“Iroij, Kwon Katakin Kim Kin Jar”
“Juõn ian ro dri kaloran e ba ñõn E, Iroij, kwon katakin kim kin jar.”—LUK 11:1.
1. Etke juõn ian ri kalor ro an Jesus ear kajitõk ibben bwe en katakin ir kin jar?
JUÕN ien ilo 32 C.E., juõn ri kaloran Jesus ear kalimjeke ke ear jar. Ear jab maroñ roñ kin ta eo Jesus ear ba ñan Jemen, bõlen kinke ear jar ilo ejelok ainikien. Mekarta, ke Jesus ear mwij an jar, ri kalor eo an ear ba ñan e: “Iroij, kwon katakin kim kin jar.” (Luk 11:1) Ta eo ear kamakit e bwe en kajitõk kin men in? Jar kar juõn mantin Ri Jew im kabuñ. Jeje ko ilo kajin Hibru einwõt ilo book in Sam im book ko jet rar obrak kin jar ko. Inem ri kalor eo ear jab kajitõk bwe en katak kin juõn men ekãl ak bwe en katak kin juõn men ejañin kar kõmmane mokta. Ejelok bere bwe, ear jelã kin jar ko an ri tel ro an kabuñ in Judaism. Ak kiõ ej kab lo an Jesus jar, im ear kile bwe ekar wõr juõn oktak elap ikõtan jar ko an ri kaki ro reutiej burueir im wãwen an kar Jesus jar.—Matu 6:5-8.
2. (a) Ta eo ej kalikar bwe Jesus ear jab kõnan bwe jen elijinmen kin jar eo an nan kin nan? (b) Etke jej itoklimo in jelã kin ewi wãwen jar?
2 Enañin 18 alliñ ko lok iman, ilo Katak eo an ion Tol eo, Jesus ear lelok ñan ri kalor ro an juõn wanjoñok emõn einwõt juõn bedbed ñan kajerbale ilo jar ko air. (Matu 6:9-13) Bõlen ri kalor in ear jab bed ilo ien eo, inem ilo joij Jesus ear elij point ko relap kin jar in. Kinke ear jab elijinmen jar eo an nan kin nan, ej alikar bwe ear jab kili jar eo. (Luk 11:1-4) Einwõt ri kalor eo, kij bareinwõt jekõnan katak kin ewi wãwen ad jar bwe jar ko ad ren kebak kij ñan Jehovah. Inem jen etale jar eo an iroij ilo likieo, ilo jeje ko an ri jilek Matu. Ewõr jiljilimjuõn kajitõk ko, jilu iair rej jitõñlok ñan karõk ko an Anij im emen iair rej jitõñlok ñan aikwij ko ilo kanniek im jitõb. Ilo katak in, jenaj etale kajitõk ko jilu.
Juõn Jemen Ej Yokwe
3, 4. Ta melelen “Jemeduij” ñe jej kir Jehovah?
3 Jen jinoin, Jesus ear kwalok bwe jar ko ad rej aikwij kalikar juõn kõtan ebak ñan Jehovah. Ke ear konono moktata ñan ri kalor ro an rar bed ebak ñan e iturin tol eo, Jesus ear jiroñ ir ñan jar ñan Jehovah einwõt “Jem[eir] ilõñ.” (Matu 6:9) Ekkar ñan juõn ri meletlet, jekdon elañe Jesus ear konono ilo kajin Hibru ak Aramaic, nan eo “Jemen” ej ekkejel ñan nan ko an juõn ajiri eo ebak ñan Jemen, ‘juõn nan in ajiri.’ Ad kir Jehovah einwõt “Jemeduij ilañ ej kwalok juõn kõtan emãnãn, im ewõr liki ie.
4 Ñe jej ba “Jemeduij,” jej kile bareinwõt bwe jej mõttan juõn family ekilep kin emaan im kõrã ro rej jelã kajjen Jehovah einwõt Eo Ej Letok Mour. (Aiseia 64:8; Jerbal 17:24, 28) Christian ri kabit ro rar erom “ro nejin Anij,” im rar lamõj ñan e im ba: “Abba, Jema!” (Dri Rom 8:14, 15) Elõñ million armij ro rar erom ro mõttair retiljek. Rein rar lelok air mour ñan Jehovah im kalikare ilo air baptais. Rein ro rej “sheep ro jet” remaroñ kebak Jehovah ilo etan Jesus im kir E “Jemeir.” (Jon 10:16; 14:6) Jemaroñ ekkeini ad nebar e ilo jar, kamolol e kin aolep wãwen ko remõn ear kwalok ñan kij, im kwalok eddo ko ad ñan e, im liki wõt bwe ej yokwe kij.—Dri Pilippai 4:6, 7; 1 Piter 5:6, 7.
