Kajitõk ko Jen Ro Rej Read
Jehovah ear kõtlok polygamy (elõñlok jen juõn belen) ibwiljin ri karejar ro an ilo ien ko etto, Ri Israel ro, ak ejjab kamelimi kiõ. Kien eo an emaroñ ke oktak?
Ejañin oktak lemnak eo an Jehovah kin polygamy. (Sam 19:7; Malachi 3:6, NW) Ear jab mõttan karõk eo an ñan armij ro ilo jinoin, im ejjab karõk eo an kiõ. Ke ear kõmanman Eve einwõt lio belen Adam, Jehovah ear ba bwe kien ekwojarjar kar bwe en wõr juõn wõt lio belele ñan juõn leo belele. “Kin men in leo e naj likit jemen im jinen, im edrep na iben lio belen: im irro naj juõn wõt kõniek.”—Jenesis 2:24.
Ke Jesus Christ ear bed ion lal, ear eliji kien in ke ear uake ro rar kajitõk kin jebel im bar mare. Ear ba: “Kom ar jab konono ilo buk, Eo e ar kõmõn ir ke ejino, E ar kõmõn ir man im kõra, im ba, Kin men in man e naj likit jemen im jinen, im e naj ber iben lio belen: im irro re naj juõn wõt kõniek ke? Kin men eo irro re jab ruo, a juõn wõt kõniek.” Jesus ear koba: “Jabrewõt eo e naj jolok lio belen, elañe e jab kin lũñ, im e naj belek bar juõn, ej lũñ: im eo ej beleik lio ar jolok e ej lũñ.” (Matu 19:4-6, 9) Jen men in ej alikar bwe ñe juõn armij ewõr ruo ak elõñlok limaro belen ej bareinwõt lũñ.
Inem etke kar kõtlok bwe ren bõk elõñlok jen juõn beleir ilo ien ko etto? Kememej bwe ejjab Jehovah eo ear kajutak manit in. Armij eo moktata me Bible eo ej konono kake bwe ear lõñlok jen juõn belen kar Lamech, jen bwijjin Cain. (Jenesis 4:19-24) Ke Jehovah ear bõktok Ibwijleplep eo ilo ran ko an Noah, Noah im lõmaro jilu nejin rar kajjo beleir. Aolep ro ear wõr elõñlok jen juõn beleir kar kokkure ir ilo Ibwijleplep eo.
Elõñ buki yiõ ko tokelik ke Jehovah ear kãlet Ri Israel ro einwõt armij ro an, polygamy ededelok an kar juõn manit ibbeir, meñe ear laplok an ekkã bwe ewõr juõn wõt lio belen lõmaro. Anij ear jab kõtlok bwe family ko ren jebel ke ear lõñlok jen juõn belen. Jen an eindein, Anij ear lap an kakiene manit in.—Exodus 21:10, 11; Duteronomi 21:15-17.
Bwe kijenmij eo an kin polygamy en kar ñan jidik wõt ien ealikar jab kin ta eo Jesus ear ba ikijen kien eo jinoin an Anij kin belele wõt ak bareinwõt kin ta eo ri jilek Paul ear je iumin kakõrmol an jitõb kwojarjar eo an Anij. Ear ba: “Jabrewõt eman en iben lio belen, im jabrewõt kõra en iben leo belen.” (1 Dri Korint 7:2) Kar bareinwõt kakõrmole Paul ñan je bwe jabdewõt emaan kar jitõñ e einwõt overseer ak ministerial servant ilo congregation eo “en juõn wõt belen.”—1 Timote 3:2, 12; Taitõs 1:6.
Kin men in, kijenmij eo an Jehovah kin polygamy ear jemlok ke ear ejaak congregation eo an Christian enañin 2,000 yiõ ko remotlok. Ilo ien eo, kien eo kin belele ear jeblak ñan wãwen eo kar ilo jinoin ke Anij ear kõmanman maan im kõrã: juõn leo belen, juõn lio belen. Eñin kien eo rainin ibwiljin armij ro an Anij ibelakin lal.—Mark 10:11, 12; 1 Dri Korint 6:9, 10.