Etke Em̦m̦an ñan Riit Baibõl̦?

Baibõl̦ eo ej make wõt buñbuñ im jejuwaan jãn jabdewõt bok ipel̦aakin lal̦ in. Etke? Juon ej kõnke mel̦el̦e ko ie relukkuun jejjet ñan mour ko an armej. Ñan waanjoñak, bwebwenatoun armej ro ie rem̦ool. Ej kwal̦o̦k kõn wãween aer kar kõm̦m̦an ñan doon im kõn men ko rar kõm̦m̦ani im̦aan mejãn Anij. Men kein rejjab ino̦ñ bajjek. Ewõr men ko jej ekkatak jãn bwebwenato kein. Bwebwenato ko ilo Baibõl̦ ralikkar im repidodo ñan mel̦el̦e. Eñin unin ewõr armej ro jãn iien ko etto ñan raan kein rar maroñ mel̦el̦e kõn Baibõl̦ eo. Em̦õj ukot Baibõl̦ ñan elõñ bukwi kajin ko, im armej ro ilo jabdewõt jikin ewõr aer Baibõl̦. Im aolep iien ñe armej rej l̦oore naan in kakapilõk ko ie, rej jeraam̦m̦an.

Baibõl̦ ejjab baj kwal̦o̦k wõt men ko kõn Anij, ak bok in ej an Anij. Ej kwal̦o̦k kõn ãt eo etan Anij, kain Anij rot e im kõn karõk eo an ñan armej ro im lal̦ in. Bar juon men kõn Baibõl̦ ej bwe ej kwal̦o̦k kõn etke men ko renana rar jino wal̦o̦k. Im ej bar kwal̦o̦k kõn an naaj jako nana ilo raan ko im̦aan. Ñe jenaaj riiti Baibõl̦ im lukkuun kõl̦mãnl̦o̦kjen̦ kake, men in enaaj jipañ kõj ñan wõr ad tõmak im kõjatdikdik kõn ilju im jekl̦aj.

Ewõr mel̦el̦e ko jemaroñ loi ilo Baibõl̦ im jejjab maroñ loi ilo bar jabdewõt jikin. Ñan waanjoñak, Baibõl̦ ej kwal̦o̦k ñan kõj kõn katak ko rem̦ool. Im ej letok uwaak ko rem̦ool ñan kajjitõk kein itulal̦.

• Jaar itok jãn ia im etke jej eñtaan?

• Ta eo Anij ear kõm̦m̦ane ñan lo̦mo̦o̦ren armej?

• Ta eo Jijej ear kõm̦m̦ane ñan jipañ kõj?

• Ta eo enaaj wal̦o̦k ñan lal̦ in im armej?

Etke kwõjjab bõk jidik iien ñan wõnm̦aanl̦o̦k im riiti peij ko tok jet im lale ta eo Baibõl̦ ej ba kõn men kein?