“Ruo Armij Rar Kallallal Imweo Imam”

“EMOTLOK ruo yiõ ko jen ke kim ar iion buromõj elap kin mij eo an ledik eo nejim.” Eindein kar jinoin juõn letter ilo newspaper eo Le Progrès, kõmmane ilo Saint-Étienne, France.

“Mélissa ear jilu alliñ dettan im ear eñtan kin nañinmij eo elukkun nana trisomy 18. Juõn armij eo ej iion jerata rot in ejjab jimwe kin an nañinmij im mij nejin, wãwen mour eo an ejamin bar einwõt mokta. Meñe kim ar rittolok ilo tõmak in Catholic, kim ar ien otemjej bõk lemnak in ‘Anij, elañe kwoj bed, etke kwoj kõtlok bwe men rot kein ren walok?’ ” Alikar, jinen eo ear jeje letter eo ear eñjake an ejelok an maroñ im lap an buromõj. Letter eo an ear wõnmanlok:

“Elikin an kar walok men kein, ruo armij rar kallallal ion kejam in mweo imam. Ilo mõkaj iar kile bwe rar Ri Kennan ro an Jehovah. Iar bojak in jilkinlok ir ilo joij, ak iar lo juõn brochure me rar leto-letake. Ear ikijen etke Anij ej kõtlok eñtan. Inem iar bebe in kadeloñ ir ñan kalikar bwe ebwid katak ko air. Iar lemnak bwe ikijen eñtan, family eo aõ ear lap an kar eñtan im kim mõk in roñ nan ko einwõt ‘Anij ear letok ledik eo ñan kim, im Anij ear bõk e.’ Ri Kennan ro rar bed aetoklok jen juõn awa. Rar roñjake ilo tiriamokake, im ke rar etal, joñan an emõnlok aõ mour iar errã bwe ren bar itok. Men in ear walok ruo yiõ ko remotlok. I jañin erom juõn ian Ri Kennan ro an Jehovah, ak iar jino katak Bible ibbeir, im ij bed ilo kwelok ko air joñan wõt aõ maroñ.”