Jar eo an Iroij Melelen ñan Yuk

JAR eo an Iroij, me Jesus Christ ear kwaloke ilo Katak eo an ion Tol eo, jej loe ilo Bible eo ilo Matu jebta 6, 9 ñan 13 eon. Etke kar je Jar eo an Iroij ilo Bible eo? Ikijen jar in, Jesus ear katakin kij kin ewi wãwen jar ko ad remaroñ kabuñburuen Anij. Ilo jar in, jej bareinwõt lo uak ko ñan jet kajitõk ko raorõk kin mour. Inem jen etale mõttan ko kajjojo an Jar eo an Iroij.

Ta Ãt eo Etan Anij?

“Jememuij i lõñ, En kwojarjar Etõm.” (Matu 6:9) Nan kein ilo tujinoin jar eo an Jesus ej jibañ kij ñan kebake Anij ilo ad ba “Jememuij.” Einwõt juõn ajiri, eo ej ebake jemen ak jinen eo ej yokwe e, jemaroñ kebake Jemed ilañ im liki bwe ekõnan roñjake kij.

Jesus ej jiroñ kij ñan jar bwe etan Anij en kwojarjar. Ak ta ãt eo etan Anij? Bible eo ej uak ilo nan kein: “Kwe wõt, im etõm Jeova, Kwo eo eutiejtata ion aolepen lõlin.” (Sam 83:18) Kwonañin lo ke etan Jehovah ilo Bible eo?

Emol, bwe etan Anij, Jehovah, ej walok enañin 7,000 alen ilo jeje ko etto ilo Bible. Bõtab, jet ri ukok ro rar jolok ãt in jen ukok in Bible ko air. Inem, ilo jimwe, jej jar bwe Ri Kõmanman eo ad en kokwojarjar etan. (Ezekiel 36:​23, New World Translation) Juõn wãwen jej emmakit ekkar ñan jar eo ej bwe jen kajerbal ãt in Jehovah ñe jej jar ñan Anij.

Kõmanman Ankil an Anij ion Lal

“En itok Am Ailiñ. Ren kõmõnmõn ankil Am einwõt i lõñ, bareinwõt ion lõl.” (Matu 6:​10) Ewi wãwen nan kein an Jesus ilo jar eo an renaj jejjet kitieir? Enañin aolep armij rej tõmak bwe lañ ej juõn jikin eainemõn im jokane. Jeje ko ilo Bible rej kwalok bwe lañ ko einwõt ‘jikin kwojarjar im aibujuij’ an Jehovah. (Aiseia 63:15) Eñin unin jej jar bwe ankil an Anij en jejjet kitien ion lal “einwõt i lõñ”! Ak men in enaj walok ke?

Daniel ri kanan eo an Jehovah ear kanan: “Ilo ran ko an king ro Anij in lañ enaj kajutak juõn ailiñ eo rejamin kokkure. Im rejamin lelok ailiñ in ñan jabdewõt armij. Enaj kabedakilkil im kokkure ailiñ kein otemjelok [ion lal], im enaj make bed ñan indio.” (Daniel 2:​44, NW) Ailiñ in ilañ, ak kien eo, ejjabto enaj bõktok ainemõn ibelakin lal iumin juõn wãwen iroij ewãnik.​—2 Piter 3:​13.

Jar im Aikwij Ko Ad ilo Kanniek

Ekkar ñan jar eo an, Jesus ear kwalok bwe ñe jej jar men eo eaorõktata ibbed en ekkejel ñan etan Anij im ankil an. Ak, jar eo an ej wõnmanlok im kajitõk kin men in aikwij ko jemaroñ kajitõk kaki ilo ekkar ñan Jehovah.

Men eo moktata ian men kein ej: “Ranin kwon letok ñõn kim kijim ranin.” (Matu 6:​11) Aikwij in ejjab juõn kajitõk ñan korlok mweiuk. Jesus ear rejañ kij ñan jar kin “kijim ekar ñõn ran eo.” (Luk 11:3) Ekkar ñan Jar eo an Iroij, jemaroñ jar ilo tõmak bwe Anij enaj letok men ko ilo kanniek jej aikwiji jen ran ñan ran elañe jej yokwe im bokake e.

