen juõn kumi (91:9b-13). Inem juõn ri al emaroñ kar al nan ko eliktata (91:14-16). Ilo jabdewõt wãwen jekdon elañe ri jeje sam ear al ilo wãwen in, 91 Sam ej kallimur kin jokane eo ilo jitõb ñan Christian ri kabit ro einwõt juõn jar in armij eo ej letok menin kamol eo einlok wõt ñan armij ro rejetair emwij air wujleplok ñan Anij einwõt juõn jar in armij.a Jen lale sam in jen wãwen eo an ri karejar ro einwõt rein don Jehovah.
Jokane ilo ‘Jikin eo Ettino An Anij’
3. (a) Ta eo ej “jikin etino an Eo eutiejtata”? (b) Ta eo jej loe ilo ad “jokwe iumin lurin Eo eutiejtata”?
3 Ri jeje sam ear al: “Eo ej jokwe ilo jikin etino an Eo eutiejtata, e naj berwõt iomin lurin Eo dri kajur otem kajur. I naj ba kin Jeova e aõ likepijñõk im aõ me; aõ Anij, I naj liki E.” (Sam 91:1, 2) “Jikin etino eo an Eo eutiejtata” ej juõn jikin ilo nan in kõkkar ñan kejbãrok kij, im elaptata ñan ri kabit ro, ro rej kein kajjiroro an Devil eo. (Reveles̃õn 12:15-17) E naj kar jolok kij otemjej elañe ear jab kejbãrok eo jej lañliñ kake einwõt ro rej jokwe ibben Anij einwõt ri lotok ro an ilo jitõb. Ikijen “ad jokwe iumin lurin Eo Ekajur Tata,” jej lo lurin kejbãrok eo an Anij, ak ellor. (Sam 15:1, 2; 121:5) Ejelok bar juõn jikin kone emõnlok ak kajurlok jen Iroij Bõtata eo ad, Jehovah.—Jabõn Kennan Ko 18:10.
4. Ta menin kamadmõd ko “ri aluk in bao eo,” Satan, ej kajerbali, im ewi wãwen ad ko?
4 Ri jeje Sam ej kobaiktok: “Bwe [ Jehovah] E naj kõtlok yuk jen aluk an dri ane, im jen mij eo enana.” (Sam 91:3) Juõn ri ane ilo Israel eo etto ekkã an jibwe bao ko kin jen ko ak allok ko. Ibwiljin jen ko an “dri ane eo,” Satan, ej dolul eo an enana im “kõmman “etao ko.” (Dri Epesõs 6:11, footnote) Allok ko rittino rej likiti ilo ial eo ad ñan iunlok kij ñan nana im kõmman jorrãn ñan mour in jitõb eo ad. (Sam 142:3) Bõtab, kinke emwij ad karmijeteik jab wãnik, ‘jitõb eo ad ej einwõt juõn bao eo emwij an ko jen allok eo.’ (Sam 124:7, 8) Elap ad kamolol bwe Jehovah ej kõtlok kij jen “dri ane” eo enana!—Matu 6:13.
5, 6. Ta “nañinmij eo” ear kõmman “jorrãn ko,” ak etke armij ro an Jehovah rejjab ajelok ir ñane?
5 Ri Jeje Sam ej jitõñlok ñan “nañinmij eo ej kõmman jorrãn ko.” Einwõt juõn eo ekabobo, ewõr juõn men eo ej kõmman “jorrãn ko” ñan family eo an armij im ñan ro rej jurake kajur bõtata eo an Jehovah. Ilo wãwen in, ri bwebwenato eo Arnold Toynbee ear je: “Jen jemlokin Bata eo an Lal Kein Ka II mour in ailiñ emwij an lõñlok ruo alen kajur ko an ailiñ ko ilo air jenolok lok iair . . . Lemnak eo an armij ilo tõre in ej laplok wõt an jebellok.”
