Wõnmanlok im Etetal Wõt ilo juõn Wãwen Ekwon

¹ Ri jilek Paul ear wõr juõn yokwe einjuõn ñan congregation eo ilo Philippi, eo ear bõk kunan ñan ejaake. Ear wõr an kamolol kin joij eo air kin men in lelok ko ilo kanniek im ear konono im watõk ir einwõt juõn joñok emõn.—2 Kor. 8:1-6.

² Yokwe eo emũlal ear kamakit Paul ñan an jeje letter eo an ñan ri Philippi ro. Book eo Insight, Volume 2, peij 631, ej report: “Ilo letter eo an ej rejañ congregation in Philippi bwe ren wõnmanlok wõt ilo ial eo air emõn—kabukõt jelãlokjen eo elaplok im jutak bin ilo Nan in mour eo, kajurlok ilo tõmak, im kejatdikdik wõt kin ãjinkij eo ej itok.” Rar uak ilo wãwen eo emõn, im kabin lukluk in yokwe eo ikõtair im ri jilek eo. Nan ko an Paul ewõr juõn melele ejej uan ñan kij ilo ran kein, im rej letok juõn un emõn ñan ad kalmenlokjen kin nan in jiroñ ko an, elaptata nan ko ilo Dri Pilippai 3:15-17.

³ Juõn Lemnak Eritto ilo Jitõb Ej Aorõk: Ilo Pilippai 3:15, Paul ear jeje einwõt juõn emaan eminene kin mour. Ear kile wõnmanlok eo air ilo jitõb, im konono ñan ir einwõt ri Christian ro reritto ilo jitõb im ewõr juõn lemnak emõn ibbeir. Toan wõt air kalikar ettã burueir im kamolol einwõt Jesus, rar maroñ wõnmanlok im “ejelok notair im rueir, einwõt ro nejin Anij rewãppen . . . , im debiji wõt nan in mour.” (Phil. 2:15, 16, New World Translation) Ñe jej konono nan kein, jej aikwij bõk lemnak eo bwe Paul ej konono ñan kij. Kin men in jej lukkun kõnan bwe lemnak eo an Jesus en bed ibbed, im ñan kwalok kamolol eo ad ilo ettã buru kin jerammõn ko ad. Jemaroñ wõnmanlok im eowore Jehovah, im kajitõk jibañ jen e kin men in im men ko jet.—Pil. 4:6, 7.

⁴ Einwõt Pilippai 3:16 ej kwalok, kij aolep jej aikwij kõmman wõnmanlok ilo jitõb. Nan eo “wõnmanlok” ej melelen “emmakit manlok, etal wõt iman.” Armij ro rej wõnmanlok wõt rej “itoklimo kin lemnak ko rekãl, men ko rej kab loi, ak ien emõn ko rekãl.” Paul ear kõnan bwe Ri Pilippai ro ren melele bwe wãwen Christian ejjab bed bajjek wõt im ro rej ba rej Christian rej aikwij emmakit manlok wõt. Air wõnmanlok ilo jitõb enaj alikar ilo air mõnõnõ in etale ir make, kile likjap ko air, im ñan jibadõk ien ko remõn ñan kalaplok air jerbal ak kakõmõnmõnlok jerbal eo air. Ran kein dolul eo an Jehovah ion lal ej wõnmanlok wõt, meñe kalaplok jerbal eo an im melele ko kin Nan in Anij. Kij kajjojo jej aikwij wõnmanlok wõt ibben, bõk tokjen men in letok ko an, im bõk kunan ilo jerbal eo an joñan wõt ad maroñ.

⁵ Wõnmanlok Ej Aikwiji Juõn Wãwen Ekwon: Paul ear wõnmanlok ilo an rejañ ro jein im jatin bwe ren “etetal ilo ejja ial in wõt.” (Phil. 3:16, NW) Kwon ej aikwiji ad najikin armij ak men ko ilo jikin ko rekkar im kejbãrok mwilid. Ri Christian ro ilo Philippi rar bed wõt ilo jikiir, im bed wõt ebak ñan dolul eo an Jehovah im ibben don. Kien yokwe ear tel mour ko air. (Jon 15:17; Pil. 2:1, 2) Paul ear rejañ ir bwe air “etetal en ekar ñõn gospel.” (Pil. 1:27) Aikwij eo ñan kwon wõt im kejbãrok mwil eo emõn ej aorõk bareinwõt ñan Christian ro ilo ran kein.

