Juõn Kajitõk ej Walok Ibelakin Lal

LEMNAK mõk, elõñ buki million armij ro, ak emaroñ lõñlok jen ruo billion, rej kwalok ejja kajitõk in wõt. Armij rein rej kajitõk ibben eo ekajurtata ijoko otemjej ñan uake juõn kajitõk ealikar im jejjet. Ak, eiet wõt iair rej melele kin ta eo rej kajitõk kake. Emaroñ ke lukkun walok menin? Ilo mol, ej walok aolep ran. Ta eo armij rein rej kajitõk kake? Itok eo an Ailiñ in Anij!

Ekkar ñan air antonelok, ebake lok joñan in 37,000 kabuñ ko rej naetair Ri Christian, rej tõmak ilo Jesus Christ einwõt Ri Tel eo air. Ewõr elõñlok jen ruo billion armij ro rej uan kabuñ kein. Elõñ iair rej konono jar eo rej naetan Jar eo an Iroij. Kwo jelã ke jar in? Einwõt an kar Jesus katakin ri kalor ro an, ej jino ilo wãwen in: “Jememuij i lõñ, En kwojarjar Etõm. En itok Am ailiñ. Ren kõmõnmõn ankil Am einwõt i lõñ, bareinwõt ion lõl.”​​—Matu 6:​9, 10.

Iumin elõñ buki yiõ ko mantak ñan kiõ, ri kabuñ ro rej kautiej nan kein ilo air eliji ilo imõn jar ko air. Bareinwõt, kumi in family ko im armij ro kajjojo rej elijinmen nan ko ilo jar in, ilo ien ko remõn im nana. Im rej konono nan kein kin aolepen burueir. Elõñ ro jet rar katak jar in ilo air kiili im jar kake aolep ien ilo air jab lemnak kin melelen ak bõlen jidik wõt air melele kake. Kumi in kabuñ kein rewan me rej ba rej lor Christ ejjab ir wõt rar kejatdikdik im jar kin itok eo an Ailiñ eo an Anij.

Juõn Kajitõk Ej Bar Jelet Kabuñ ko Rejjab Christian

Juõn jar ebuñbuñ an Ri Jew ro ej jar in liãjlol eo naetan Kaddish (jar eo Ri Jew ro rej jar kake ran otemjej ilo imõn kabuñ eo air ak ien mij an ro rejitenburu ibbeir). Meñe ejjab lukkun konono kin mij ak buromõj, ekkã air kajerbale ilo ien kein. Jar eo ej kajitõk: “[Anij] en kajutak Ailiñ eo an ilo ien am mour . . .  ilo mõkaj.”a Bar juõn jar in etto rekin jar kake ilo imõn kabuñ eo ej konono kin kejatdikdik eo kin Ailiñ in Messiah eo ej jen mweo imõn David.

Ewõr ro rejjab Christian ri tõmak me rar itoklimo kin Ailiñ eo an Anij. Ekkar ñan The Times of India (juõn newspaper ilo India), juõn ri tel in kabuñ eo ebuñbuñ ilo India ilo ebeben eo kein ka 19, eo ear itoklimo in kaburukuk kabuñ ko an Hindu, Muslim, im Christian, ear ba: “Ailiñ eo emol an Anij ejamin walok mae ien ailiñ ko iturear im iturilik rej ibben don.” Juõn eo ej bõk jerbal eo eutiej ñan lolorjake college eo an Ri Islam ilo Strathfield, Australia, ej jeje ñan juõn newspaper: “Einwõt aolep Ri Muslim ro, ña ij tõmak [bwe] Jesus enaj jeblaktok im kajutak Ailiñ eo emol an Anij.”

Ejelok bere bwe, kiõ elõñ billion armij ro rej kejatdikdik im kajitõk kin Ailiñ eo an Anij. Ak lemnak kin juõn men ekaitoktoklimo.

Bõlen kwoj jelã bwe kim Ri Kennan ro an Jehovah, ro rej kõmmane magazine in, kimij niknik in itoitak jen em ñan em ilo jikin in am ñan bwebwenato ibben armij kin Bible eo. Ilo ien eo rar jeje magazine in, kimij kõmmane jerbal in ibelakin lal, ilo 236 ailiñ ko im ilo elõñlok jen 400 kajin ko. Unleplep in ennan eo am ej ñan kwalok kin Ailiñ eo an Anij. Ilo mol, lukkun title in magazine in ej Imõniaroñroñ Ej Kwalok Kin Ailiñ Eo An Jehovah. Ekkã am kajitõk ibben armij ro elañe rej jar kin Ailiñ in. Elõñ rej uak im ba aet. Bõtab, ñe kimij kajitõk ta in Ailiñ eo, enañin aolep rej uak, “ijaje,” ak emaroñ jab lukkun alikar uak eo air.

Etke elõñ armij rej kajitõk bwe en itok Ailiñ eo an Anij meñe rejjab jelã melelen? Ej ke bwe Ailiñ eo an Anij ebin ñan melele kake? Jaab. Bible eo ej lukkun alikar an kamelele kin Ailiñ in. Bareinwõt, ennan eo ilo Bible kin Ailiñ eo emaroñ lewõj kejatdikdik eo emol ilo ien kein renana. Ilo katak in tok juõn, jenaj etale ewi wãwen an Bible eo kamelele kin kejatdikdik in. Inem jenaj lo ñããt eo naj uake jar eo an Jesus kin itok eo an Ailiñ eo.

[Kamelele eo itulal]