6 Ilo ebeben ko mantak, ewõr jet kien ko rar kalaplok jorrãn im bwoktak ko ikõtan ailiñ ko ñan don. Rar bareinwõt kajitõk bwe kile im kautiej en ilok ñan ir ak ñan elõñ kajjo ekjap ko im annañ ko. Ak Jehovah ejañin kar kõtlok an armij ro an retiljek ajelok ir ñan juõn “nañinmij” einwõt in. (Daniel 3:1, 2, 20-27; 6:7-10, 16-22, NW) Einwõt juõn yokwe in jimjãn jimjatin ro ibelakin lal, jej lelok ñan Jehovah tiljek eo ej make wõt, debij wõt iolaplap eo ad ilo jitõb, im jelãlokjen eo ejelok kalijeklok ie bwe “ilo ailiñ otemjej eo ej mijõk E [Anij] im jerbale kwojarjar, ej kabuñburuen.” (Jerbal 10:34, 35; Exodus 20:4-6; Jon 13:34, 35; 17:16; 1 Piter 5:8, 9) Meñe jej eñtan kin “jorrãn ko” ilo wãwen matõrtõr einwõt Christian, jej lañliñ im jokane ilo jitõb “ilo jikin eo ettino an eo Eutiej Tata.”
7. Ewi wãwen an Jehovah kejbãrok kij “kin pein bao ko pein”?
7 Ke Jehovah ej einwõt jikin kone eo ad, jej bõk kainemõn jen nan kein: “E naj kalibubu yuk kin kol ko kolõn bao im iomin pein kwo naj lo ainemõn; mol eo An e naj am likepijñõk im ken tõrak.” (Sam 91:4) Anij ej kejbãrok kij, einwõt juõn bao ej kejbãrok bao jidik ko nejin. (Aiseia 31:5) ‘Kin pã ko pein ej binej an men ko kebaktok kij.’ Kin pã ko pein juõn bao ej kalibubu kon ko nejin, kejbãrok ir jen men ko rej abãde ir. Einwõt bao ko redik rej kab jino iten ekkãke, jej bõk kejbãrok iomin pã ko ilo nan in kõkkar pein Jehovah kinke emwij ad bõk ad jikin kone ilo dolul eo emol an Christian.—Rut 2:12; Sam 5:1, 11.
8. Ewi wãwen “mol” eo an Jehovah ej juõn likepijñak im kein tõrak?
8 Jej liki ilo “mol,” ak tõmak. Einwõt juõn likepijñak elap in ien ko etto, ekkã an einwõt jekjekin kejam im ebwe an lap ñan an kalibubu aolepen enbwinin juõn armij. (Sam 5:12) Liki ilo kain kejbãrok rot in ej kanemkwoj kij jen mijak. (Jenesis 15:1; Sam 84:11) Einwõt tõmak eo ad, mol eo an Anij ej juõn likepijñak elap in kejbãrok eo ej kabõjrak made kijeek ko an Satan im jolok tarinae ko an ri kijirãt. (Dri Epesõs 6:16) Ej bareinwõt juõn jikin katõrak, juõn jikin tõrak ak jojomar ekajur eo jej jutak ilo mejojo ilikin.
‘Jejamin Mijak’
9. Etke boñ emaroñ juõn ien kakõrmol ekamijak, ak etke jejjab mijak?
9 Kin kejbãrok eo an Anij, ri jeje sam ej ba: “Kwo jamin mijõk kin men in kalelñoñ ilo boñ, ak kin mõri ej kãki ilo ran, ak kin mij eo ej etetal ilo marok, ak kokkure ej jerbal ke e loliñ al.” (Sam 91:5, 6) Ke elõñ jerbal nana ko rej kõmmani iumin marok, boñ emaroñ juõn ien kakõrmol ekamijak. Iolaplapin marok eo ilo jitõb eo ej kiõ kalibubu lal in, ri kijirãt ro ad ekkã air oktaklok ñan kõmman ko retao ilo juõn jibadbad ñan kokkure kamolol eo ad im ad kõnan wõt kõmmani men ko ilo jitõb im kabõjrak jerbal in kwalok nan eo ad. Ak ‘jejjab mijak jabdewõt menin kalelñoñ ko ilo boñ’ kinke Jehovah ej lale kij.—Sam 64:1, 2; 121:4; Aiseia 60:2.