⁶ Juõn wãwen ekwon ej juõn iminene eo kwar ejaake. Inem ej einlok wõt juõn manit ñan kõmman men ko. Juõn wãwen ekwon emaroñ jerbal ilo juõn wãwen ewõr tokjen kinke jejjab aikwij bõjrak jidik im kalmenlokjen kake ñe jej aikwij kõmman bebe ko kin buñten nee eo ad tokelik—bwe emwij ad likit juõn joñok bwe jen lore ekkar ñan manit.

⁷ Juõn wãwen ekwon im ej theocratic ej koba manit ko ewõr tokjeir, rekwojarjar, im rekkar—im ewõr mejenkajjik ñan kakajur kij ilo jitõb, jibañ ro jet, im elañe emaroñ, kalaplok ad jerbal ñan Jehovah. Ñan lo tõbrak kin mejenkajjik kein ej aikwiji ad kajutak im debij juõn wãwen ekkeini ad kõmmane, im ej koba katak ibbed make, ekkeini ad bed ilo kwelok ko, im bõk kunad ilo jerbal in kwalok nan.

⁸ Men in Aikwij ko Rej Kobaiklok ilo Wãwen eo Ekwon: Juõn men in aikwij ej “jelãlokjen eo ejimwe im eobrak kin meletlet.” (Phil. 1:9, NW) Katak ibbed make ej kamũlallok tõmak eo ad, kakajurlok kamolol eo ad kin mol eo, im kamakit kij bwe jen kõmman jerbal ko remõn. Bõtab, ebwe an bin ibben jet ian armij ro ñan ekkeini air debij manit ko ñan katak Bible. Juõn ian un ko kin abañ in ej kin an jabwe ien katak.

⁹ Jejjab maroñ kadiklok tokjen ko rej walok jen ad ekkeini in konono Bible ran otemjej. Nan in jiroñ ko ewõr “tokjen” ilo wãwen otemjej. (2 Tim. 3:16, 17) Ewi wãwen jemaroñ lo ien ñan keini ad katak Bible ibbed make ran otemjej? Jet rar lo ien ilo air bõk jejjo minute ko ilo jibboñ, ñe ej emõn air maroñ lemnak. Ro jet rej lo ien ilo jota mokta jen air kiki. Limaro ri belele me rej bed wõt imoko imwiir ilo ran remaroñ karõk jidik ien ilo elikin raelep mokta jen an ro jet jeblak jen school ak jerbal. Koba ibben air konono Bible eo, jet rar kobaik air readi book eo Proclaimers ilo ien katak eo air ilo kajjojo week otemjej.

¹⁰ Ñe jej kajutak manit ko rekãl, remaroñ idaptõk ibben manit ko mokta. Ilo ien ko mokta jaar lemnak bwe ejjab nana ñan kõtlok bwe makitkit ko rejjab aorõk ren bõk ien ko ad. Ñan ilok jen wãwen eo ejjab juõn men ebidodo kõmmane. Ejelok juõn enaj iun kij bwe jen lor karõk eo an ñan katak; im jejjab aikwij kwalok jabdewõt uak kin ta eo jenaj kõmmane kin men in. Joñan ad ekkeini ad katak ibbed make ej wawa ion joñan kamolol eo ad kin “men ko re lijiklok” im mõnõnõ eo ad ñan “wiaik ien” ñan bõk tokjen jen i.—Pil. 1:10; Ep. 5:16.

¹¹ Kwelok ko an Christian ewõr juõn kunan elap ñan wõnmanlok eo ad ilo jitõb, im letok nan in jiroñ im rejañ ko jej aikwiji. Inem, bed ilo kwelok ko ej juõn men in aikwij ilo wãwen ekwon eo ad. Paul ear kalikar aorõkin men in. Ejjab juõn men in jokãlet ibbed.—Hib. 10:24, 25.