Kaorõk Ãt eo Etan Jehovah
5. Ta nan ko tujinoin jar eo an Iroij, im etke ej juõn men ekkar im jimwe?
5 Nan ko tujinoin rej likit men ko raorõktata iman. Ej ba: “En kwojarjar Etõm.” (Matu 6:9) Aet, kokwojarjar etan Jehovah en kar men eo eaorõktata ibbed kinke jej yokwe e im jej ñatte in lo aolep wãwen ko armij ro rej katton etan. Jumae eo an Satan im an mone armij ro ruo moktata ñan jumae Jehovah Anij rar katton Etan kinke rar kajitõk ilo bere maroñ eo an Anij einwõt iroij bõtata ijoko otemjej ilañ im ion lal. (Jenesis 3:1-6) Bareinwõt, iumin elõñ ebeben ko, ro rar ba bwe rar jerbal ilo etan Jehovah rar katton etan ilo manit ko rekajookok im katak ko air.
6. Ta eo jejjab kõnan kõmmane elañe jej jar bwe ãt eo etan Jehovah en kwojarjar?
6 Jar eo ad ñan kokwojarjar etan Jehovah ej kwalok kin tu ia jej jutak ie ilo aitwerõk in kin wõn eo ej iroij bõtata ijoko otemjej ilañ im ion lal—jej lukkun jurake Jehovah eo ewõr an maroñ ñan iroij ijoko otemjej ilañ im ion lal. Jehovah ekõnan bwe enjel im armij ro rej mõnõnõ im lañliñ in kõttãik ir ñan iroij bõtata eo an ewãnik ren jokwe ijoko otemjej ilañ im ion lal kinke rej yokwe e im kaorõk men otemjej ilo etan. (1 Kronikel 29:10-13; Sam 8:1; 148:13) Yokwe eo ad kin etan Jehovah enaj jibañ kij ñan jab kõmman jabdewõt men emaroñ katton ãt eo ekwojarjar etan. (Ezekiel 36:20, 21, NW; Dri Rom 2:21-24) Kinke ainemõn eo ilañ im ion lal im ro rej jokwe iloan ej atartar ion kwojarjar eo an etan Jehovah im kõttã eo ad ilo yokwe ñan iroij bõtata eo an, jar eo ad “en kwojarjar etõm” ej juõn nan in liki eo ad bwe karõk eo an Jehovah enaj jejjet kitien im nebar e.—Ezekiel 38:23, NW.
Ailiñ Eo Jej Jar Kake
7, 8. (a) Ta Ailiñ eo Jesus ear katakin kij bwe jen jar kake? (b) Ta eo jej katak kake kin Ailiñ in ilo book in Daniel im Reveles̃õn?
7 Aikwij eo kein ka ruo ilo jar eo an iroij ej: “En itok Am ailiñ.” (Matu 6:10) Aikwij in ej ekkejellok ibben kajitõk eo kein kajuõn. Kein jerbal eo Jehovah ej kajerbale ñan kokwojarjar etan ej Ailiñ in Messiah eo, kien eo an ilañ, eo me Nejin, Jesus Christ, kar jitõñ bwe en King. (Sam 2:1-9) Kanan eo an Daniel ej kwalok bwe Ailiñ eo an Messiah eo ear einwõt juõn “deka” ear jekadlok jen juõn “tol.” (Daniel 2:34, 35, 44, 45, NW) Tol eo ear pijaik iroij bõtata eo an Jehovah ijoko otemjej ilañ im ion lal, inem dekã in Ailiñ eo ear pijaik juõn men ekãl jen iroij bõtata eo an Jehovah. Ilo kanan eo, dekã eo ear erom juõn tol elap im kobrak lal,’ melelen men in bwe Ailiñ eo an Messiah eo enaj binej jenkwon iroij bõtata eo an Anij eo ej iroij ion lal.