10. (a) Ta eo “mõri eo ej kãki ilo ran” ej einlok wõt melelen, im ewi wãwen ad emmakit ñane? (b) Ta eo ej einwõt “nañinmij eo ej etetal ilo marok,” im etke jejjab mijake?
10 “Mõri eo ej kãki ilo ran” ej einwõt ñan tarinae. (Sam 64:3-5; 94:20) Ke jej niknik ilo ad kwalok melele eo emol, menin ke ej kabellok jumae eo ñan jerbal eo ad ekwojarjar ej kamol an men wan. Bareinwõt, jejjab mijak “nañinmij eo ej etetal ilo marok.” Menin ej juõn nañinmij ej walok lõñtak ilo nan in kõkkar kin nañinmij in mour erreo im kabuñ eo an lalin eo ej bed ilo kajur eo an Satan. (1 Jon 5:19) Ej kwalok juõn wãwen lemnak im buru eo emij, likit armij ro ilo marok ikijen Jehovah, karõk ko an, im menin letok ko in yokwe eo an. (1 Timote 6:4) Ilo iolaplapin marok in, jejjab mijak, ke jej lañliñ kin meram in jitõb eo elap.—Sam 43:3.
11. Ta eo ej walok ñan ro rej loe ‘menin kokkure eo ke ej lolõñ al’?
11 “Kokkure ej jerbal ke e loliñ al” ejjab kalelñoñ kij bareinwõt. “Loliñ al” emaroñ kalikar melele eo kin lal in. Ro rej lelok ir ñan lemnak ko kin mweiuk rej eñtan kin jorrãn eo ilo jitõb. (1 Timote 6:20, 21) Ke jej beran in keañ kin ennan eo an Ailiñ eo, jejjab mijak jabdewõt ri kijirãt ro ad, bwe Jehovah ej Ri Kejbãrok eo ad.—Sam 64:1; Jabõn Kennan Ko 3:25, 26.
12. Ilo bed eo an wõn eo thousand rej “buñ,” im ilo wãwen et eo?
12 Ri jeje sam ej etal wõt: “Juõn tausan re naj buñ iturõm, im joñoul tausan i anbijmaroñõm, a e jamin kebak ñõn kwe. Kin mejõm wõt kwo naj lale im lo nawõnan eo dri nana.” (Sam 91:7, 8) Kinke rej likjap in kõmman bwe Jehovah en air jikin kone, elõñ rej “buñ” im mij ilo jitõb “iturõm.” Ilo an jelet ir, “joñoul tausan” rar buñ ianbwijmaroñ in Ri Israel ro ilo jitõb rainin. (Dri Galetia 6:16) Ak meñe kij jej Christian ri kabit ro ak ro rejetair emwij air wujleplok, jej jokane ilo “jikin eo etino” an Anij.” Jej baj ‘lalelok wõt im lo nawõnan eo an dri nana,’ ro rej madmõd jorrãn ilo jerbal in business, kabuñ im wãwen ko jet.—Dri Galetia 6:7.