¹² Ewi wãwen jemaroñ kwalok ad kwon ñe jej karõk schedule eo ad ñan men ko lor jitõb? Jet armij rej karõk ien ko ñan jibadõk kõnan ko air make inem kajeoñ in kobaiklok kwelok ko ilo schedule ko air elañe ewõr ien, ak emõnlok an kar oktaklok karõk in. Kwelok ko ad week otemjej ren kar men ko jej likit imantata, im makitkit ko jet jej karõki ilikiir.

¹³ Ekkeini ad kwelok week otemjej ej aikwiji juõn schedule emõn im an family eo jibañ don. Jen Monday ñan Friday enañin aolep iad jej boub ilo men ko jet im ejeja an wõr ien ñan kõmman men ko. Melelen men in bwe, elañe emaroñ, en mõkaj ad karõk kin ien kejota eo bwe en wõr ien ñan an family eo mõñã ibben don, kebojak, im bed ilo kwelok ko mokta jen awa in jinoe. Kin men in ro uan family eo remaroñ jibañ don ilo elõñ wãwen ko.

¹⁴ Ekkeini ad kwalok nan ej juõn men jejjab kõnan kajettokjen elañe jekõnan etetal manlok ilo juõn wãwen ekwon. Kij aolep jej kile eddo eo ad ñan kwalok nan kin Ailiñ eo. Men in ej kõmman bwe jen Ri Kennan ro an Jehovah. (Ais. 43:10) Kinke jerbal in ej jerbal eo aorõktata im lap tokjen ilo ran kein, jejjab kõnan watõk e einwõt juõn jerbal bajjek ilo mour eo ad. Einwõt an kar Paul kakabilek kake: “Jen katok ñõn Anij kin wijtak ien otemjej, eñin leen tier ko rej kwalok ñõn etan.”—Hib. 13:15.

¹⁵ Ñe jej karõk jerbal eo ad ilo week otemjej, jej aikwij karõk ien ko rejejjet ñan kwalok nan. Bõlen emwij an congregation eo karõk kin kwelok ko ñan kwalok nan ilo elõñlok jen juõn alen ilo kajjojo week, inem ej melelen ad baj beek kin ien et ko jemaroñ rejetake. Emõn elañe jemaroñ bõk kunad ilo aolep wãwen ko kin kwalok nan, einwõt leto-letak magazine im book ko jet ilo jerbal eo jen em-ñan-em, bar jeblak ko, im kõmman Bible study ko. Jemaroñ bareinwõt karõk lok iman kin jerbal in kwalok nan ilo jabdewõt ien emõn tok ilo ad bõk magazine im book ko ibbed im ilo ad bojak in bwebwenato ibben armij ro jet. Kinke ekkã ad jerbal ibben ro jet ilo jerbal in kwalok nan, jej aikwij kajitõk kin ñããt eo enaj emõn ad jerbal ibbeir.

¹⁶ Wãwen ekkeini ad kwalok nan en jab bõjrak meñe armij ro ilo territory eo rejjab itoklimo. Jej jelã kadede bwe eiet wõt armij ro renaj itoklimo kake ennan eo ad. (Mat. 13:15; 24:9) Kar kaiñi Ezekiel bwe en kwalok nan ibben armij ro me rar, ‘bõt, ankeke, im bin burueir.’ Jehovah ear kallimuri Ezekiel bwe enaj jibañ e ilo an “kabin deman joñan wõt demair,” melelen men in, “einwõt juõn diamond, im ebinlok jen dekã ebin.” (Ezek. 2:3, 4; 3:7-9, NW) Juõn wãwen ekkeini ñan kwalok nan ej aikwiji ad kate wõt kij.

