Ta in Ailiñ in Anij

KAR ta unin tel in jerbal in kwalok nan eo an Jesus? Ekkar ñan Jesus make, kar Ailiñ eo an Anij. (Luk 4:​43) Ke armij ro rar roñjake an konono, ekkã air roñ kin Ailiñ eo. Rar bwok ke? Rar kajitõk ke ibben kin ta in Ailiñ eo? Jaab. Book in Gospel ko rar kwalok bwe rar jab kajitõk kake. Inem armij ro ilo ien eo rar melele ke kin ta in Ailiñ in Anij?

Ilo mol, Jeje ko me Ri Jew ro rar watõk rekwojarjar, rar kamelele kin Ailiñ eo, ilo tibdikin im ilo nan ko ralikar kin ta in Ailiñ eo im ta eo enaj kõtõbrake. Rainin, jemaroñ kalaplok ad jelã kin Ailiñ eo ilo ejja wãwen eo wõt​​—ilo ad etale Bible eo. Jen etale jiljilimjuõn katak ko remol me Bible eo ej katakin kij kake kin Ailiñ eo. Ri Jew ro ilo ran ko an Jesus im ilo ran ko mokta rar maroñ readi jilu ian katak kein jinoin. Bar jilu iair Christ ak ri jilek ro an rar kwaloki ilo ebeben eo kein kajuõn. Mol eo eliktata ej walok ilo ran kein ad.

1. Ailiñ in Anij ej juõn lukkun kien ak government, im enaj bedwõt ñan indio. Nan in kanan eo kein kajuõn ilo Bible eo ear kwalok bwe Anij enaj kar jilkintok juõn ñan an lomoren armij ro retiljek. Kar naetan “ine” eo, im E in enaj kar kamadmõde aolep abañ ko me ri jumae ro, Adam, Eve, im Satan rar bõktoki. (Jenesis 3:​15) Tokelik, kar jiroñ King David eo tiljek kin juõn men ekabwilõñlõñ kin “ine” in, ak Messiah eo. Enaj kar iroij ion Ailiñ eo. Kien in enaj kar oktak jen kien ko jet. Enaj bedwõt ñan indio.​​—2 Samuel 7:​12-14.

2. Ailiñ in Anij enaj kokkure aolep ailiñ ko otemjej an armij. Ri kanan Daniel ear lo juõn vision kin juõn lelkan in ailiñ ko rekajur ion lal, me ej wõnmanlok jen ien ko etto mantak ñan ran kein ad. Lale kin jemlokin vision eo: “Ilo ien an king rein iroij, Anij in lõñ enaj kajutak juõn ailiñ eo ejamin jebeblok, ak enaj kejebeblok aoleben ailiñ ko jet, im enaj bed ñõn indrio.” Inem aolep kien ko, ak government ko an lal in​​—ekoba tarinae ko air, iroij ro air relej, im nana ko rej kõmmani​​—renaj jako ñan indio. Einwõt an nan in kanan ko an Daniel kwalok, mõttan wõt jidik im Ailiñ eo an Anij enaj iroij ion aolepen lal. (Daniel 2:​44, 45) Ailiñ in ejjab juõn kien emol wõt, ak ej kien eo wõt enaj bed ñan indio.a

3. Ailiñ in Anij enaj kajemlok tarinae ko, nañinmij, ñitta, im mij. Kanan ko rekabwilõñlõñ ilo Bible eo rej kwalok kin ta eo Ailiñ in Anij enaj kõmmane ion lal. Kien in enaj kõtõbrak men ko me ejelok juõn kien an armij emaroñ ak enaj kõtõbraki. Baj lemnak mõk​​—kein tarinae ko otemjej renaj jako ñan indio! “Ej kejemlok tõrinae ko ñõn jemlokõn lõl.” (Sam 46:9) Naj ejelok doctor ro, hospital ko, ak jabdewõt kain nañinmij. “Inem dri jokwe ie e jamin ba, I nañinmij: naj jolok bwir an ro dri jokwe iloan.” (Aiseia 33:​24) Naj ejelok ñitta, jabwe mõñã, ak kwuli. “E naj lõñ korn ilo ene ion jabõn tol ko.” (Sam 72:​16) Naj ejelok ilomij, emmij, uliej ko, jikin kakone ro remij ilo hospital, ak buromõj ko rej waloktok jen men kein. Ri kijirãt eo ad, mij, enaj jako indio. Anij enaj “warõñlok mij ñõn in drio; im Iroij Jeova e naj kõmraik dren in kemjalal jen mejeir otemjej.”​​—Aiseia 25:8.