‘Ejelok Jorrãn Enaj Buñõt Kij’
13. Ta jorrãn ko rej buñõt kij, im etke?
13 Meñe jokane eo an lal in ej rup mejaljallok, jej likit Anij mokta iman im bõk kakajur jen nan kein an ri jeje sam: “Bwe Kwe O Jeova aõ likepijñõk. Kw’ar kõmõn Eo eujtiejtata bwe En mweo imõm; ejelok nana e naj iwij iom, ak ejelok men in kokkure naj kebak ñõn mweo imõm.” (Sam 91:9, 10) Aet, Jehovah ej ad likepijñõk. Bõtab, jej bareinwõt kõmman Anij Eo Eutiejtata ‘ad jikin jokwe,’ ijo jej lo ejelok kauwatata ie. Jej tũplotake Jehovah einwõt Kajur bõtata eo Ijoko otemjelok, ‘jokwe’ ilo e einwõt Unjen jokane eo ad, im keañ kin news eo emõn kin Ailiñ eo an. (Matu 24:14) Kin menin, ‘ejelok jorrãn enaj buñõt kij’—ejelok jorrãn ko kar kwaloklok iman ilo sam in. Meñe jej bõk kunad ibben ro jet ilo kain jorrãn kein einwõt makitkit lal, aire ko, ibwijleplep ko, ñitta ko, im jorrãn ko jen kõmman tarinae, men kein rejjab kokkure tõmak eo ad ak jokane eo ad ilo jitõb.
14. Einwõt ro ri karejaran Jehovah, etke jejjab bõk nañinmij in mij eo?
14 Christian ri kabit ro rej einwõt armij in ruwamaejet ro rej jokwe ilo em nuknuk ko rejenolok jen jukjuk im bed in. (1 Piter 2:11) ‘Ejelok meñe juõn nañinmij ej ebaklok em nuknuk eo air.’ Meñe kejatdikdik eo ad ej ñan lañ ak lal, jejjab mõttan lal, jejjab bo ilo nañinmij kabobo eo ilo jitõb einwõt mour in lũñ, arõk mweiuk, kabuñ wan, im kabuñ in “kiru awia eo” im “ekjap,” eo United Nations.—Reveles̃õn 9:20, 21; 13:1-18; Jon 17:16.
15. Ilo wãwen et ko jej lañliñ kin jibañ eo an enjel?
15 Ikijen kejbãrok eo jej lañliñ kake, ri jeje sam ej kobaiktok: “Bwe E [Jehovah] E naj jiroñ enjel ro An kin Kwe, bwe ren kejbãrok yuk ilo ial ko am otemjej. Re naj baur yuk ilo peir bwe kwon jab itak neõm ilo dreka.” (Sam 91:11, 12) Emwij lelok kajur ñan enjel ro bwe ren kejbãrok kij. (2 Kiñ Ro 6:17; Sam 34:7-9; 104:4; Matu 26:53; Luk 1:19) Rej kejbãrok kij ‘ilo ial ko ad otemjej.’ (Matu 18:10) Jej lañliñ kin tel im kejbãrok eo an enjel ke jej ri keañ ro an Ailiñ eo im jejjab tipjek ilo jitõb. (Reveles̃õn 14:6, 7) Meñe ‘dekã ko’ einwõt mo ko nae jerbal eo ad rejjab kõmman menin ad tipjek im luji juburu eo an Anij.
16. Ewi wãwen tarinae ko juõn “laiõn emõn ridtõn” ej kõmmani im juõn “adder” eoktak, im ewi wãwen ad emmakit ñan men kein?
16 Ri jeje sam ej wõnmanlok wõt: “Kwo naj juri laiõn im adder, laiõn emõn ridtõn im serpent kwo naj juri iomin neõm.” (Sam 91:13) Einwõt juõn laiõn edik ej kõmmane juõn bellok, tarinae eo iman, jet ian ri kijirãt ro ad rej kalikar kabellok in jumae eo air ilo air kõmmani kien ko rej jeknalemeir ñan kabõjrak jerbal in kwalok nan eo ad. Ak ijellokin tarinae ko iman tarinae ko ejelok kar kõtmene kaki rej einwõt juõn adder eo ej kenabõjtak jen juõn jikin tilekek im ire men kein rej bareinwõt kõmmani ñan kij. Ilo air tilekek ilo jikin rot in, ri tel in kabuñ ko jet ien rej tarinaik kij ikijen ri kõmman kien ro, ri ekajet ro, im ro jet. Ak ilo jurake eo an Jehovah, jej bukõt kajimwe ilo jikin ekajet ko ilo ainemõn, im ilo wãwen in ‘jojomar im ilo jejjet in kien ejaake news eo emõn.’—Dri Pilippai 1:7; Sam 94:14, 20-22.
