Anij Emel̦el̦e Kake Eok

UNIN AN ARMEJ JAB TÕMAK BWE ANIJ EMEL̦EL̦E KÕN ER: Armej rej ba bwe Anij ej loe wõt bõd ko aer. Rej bar ba bwe er rijjerawiwi im rejjab ekkar ñan an lale im kõjparok er. Juon kõrã etan Kendra ear nañinmej in bũrom̦õj. Ear bar lukkuun nana an mour kõn an kar l̦õmn̦ak bwe ejjab lukkuun jejjet wãween an l̦oori kien ko an Anij. Kõn men in, ear bõjrak an jar ñan Anij.

KÕMEL̦EL̦E KO ILO BAIBÕL̦: Jeova ejel̦ã unin am̦ kõm̦m̦an bõd kõnke emel̦el̦e kõn kwe. Baibõl̦ ej ba bwe ‘ejel̦ã wãween kõm̦anm̦an kõj; Ej keememej bwe kõj bũñal.’ Bareinwõt, ejjab ‘kõm̦m̦an ñan kõj’ ekkar ñan jerawiwi ko ad, ak ej tũriam̦o im m̦õn̦õn̦õ in jol̦o̦k ad bõd ñe ej m̦ool ad ukel̦o̦k.​—Sam 103:10, 14.

Ñan waanjoñak, ilo katak eo jinoin ej kwal̦o̦k kõn naan ko an Kiiñ Devid. Ear jar ñan Anij im ba: “Kwaar lo di ko diũ ke rar jino ejaak, im rar kon̦ ippãn doon ilo̦jien jinõ ke iar eddek ijo ettino . . . O Anij, kwõn etale eõ im jel̦ã bũruõ.” (Sam 139:15, 23, UBS) Devid ear tõmak bwe meñe ear kõm̦m̦ani bõd ko rel̦l̦ap ak Jeova ear loe bũruon bwe em̦ool an ukel̦o̦k.

El̦apl̦o̦k an Jeova mel̦el̦e kõn kwe jãn jabdewõt armej. Jeova ear ba: “Armej ej kallimjek tulik, ak ña ij kallimjek bũruon armej.” (1 Samuel 16:7, UBS) Anij emel̦el̦e kõn wãween am̦ kar dik im rũttol̦o̦k, im kõn m̦õjn̦o̦ ko am̦ me kwõj bõdañi. Bareinwõt, ejel̦ã kõn men ko rej wal̦o̦k ilo ijo kwõj jokwe ie im kõn kain armej rot kwe. Jeova ej lale kwe im ej kaorõk eok. Meñe jet iien kwõj kõm̦m̦an bõd, ak em̦õn̦õn̦õ kõn men ko rem̦m̦an me kwõj kate eok ñan kõm̦m̦ani.

Innem ke Anij emel̦el̦e kõn kwe, ta eo ej kõm̦m̦ane ñan kaenõm̦m̦an eok?