4. Ewõr juõn Iroij in Ailiñ in Anij me Anij ear kãlete. Messiah eo ejjab kãlet e make, im ejjab jokãlet in armij ro rejjab wãppen. Jehovah Anij make ej kãlet e. Title kein Messiah im Christ rej kalikar men in. Nan kein ruo rej melelen “Eo Emwij Kabiti.” Inem Jehovah ear kãlet King in bwe en bõk juõn jerbal ejej uan. Anij ej ba kin e: “Lo, Aõ Dri Korijera, Eo Ij drebije; Aõ dri kãlet, im Aõ ej lõñliñ kake: emwij Aõ likit ion Jitõb eo Aõ; E naj kadrioijtok ekajet jime ñõn ro dri ailiñ ko.” (Aiseia 42:1; Matu 12:​17, 18) Ri Kõmanman eo ad wõt ejelã kin kain Iroij rot eo jej aikwiji!

5. Iroij eo an Ailiñ in Anij emwij an kamol iman armij otemjej bwe ej tellokin bõk jerbal in iroij. Jesus Ri Nazareth eo ear kamol bwe E eo ej Messiah eo kar kanan kake. Ear lotak ilo menmenbwij eo me Anij ear kãlete. (Jenesis 22:18; 1 Kronikel 17:11; Matu 1:1) Ke ear bed ion lal, ear kajejjet kitien elõñ nan in kanan ko kin Messiah eo rar jei elõñ ebeben ko lok iman. Bareinwõt kar kalikar jen lañ bwe ear Messiah eo. Ewi wãwen? Eokwe, Anij ear konono jen lañ, im kalikar bwe Messiah eo ear Nejin make; enjel ro rar kalikar bwe Jesus ear Messiah eo kar kanan kake; im Jesus ear kõmman elõñ menin bwilõñ ko​​—ekkã an kõmmani men kein iman mejen elõñ buki ak thousand armij ro​​—kin kajur eo jen Anij.b Elõñ alen Jesus ear kwalok kin naj kain Iroij rot e. Ear wõr ibben jab kajur eo wõt ñan jibañ armij ro ak bareinwõt ear kõnan jibañ ir. (Matu 8:​1-3) Ear jab kwalok jitõb in kibbon, ak ear tiriamokake, beran, im ettã buru. Bwebwenato eo kin mour eo an ion lal ej bed ilo Bible eo bwe aolep armij remaroñ readi.

6. Ilo Ailiñ in Anj ewõr 144,000 iroij ro mõttan Christ. Jesus ear ba bwe ro jet, ekoba ri jilek ro an, renaj iroij ilañ ibben. Ear naetan jar in “bwij erik.” (Luk 12:​32) Tokelik, ri jilek John ear kanan bwe oran bwij in edik enaj kar 144,000. Renaj bõk jerbal ko rekabwilõñlõñ ilañ, im iroij einwõt king ro im ilo ejja ien eo wõt jerbal einwõt priest ro ibben Christ.​​—Reveles̃õn 5:​9, 10; 14:​1, 3.

7. Ailiñ in Anij, eo ej iroij kiõ ilañ, ej bojak in jino iroij ion aolepen lal. Mol in eliktata ej men eo elaptata an kalañliñ. Bible eo eobrak kin men ko rej kamol bwe Anij ear jitõñ Jesus bwe en King ilo lañ. Ej iroij ijo kiõ, im mõttan jidik enaj kajededlok iroij eo an ibelakin lal im kajejjet kitien nan in kanan ko remõn emwij kwaloki ilo tu jinoin katak in. Ak ewi wãwen ad maroñ lukkun jelã bwe Ailiñ in Anij emwij an jino iroij? Im ñããt eo enaj jino iroij iaolepen lal?

[Kamelele ko itulal]