17. Ewi wãwen ad “juri “laiõn eo emõn ridtõn”?
17 Ri jeje sam ej konono kin juri “laiõn emõn ridtõn im serpent eo ekilep.” Juõn laion emõn ridtõn emaroñ lej, im juõn serpent ekilep emaroñ juõn alligator kileplep. (Aiseia 31:4) Jekdon ewi joñan an luuj laion eo emõn dettan ñe ej kõmmane juõn tarinae iman, ak, jej ilo nan in kõkkar juri ilo ad bokake Anij im jab armij ro rej einwõt laiõn ak dolul ko. (Jerbal 5:29) Inem “laion” eo einwõt ekauwatata ejjab kõmman ad kinejnej ilo jitõb.
18. “Serpent eo ekilep” emaroñ kakememej kij kin wõn eo, im ta eo jej aikwij kõmmane elañe rej tarinaik kij?
18 Ilo Greek Septuagint, “serpent eo ekilep” rej naetan “juõn dragon.” Menin emaroñ emõn an kakememej kij kin “drakon eo elap . . . , serpent eo jinoin, eo kar naetan Devil im Satan.” (Reveles̃õn 12:7-9; Jenesis 3:15) E ej einwõt juõn alligator ekilep im kamijak eo ej maroñ kabedakilkil im warõñlok menin mour eo ej abãde. (Jeremiah 51:34, NW) Ñe Satan ej kajeoñ in alloke kij, kabedakilkil kij kin ijjibed ko an lal in, im warõñlok kij, jen kõrõlok kij jen kamakoko eo an im juri “serpent in ekilep.” (1 Piter 5:8) Bwen ri kabit ro rej aikwij kõmmane menin ñan air bõk kunair ilo jejjet in kitien Dri Rom 16:20.
Jehovah—Ad Unjen Lomor
19. Etke jej ko ilo jikin kone eo an Jehovah?
19 Ikijen kabuñ eo emol, ri jeje sam ej binej jenkwon Anij einwõt an ba: “Bwe e ar likit an yokwe Ioõ, inem I naj kõtlok e; I naj koutiej e bwe e ar jela eta.” (Sam 91:14) Jej bõk ad jikin kone ilo Jehovah einwõt ri kabuñ ro an elaptata kinke ‘emwij ad likit yokwe eo ad ilo e.’ (Mark 12:29, 30; 1 Jon 4:19) Ilo oktan, Anij ‘ej letok ñan kij ialin ko’ jen ri kijirãt ro ad. Jejamin jako jen lal in. Ak, jenaj bõk lomor kinke jejelã kin ãt eo ekwojarjar etan Anij im jej kiri ilo tõmak. (Dri Rom 10:11-13) Im emwij ad beek ñan ad ‘etetal ilo etan Jehovah ñan indio.’—Micah 4:5, NW; Aiseia 43:10-12.
20. Einwõt an Sam 91 kajemlok, ta eo Jehovah ej kallimur kake ñan ro ri karejaran retiljek?
20 Einwõt an ri jeje sam kajemloke, Jehovah ej ba kin ri karejar ro an retiljek: “E naj kir ñõn iõ im I naj uak e, I naj ber iben ilo jorran: I naj kõtlok im koutiej e. I naj kamat e kin mour e aitok, im kwalok ñõn e Aõ lomor.” (Sam 91:15, 16) Ñe jej kir Anij ilo jar ekkar ñan ankilan, ej uak kij. (1 Jon 5:13-15) Ededelok ad ellãlok jen elap jorrãn kin wõt lej eo Satan ej jarõke. Ak nan kein “I naj bed ibbam ilo jorran” rej keboj kij ñan melejoñ ko im kamol ñan kij bwe Anij enaj kejbãrok kij ñe enaj jako jukjuk im bed in enana.