Inebata le jen joñan kin abañ ko emaroñ kõmman bwe jen jerwane aikwij ko ad ilo jitõb im likjap in kõmman men eo Anij ekõnan bwe jen kõmmane. Ak elañe jej likit mokta kabuñ ñan Anij ilo mour eo ad, jemaroñ liki bwe jar ko ad kin aikwij ko ilo kanniek, einwõt mõñã im nuknuk, enaj roñjake. Jesus ear ba: “Komin bukot mokta ailiñ in Anij im kwojarjar eo An; im naj koorlok men kein otemjej ñõn kom.”​—⁠Matu 6:​26-​33.

Jar Ko Ad im Jolok Bwid

“Jolok amuij muri ibõm, einwõt kim ar jolok an armij muri ibem.” (Matu 6:​12) Ilo lokbook eo an Luk kin Jar eo an Iroij, “muri” kein rej jutak kin “jerawiwi” ko. (Luk 11:4) Jemeduij ilañ ej bojak in “jeorlok” jerawiwi ko an ro rej ukwelok jen burueir im kir e. Einwõt ñe juõn ej jolok muri eo an juõn im jab bar lemnak kake, eindein Jehovah Anij emaroñ jeorlok jerawiwi ko ad im jab bar kememej.

Bõtab, Jesus ear kwalok juõn men in aikwij: Elañe jekõnan bwe Anij en jeorlok bwid ko ad, jej aikwij jeorlok bwid ko an armij ro jet. (Matu 6:​14, 15) Elañe jej jolok bwid ko an ro rar kõmman bwid nae kij, jenaj kabuñburuen Anij im bed ilo juõn wãwen emõn ñan bõk tokjen jen tiriamokake eo an.

Bõk Jibañ ñan Jibadõk juõn Ial Ewãnik

“Jab kadreloñ kim ilo kabo, a lomoren kim jen eo enana.” (Matu 6:​13) Jehovah ejjab kõtlok bwe jen bo ilo bwid ko ad im jab jibañ kij. Nan eo an ej ba: “Men ko renana re ban kabo Anij, im Ej kabo ejelok armij.” (Jemes 1:13) Anij ej kõtlok bwe jen jelmae men in kabo ko, bõtab emaroñ kanemkwoj kij jen Ri Kabo eo Elap​—“dri nana eo” ej naetan Satan Devil eo.

Ikijen lal eo ej bed iumin kajur eo an, Devil eo emaroñ kabo kij ñan kõmman manit ko rejjab kabuñburuen Anij. (1 Jon 5:​19) Inem ej juõn men eaorõk bwe jen keini ad atartar ion Anij ñan jibañ kij, elaptata ñe jej jelmae juõn men in kabo eo ebin an jako. Im elañe jej kabuñ ñan Jehovah ekkar ñan Nan eo ear kakõrmole, Bible eo, enaj kanemkwoj kij ilo an jibañ kij ñan jutak nae Devil eo. “Anij e tiljek,” Bible ej ba, “im E jamin likit bwe ren kabo kom elap jen ami maroñ.”​—1 Dri Korint 10:13.

Tõmak ilo Anij Juõn Men in Aikwij

Ej juõn men elap an kõmãnãn buruõd ñan jelã bwe Jemeduij ilañ ej itoklimo kin kij kajjojo! Ear bareinwõt kõmman bwe Nejin, Jesus Christ en katakin kij kin wãwen jar. Emol bwe men in en kamakit kij ñan kabuñburuen Jehovah Anij. Ewi wãwen ad maroñ kõmman men in?

Ej juõn men in kejatdikdik bwe bwebwenato in kin Jar eo an Iroij en kar kalaplok kamolol eo am kin melele eo an. Ilo am kalaplok jelãlokjen eo am kin Jehovah im jinekjej ko an “ñõn ro rej kabukot e,” kwomaroñ kakajur tõmak eo am ilo Anij. Kwon kalaplok am katak kin e im karõk ko an im ilo wãwen in kwonaj lo lañliñ ilo am debij juõn kõtan ebak ibben Jemem ilañ ñan indio.​—Jon 17:3.