8 Ekoba ibben Christ ilo Ailiñ in ej 144,000 ro jet, rar “wiaik ir jen lõl” ñan iroij ibben einwõt king im priest ro. (Reveles̃õn 5:9, 10; 14:1-4; 20:6) Daniel ear jitõñlok ñan armij rein einwõt “ro rekwojarjar an Anij Laplap,” im, ekoba ibben Christ eo ej Bõrair, rej bõk “kajur im buñbuñ ilo ailiñ otemjej ion lõl . . . Air ailiñ ejamin jemlok, im aolep iroij ion lal renaj jerbal ñan ir im bokake ir.” (Daniel 7:13, 14, 18, 27, NW) Eñin ailiñ eo ilañ Christ ear katakin ri kalor ro an bwe ren jar kake.
Etke Kwon Jar Wõt bwe Ailiñ eo En Itok?
9. Etke ej juõn men ekkar ñan jar bwe Ailiñ in Anij en itok?
9 Ilo jar eo an, Christ ear katakin kij bwe jen jar bwe Ailiñ in Anij en itok. Kanan ko an Bible rej kamol bwe Ailiñ in Messiah eo ear jutak ilañ ilo 1914.a Inem, emõn ke bwe jen wõnmanlok im jar bwe Ailiñ eo en “itok”? Emol, aet. Kinke ilo kanan eo an Daniel, Ailiñ in Messiah eo, me dekã eo ear pijaike, ej kelok wõt ñan rupe kien ko an armij, eo me ekjap eo elap ej pijaike. Dekã in ej bojak in rupe ekjap eo elap im kabedakilkile. Kanan eo an Daniel ej ba: “Ilo ran ko an king ro Anij in lañ enaj kajutak juõn ailiñ eo rejamin kokkure. Im rejamin lelok ailiñ in ñan jabdewõt armij. Enaj kabedakilkil im kokkure ailiñ kein otemjelok, im enaj make bed ñan indio.”—Daniel 2:44, NW.
10. Etke jej kijoror wõt bwe Ailiñ eo an Anij en itok?
10 Jej kijoror wõt in lo an Ailiñ eo an Anij wõnmaik jukjuk im bed eo an Satan kinke enaj kokwojarjar ãt eo ekwojarjar etan Jehovah im jolok aolep ro rej jumae iroij bõtata eo an Anij. Jej aikwij eowore Anij: “En itok Am ailiñ,” ibben ri jilek Jon, jej ba: “Amen!, Kwon itok, Iroij Jesus.” (Reveles̃õn 22:20) Aet, jen jar bwe Jesus en itok im kokwojarjar etan Jehovah im karreoik iroij bõtata eo An, bwe nan ko an ri jeje Sam en jejjet kitieir: “Bwe ren jela bwe Kwe wõt, im etõm Jeova, Kwo eo eutiejtata ion aolepen lõlin.”—Sam 83:18.
“Ren Kõmõnmõn Ankil Am”
11, 12. (a) Ta eo jej kajitõk kake ñe jej jar bwe ankil an Anij en jejjet kitien “einwõt ilõñ, bareinwõt ion lõl”? (b) Ilo jar eo ad ta melelen bwe Jehovah en kõmanman ankil an?
11 Jesus ear katakin ri kalor ro an kiõ bwe ren jar: “Ren kõmõnmõn ankil Am einwõt ilõñ, bareinwõt ion lõl.” (Matu 6:10) Ijoko otemjej ilañ im ion lal rar waloktok kin ankil an Jehovah. Men in kõmanman ko rekajur ilañ rej lamõj im ba: “Ekar ñõn Kwe, O Iroij, im am Anij, bwe kwon bõk aibujuij im nebar im kajur; bwe kw’ar kõmõnmõn men ko otemjej, im kin ankil am r’ar ber im emwij kõmõnmõni.” (Reveles̃õn 4:11) Ewõr unin an Jehovah kõmanman “men ko i lõñ, im men ko i lõl.” (Dri Epesõs 1:8-10) Ilo an jar bwe Anij en kajejjet kitien ankil an, ej einwõt ad kajitõk bwe Jehovah en kajejjet kitien karõk eo an. Bareinwõt, ej kwalok bwe jej kijoror in lo an ankil an Anij jejjet kitien iaolepen lañ im lal.
