Box In Kajitõk

◼ Ta kejbarok ko ej men in aikwij ñe juõn ri kwalok maan ej jerbal ibben ak iion juõn kõrã ak juõn ri kwalok kõrã ej jerbal ibben ak iion juõn emaan ilo jerbal in kwalok nan eo ad?

Ewor unin ñõn ad kõtmene bwe ro jeid im jatid renaj eddep ñõn kien mwil eo eutiejtata ikijen mwilid make. Mekarta, jej mour ilo juõn lõl etton im anemkwoj me ewor jejjo wõt kien ko kin mwil erreo. Meñe ewor men ko remõntata ilo lemnak eo ad, jej aikwij kejbarok ien otemjej ñõn bõprae bwe en jab wor notad ak bwe en jab wor kwunad ilo juõn men ejakkar. Men in ej kitibuj ad kejbarok ñe jej bed ilo jerbal in kwalok nan.

Ilo jerbal in kwalok nan emakijkij an juõn ri kwalok maan iion juõn kõrã ak ri kwalok kõrã iion juõn emaan me ej kwalok juõn itoklimo emol ilo mol eo. Elañe jej make iad ñe jej iion ir im ejelok bar juõn armij ej bed ilo mweo, men eo emõntata ej ñõn kwalok nan iturin kejem eo jen ad deloñ ilo mweo. Elañe ewor air itoklimo, jemaroñ kõmmõn karõk ñõn bar jeblak ñe ewor bar juõn ri kwalok emaroñ itok ibbed ak ñe ro jet ilo mweo renaj bed bareinwõt. Elañe men in ejjab maroñ walok, enaj juõn men in meletlet ñõn lelok bar jeblak in ñõn juõn ri kwalok maan elañe ri mweo ej juõn emaan. Men in ej bareinwõt jerbal ñõn Bible study ko ibben juõn kõrã elañe ri kwalok eo ej juõn emaan ak juõn emaan elañe ri kwalok eo ej juõn kõrã.​—Mat. 10:16.

Jej aikwij kejbarok ñe jej kãlet juõn armij ñõn jerbal ibbed ilo jerbal in kwalok nan. Meñe juõn brother emaroñ jerbal ibben juõn sister jet ien, enaj emõntata ñe rej kõmmõne ilo juõn kumi. Meñe ilo jerbal in kwalok nan, ejjab juõn men in meletlet ñõn an juõn brother kamake lok ian im jerbal ibben juõn sister ejjab lio belen. Kin men in, brother eo ej lolorjake kumi in kwalok nan ej aikwij kajerbal lolokjen ñe ej assign i ri kwalok ro, koba jodikdik ro, ñõn jerbal ibben don.

Ilo ad kajerbal lolokjen aolep ien, jenaj bõprae ad “kõmõn men in buñ ilo jabrewõt” ñõn kij make ak ñõn ro jet.​—2 Kor. 6:3.