¹⁷ Joñok Ko Remõn ñan Anõki: Ilo jerbal in kwalok nan enañin kij aolep ej emõnlok ad jerbal ñe ewõr juõn eo ej tel. Paul im ri jerbal ro mõttan rar likit juõn joñok emõn, im ear rejañ ro jet bwe ren anõk e. (Pil. 3:17) Wãwen jerbal eo an ear koba aolep wãwen ko raorõk ñan kakajur e ilo jitõb.

¹⁸ Kij ilo ran kein, jej bareinwõt jerammõn kin an lõñ joñok ko remõn ibbed. Ilo Dri Hibru 13:7, Paul ear rejañ: “Kememej ro r’ar ami dri tel, . . . komin kajeoñwe air tõmak, ke komij kalomõnlokjen kin tokjen air ber im kõmõn.” Emol, Christ ej Ri Tel eo ad, ak jemaroñ kajeoñe tõmak eo an ro rej tel kij. Einwõt Paul, elder ro rej aikwij kile aikwij eo ñan kwalok joñok eo emõn iman mejen armij ro jet. Meñe wãwen ko air kajjojo remaroñ oktak jen don, kajjojo iair ej aikwij kwalok bwe ej kejbãrok juõn wãwen ekwon ilo an bukõt mokta Ailiñ eo. Meñe ewõr eddo ko ikijen jikin jerbal eo im an family eo, elder ro rej aikwij kwalok juõn manit emõn kin wãwen air katak Bible ibbeir make, bed ilo kwelok ko, im bõk kunair ilo jerbal in kwalok nan. Ilo an el­der ro kamol bwe ej ‘emõn [air] iroij i mweo [imweir],’ aolep ro uan congregation renaj mõnõnõ in etetal ilo juõn wãwen ekwon.—1 Tim. 3:4, 5.

¹⁹ Mejenkajjik Ko ñan Yiõ in Jerbal eo Ekãl: Jinoin yiõ in jerbal eo ekãl ej juõn ien ekkar bwe jen kalmenlokjen kin manit ko ad make. Juõn etale kin jerbal eo ad ilo yiõ eo lok ej kwalok ta? Jaar maroñ ke debij wõt, ak kakõmõnmõnlok, jerbal eo ad? Emaroñ kar emõnlok wãwen ad katak ibbed make. Emaroñ kar laplok ad ekkeini in bed ilo aolep kwelok ko ak kalaplok ad jerbal in kwalok nan ilo ad bõk jerbal in auxiliary pioneer. Bõlen jemaroñ jitõñlok ñan jet jerbal in joij ko jaar kõm­mani ñan ro jet ilo congregation eo ad ak family eo. Elañe eindein, ewõr unin ad maroñ lañliñ bwe emwij ad jino etetal ilo wãwen eo Anij ej buñburuen kake, im ewõr un eo emõn unin ad “lõñlok wõt.”—1 Tess. 4:1.

²⁰ Ta elañe ear jakkeini wãwen jerbal eo ad? Ewi wãwen men in ear jelet kij ilo jitõb? Ewõr ke jabdewõt men ear bõpraek wõnmanlok eo ad? Wãwen kakõmõnmõnlok ej jinoe ilo ad kajitõk kin jibañ jen Jehovah. (Pil. 4:6, 13) Bwebwenato ibben family eo, im kajitõk jibañ eo air ñan kõmman oktak ko ekkar ñan wãwen eo ibbam. Elañe ewõr jabdewõt abañ ibbam, kajitõk ibben elder ro bwe ren jibañ yuk. Elañe jej kate wõt im jerbale nan in jiroñ ko an Jehovah, jemaroñ kejbãrok kij jen ad “jowa ak jakkeini.”—2 Pit. 1:5-8.

²¹ Etetal ilo juõn wãwen ekwon enaj tellok ñan jerammõn ko me ej kõmman bwe jibadbad ko am en wõr tokjeir. Ñe kwoj beek ilo buruõm ñan etetal manlok ilo juõn wãwen ekwon, “komin jab jowõn; komin bõplolin ilo ami; komin jerbal ñõn Iroij.” (Rom 12:11)​—Ñan bõk tibdik ko relaplok kin katak in, lale magazine eo Watchtower ilo kajin English an May 1, 1985, peij 13-17.