12 Ikijen jar in ej kalikar ad mõnõnõ in ukõt mour eo ad ekkar ñan ankil an Jehovah. Jesus ear ba: “Kijiõ bwe In kõmõnmõn ankil an Eo e ar jilkintok, Iõ, im bwe In kamwijlok jerbal eo An.” (Jon 4:34) Einwõt Jesus, kij Ri Christian ro emwij wujleplok ad mour, jej mõnõnõ in kõmanman ankil an Anij. Yokwe eo ad kin Jehovah im Nejin ej kamakit kij bwe jen “jab bed im mour ilo mõm ko an armij rõn, a ñõn ankil an Anij.” (1 Piter 4:1, 2; 2 Ri Korint 5:14, 15) Jej aikwij kate wõt im jab kõmman men ko rejõkkar ñan ankil an Jehovah. (1 Dri Tessalonika 4:3-5) Ilo ad wiaik ien ñan konono im katak Bible eo, jej jelã kin “ta eo ankil an Iroij,” eo ej kitibuj ad boub wõt ilo jerbal in kwalok “gospel in an ailiñ in lõñ.”—Dri Epesõs 5:15-17; Matu 24:14.
Ankil an Jehovah Ilañ
13. Ewi wãwen ankil an Anij ear jino jejjet kitien moktalok wõt jen ien eo Satan ear jumae?
13 Kar jino kõmanman ankil an Jehovah ilañ mokta jen an juõn ian ro nejin ilo jitõb kar jumae im erom Satan. Book in Jabõn Kennan Ko ej kõkkar Manjen Anij einwõt Ri meletlet eo. Ej kwalok bwe iumin juõn ien eaetok, Manjen Anij ear “mõnõnõ ien otemjej iman,” ñan kõmanman ankil an Jemen. Im tokelik, ear erom “dri mejerik” eo an Jehovah ilo ien kõmanman men otemjej “ilõñ kab ion lõl, ko jej loi im ko je jab loi.” (Jabõn Kennan Ko 8:22-31; Dri Kolosse 1:15-17) Jehovah ear kajerbal Jesus einwõt Nan eo an, ak Ri Konono eo an.—Jon 1:1-3.
14. Ta eo jemaroñ katak jen Sam 103 kin ewi wãwen enjel ro rej kõmanman ankil an Jehovah ilañ?
14 Ri jeje sam ear kwalok bwe iroij bõtata eo an Jehovah ej ilõñin men otemjej im bwe enjel ro rej bokake nan in jiroñ im kaiñi ko an. Jej konono: “Jeova e ar likit tron eo An ilo lõñ ko; im ailiñ in kiñ ro An e iroij ion aolep. Komin nebar Jeova, komeo enjel ro An; ro remõnmõn ilo kajur, re kamol Am in nan, rej roñjake ainiken nan ko An. Komin nebar Jeova, kom otemjej ilo jar ko An, ro dri korijeran rej kõmõnmõn ankil An. Komin nebar Jeova, men in kõmõnmõn ko An otemjej ilo jikin ko otemjej [iroij bõtata], Ej iroij ioir; kwon nebar Jeova, O aõ.”—Sam 103:19-22.
15. Kin an Jesus bõk kajur eo an Ailiñ eo ewi wãwen ear jelet an kõmanman ankil an Anij ilañ?
15 Elikin an jumae, Satan ear maroñ wõt in deloñe jikin ekajet ko ilañ, einwõt an kar book in Job kalikar kake. (Job 1:6-12; 2:1-7) Bõtab, book in Reveles̃õn ear kanan bwe ien eo enaj itok ñe renaj kar jolok Satan im dimon ro an jen lañ. Ien in ear mottok elikin wõt an kar Jesus Christ bõk kajur ilo Ailiñ eo ilo 1914. Jen ien eo mantak, ejelok jikin ri jumae rein ilo lañ. Emwij kalbuji ir ijin ion lal. (Reveles̃õn 12:7-12) Ejamin bar wõr jabdewõt ainikien ri jumae eo nae iroij bõtata eo an Jehovah ilañ, ak ainikien ro wõt rej ibben don im nebar “Lam eo,” Christ Jesus, im Jehovah ilo ettã buru. (Reveles̃õn 4:9-11) Emol bwe ankil an Jehovah ej wõnmanlok im jejjet kitien ilo lañ.