21. Ewi wãwen ri kabit ro ededelok kaibujuij ir?
21 Meñe elap an Satan jumae, dedelok eo an ri kabit ro ibwiljid naj kaibujuije ilañ ilo ien eo ejejjet an Jehovah—elikin juõn “aetokan ran ko” ion lal. Ak, kõtlok eo einjuõn an Anij ededelok an bõktok aibujuij eo ilo jitõb ñan ri kabit ro. Im rej bõk nebar ilo air tel einwõt Ri Kennan ro an Jehovah ion lal ilo ran kein eliktata! (Aiseia 43:10-12) Kõtlok eo elaptata an Jehovah kin armij ro an enaj walok ilo ien tarinae eo an elap Armageddon ñe ej kalikar kajur bõtata eo an im kaibujuij ãt eo etan ekwojarjar.—Sam 83:18; Ezekiel 38:23, NW; Reveles̃õn 16:14, 16.
22. Wõn enaj ‘lo lomor jen Jehovah’?
22 Elañe jej Christian ri kabit ro ak ro rejetair emwij air wujleplok, jej reilok ñan Anij ñan lomor. Ilo ien eo “ran eo elap im kakõrmol eo ekamijak an Jehovah,” ro rej tiljek ilo air karejar ñan Anij renaj bõk lomor. (Joel 2:30-32, NW) Ro iad im renaj ejaake “jar eo elap” in ro rar ellã im mour ñan loan lal eo ekãl an Anij im ro rej bed wõt im tiljek ilo juõn ien melejoñ eo eliktata enaj ‘juburueir ibben kin aetokin ran ko’—mour eo ejelok jemlokin. E naj bareinwõt kajerkakbijeik jarlepju in armij ro. (Reveles̃õn 7:9; 20:7-15) Jehovah enaj lap an mõnõnõ ilo an ‘kõmman lomor ñan kij’ ikijen Jesus Christ. (Sam 3:8) Kin jerammõn rot kein relap rebed imad, jen reilok wõt ñan Anij ñan jeban ilo bwini ran ko ad ñan aibujuij eo an. Ilo nan ko im jerbal ko ad, jen etal wõt im kamol bwe Jehovah ej jikin kone eo ad.
[Kamelele ko itulal]
a Ri jeje ro an Jeje ko in Christian Greek rar jab konono Sam 91 jen wãwen eo ilo kanan eo kin Messiah eo. Bwebõta, Jehovah kar juõn jikin kone im juõn me ekajur ñan armij eo Jesus Christ, meñe einwõt E ñan ri kabit ri kalor ro an Jesus im ro rejetair emwij air wujleplok einwõt juõn jar in armij ilo ien in “Ien jemlokin.”—Daniel 12:4, NW.
Ewi Wãwen Am Naj Kar Uak?
• Ta eo ej “jikin eo etino an eo Eutiej Tata”?
• Etke jejjab mijak?
• Ewi wãwen bwe ‘ejelok jorrãn enaj buñõt kij’?
• Etke jemaroñ ba bwe Jehovah ej unjen lomor eo ad?
[Pija eo ilo peij 15]
Kwo jelã ke ewi wãwen mol eo an Jehovah juõn jikin likepijñak elap ñan kij?
[Pija ko ilo peij 16]
Jehovah ej jibañ ro ri karejaran ñan kõmmane jerbal in kwalok nan eo air meñe ewõr tarinae ko ejelok kar kõtmene kaki im jumae eo ebellok
[Etan eo ej kõmman]
Cobra: A. N. Jagannatha Rao, Trustee, Madras Snake Park Trust