Kajjitõk ko jãn Ro Rej Riit
Ekkar ke an Kũrjin ro tile ãnbwinnin rimej ro?
Ekkar ñan Baibõl̦, ejjab nana ñe armej ro rej tile ãnbwinnin ro remej.
Ewõr bwebwenato ko ilo Baibõl̦ me rej kwal̦o̦k kõn an kar armej ro etto tile ãnbwinnin ro remej ak di ko diier. (Joshua 7:25; 2 Kronikel 34:4, 5) Men in emaroñ kar kaalikkar bwe armej rein rar nana im ejjel̦o̦k tokjãn kar kalibwini er. Bõtab, ejjab aolep iien eñin kar mel̦el̦ein aer tile ãnbwinnin ro remej.
Jemaroñ kam̦oole men in jãn bwebwenato eo kõn mej eo an Kiiñ Saul im l̦õm̦aro 3 nejin. Ereañ 4 rar mej ke rar tarin̦ae ippãn Ri Pilistia ro. Juon iaan l̦õm̦arein nejin Saul me ear mej ej Jonetan. Jonetan ekar l̦eo m̦õttan Devid im ear tiljek ñan Devid im rejetake. Ke jet Ri Israel ro reperan ilo Jebesh-giliad rar roñ kõn men ko rar wal̦o̦k ñan Saul im l̦õm̦aro 3 nejin, rar etal im bõk ãnbwinnier. Im rar tũli ãnbwinnier im kalibwin di ko diier. Tokãlik, Devid ear nõbar Ri Israel rein kõn men in em̦m̦an rar kõm̦m̦ane.—1 Samuel 31:2, 8-13, UBS; 2 Samuel 2:4-6.
Baibõl̦ ej kwal̦o̦k kõn kõjatdikdik eo kõn ro remej. Ta kõjatdikdik in? Ej bwe Anij enaaj bar kõmour armej ro rar mej. Jekdo̦o̦n ñe kar tile ãnbwinnin juon rimej ak jaab, Jeova ewõr an maroñ ñan bar kõmour armej in me ear mej im lel̦o̦k juon ãnbwin kããl ñane. Meñe Kiiñ Nebukadnezar ear kakien bwe ren jol̦o̦k Ri Hibru ro jilu retiljek ilowaan kijeek eo, ak rar jab mijak im l̦õmn̦ak bwe Anij eban kõmour er ñe enaaj til im jako ãnbwinnier. (Daniel 3:16-18) Kar bar ãindein l̦õmn̦ak eo an rũkarejar ro retiljek an Jeova ilo iien ko an Hitler. Rein rar tiljek wõt meñe rũttarin̦ae ro an Hitler rar kaamijak er im tile er ilo jikin kalbuuj ko aer. Bareinwõt, ewõr ro doon Anij me rar jako kõn aer kar pãd ilo juon jikin ear bokkol̦o̦k ak jorrããn, im ro jet rar jab maroñ loe ãnbwinnier. Meñe ãindein ak Anij ej kallim̦ur bwe rein renaaj bar mour.—Revelesõn 20:13.
Jeova ejjab aikuj ainitok m̦õttan ko ilo ãnbwinnin juon armej bwe en maroñ kõmouri. Ej alikkar men in kõn wãween an Anij kajerkakpeje Kũrjin ro rej rũkkapit ñan mour ilañ. Ãinwõt Jijej, me ear mej ilo ãnbwin im “mour ilo jetõb,” ãindein an naaj bar rũkkapit ro jerkakpeje. Renaaj oktak im erom jetõb, ak eban oktak l̦õmn̦ak im eñjake ko aer. Im renaaj bar keememej wõt men ko rar kõm̦m̦ani ioon lal̦. Reban etal ñan lañ kõn ãnbwinnin armej.—1 Piter 3:18, UBS; 1 Korint 15:42-53, UBS; 1 Jon 3:2, UBS.
Kõn men in, ad tõmak bwe ro remej renaaj bar mour, ejjab wawa ioon ñe renaaj tile ãnbwinnier ak jaab. Unin ad tõmak bwe renaaj mour ej kõnke jej lõke Anij im tõmak bwe enaaj kõmour er. (Jerbal 24:15, UBS) Bõlen, jemaroñ jab lukkuun mel̦el̦e kõn ewi wãween an kar Anij kõmour ro rar mej ilo iien ko etto im elemen an naaj kõm̦m̦ane men in ilju im jekl̦aj. Em̦õj an kar letok juon “menin kam̦ool” bwe enaaj kõmour ro rar mej ikijjeen an kar kajerkakpeje Jijej. Kõn men in, jej likũt ad kõjatdikdik ioon Jeova im lõke e.—Jerbal 17:31, UBS; Luk 24:2, 3, UBS.
Bõtab, em̦m̦an ñe Kũrjin ro rej bar l̦õmn̦ak kõn m̦anit eo an aelõñ eo aer, im ta ko armej in bukwõn eo aer renaaj ba, kab kakien ko jãn kien eo kõn ta eo rej aikuj kõm̦m̦ane ñan ãnbwinnin rimej eo. (2 Korint 6:3, 4, UBS) Ãlikin an juon armej ak juon baam̦le l̦õmn̦ak kõn men kein, ej aer wõt pepe el̦aññe renaaj tile ãnbwinnin armej eo nukwier me emej ak jaab.