Juon Kajjitõk me Elõñ Armej Rej Pok Kake

EOKKÕTAKTAK wãween an armej l̦õmn̦ak kõn mour im mej, im elõñ mel̦el̦e ko rej bũki. Jet rej l̦õmn̦ak bwe renaaj mour m̦aanl̦o̦k wõt ãlikin aer mej, im remaroñ mour ilo juon wãween eoktak ak ilo bar juon jikin. Im jet rej bar l̦õmn̦ak bwe ñe remej, renaaj bar l̦otak ñan bar juon ãnbwin ak oktak im erom juon menninmour. Bõtab jet rej l̦õmn̦ak bwe mej ej jem̦l̦o̦kin men otemjej.

Bõlen emaroñ wõr am̦ make tõmak kõn men in, emaroñ itok jãn wãween am̦ kar dik im rũttol̦o̦k ak m̦anit ko kwaar imminene m̦aantak kaki. Kõnke ekajjo wãween an armej l̦õmn̦ak kõn ta eo ej wal̦o̦k ñe jej mej, ewõr ke juon armej ak juon jikin jemaroñ lo uwaak ko rem̦ool ñan kajjitõk in me elõñ rej pok kake?

Ium̦win elõñ bukwi iiõ ko, rũtõlin kabuñ ko rej katakin armej bwe ñe juon ej mej, juon jetõb ak an ej mour m̦aanl̦o̦k wõt. Kabuñ ko rel̦l̦ap ãinwõt kabuñ eo an Kũrjin ro, Hindu, RiJu, Muslim, im ro jet, rej tõmak ilo katak in bwe ñe juon armej ej mej, ewõr juon jetõb ilowaan me ej mour m̦aanl̦o̦k wõt im ej etal ñan bar juon jikin. Bõtab ro ilo kabuñ in Buddhism, rej tõmak bwe ãlikin an juon armej mej im bar l̦otak elõñ alen ñan bar juon ãnbwin, ak oktak im erom juon menninmour, men in enaaj kanemkwõje jãn an eñtaan. Im rej n̦aetan iien in Nirvana.

Kõn wõt katak kein im tõmak kein an armej, kiiõ enañin aolep armej ro ipel̦aakin lal̦ in rej jino tõmak bwe mej, ej kõpel̦l̦o̦k juon ial̦ bwe ren mour ilo bar juon jikin. Innem ippãn elõñ armej, mej ej juon men eaorõk im ej aikuj wal̦o̦k ilo mour ko ad. Bareinwõt rej tõmak bwe mej ej ankilaan Anij. Bõtab ta eo Baibõl̦ ej ba kõn men in? Eokwe, jouj im riiti katak eo tok juon im bõlen kwõnaaj bwilõñ kõn uwaak eo.