Ankil an Jehovah ion Lal
16. Ewi wãwen jar eo an Iroij ej kariap katak ko an Christendom ikijen kejatdikdik eo an armij?
16 Kabuñ ko an Christendom rejjab kobaike lal in ilo karõk ko an Anij, kinke rej ba bwe aolep armij ro remõn renaj etal ñan lañ. Ak Jesus ear katakin kij ñan jar: “En itok Am ailiñ. Ren kõmõnmõn ankil Am, einwõt ilõñ, bareinwõt ion lõl.” (Matu 6:10) Jemaroñ ke ba bwe, ankil an Jehovah ej jejjet kitien ion lal in ilo ran kein meñe eobrak kin kowadoñ, ekajet ilo jab jimwe, nañinmij, im mij? Emol jaab! Inem jej aikwij kate wõt im jar bwe Anij en kõmanman ankil an ilo lal in, ekkar ñan kallimur eo ri jilek Piter ear je: “A kar ñõn kalimur eo An, jej kõtõmene kin lõñ ko rekal [kien Ailiñ eo an Messiah ikijen Christ] im juõn lõl ekal [juõn jukjuk im bed eo ewãnik an armij], eo kwojarjar ej jokwe iloan.”—2 Piter 3:13.
17. Ta karõk eo an Jehovah kin lal in?
17 Ewõr unin an kõmanman lal in. Ear kakõrmol ri kanan Aiseia bwe en jei: “Bwe ein drein Jeova eo e ar kõmõnmõn lõl im jab kõmõne wan, im nawãwen bwe ren jokwe ie, Ej ba, Ña Jeova, im e bar ejelok jen Ña.” (Aiseia 45:18) Anij ear likit armij ro ruo moktata ilo juõn jikin kallip im jiroñ ir: “Komin timon im orlok im kobrõk lõl, im kajur jen e.” (Jenesis 1:27, 28; 2:15) Alikar, karõk eo an Ri Kõmanman eo ej bwe lal in en obrak kin juõn jar in armij ewãppen im wãnik ro remõnõnõ in kõttãik ir ñan iroij bõtata eo an Jehovah im mour indio ilo Paradise eo Christ ear kallimur kake.—Sam 37:11, 29; Luk 23:43.
18, 19. (a) Ta eo aikwij kõmmane bwe ankil an Anij en jejjet kitien ion lal? (b) Bar ta men ko ilo jar eo an Jesus jenaj etali ilo katak eo tok ilal?
18 Ankil an Jehovah ejjab maroñ jejjet kitien ñe lal in ej obrak kin maan im kõrã ro rej karmijeteik iroij bõtata eo an Anij. Ilo ad kajerbal ri tarinae ro ilo jitõb iumin tel eo an Christ, Anij enaj “kokkure ro rej kokkure lõl.” Aolepen jukjuk im bed eo an Satan, ekoba kabuñ wan, im kien ko renana, jikin wia ko rekibbon im jab mol, im dolul in tarinae ko rekajorrãn armij, renaj jako ñan indio. (Reveles̃õn 11:18; 18:21; 19:1, 2, 11-18) Iroij bõtata eo an Jehovah enaj erreo im ãt eo etan enaj kwojarjar. Jej jar kin men kein otemjej ñe jej ba: “Jememuij ilõñ, en kwojarjar etõm. En itok Am ailiñ. Ren kõmõnmõn ankil Am einwõt i lõñ, bareinwõt ion lõl.”—Matu 6:9, 10.
19 Bõtab, ilo jar eo an Jesus, Jesus ear kwalok bwe jemaroñ jar kin aikwij ko ad make bareinwõt. Jenaj etale men kein rej mõttan jar eo an ilo katak eo tok ilal.
[Kamelele eo itulal]
a Lale chapter 6 ilo book eo Pay Attention to Daniel’s Prophecy!, Ri Kennan ro an Jehovah rar printi im leloke.
Ilo Elij
• Etke ej juõn men ekkar nan kir Jehovah einwõt “Jemeduij”?
• Etke elap an aorõk bwe jen jar bwe ãt eo etan Jehovah en kwojarjar?
• Etke jej jar bwe Ailiñ eo an Anij en itok?
• Ta melelen ñe jej jar bwe ankil an Anij en jejjet kitien ion lal einwõt ilañ?
[Pija eo ilo peij 19]
Jar ko an Jesus rar oktak jen jen jar ko an Ri Pharisee ro reutiej buru
[Pija eo ilo peij 20]
Ri Christian ro rej jar bwe Ailiñ eo an Anij en itok, ãt eo etan en kwojarjar, im ankil an en jejjet kitien