Kwalok Itoklimo eo Emol kin Aolep Ro Emol Burueir Kwar Iion Ir
1 Keañ eo kin Ailiñ eo ibelakin lal ejjabto enaj itok ñan an jemlok, elikin aolep ro “rejaje Anij” naj kokkure ir. (2 Tes. 1:7-9, New World Translation) Kin men in, itoklimo eo emol kin mour ko an ro jet ej kamakit armij ro an Jehovah ñan jibadõk elõñ armij joñan wõt air maroñ kin ennan in Ailiñ eo.—Zeph. 2:3, NW.
2 Kajjojo alliñ, elõñ million awa ko rej kajerbali ñan bukõt ro rekõnan roñjake “news emõn kin juõn men emõnlok.” (Ais. 52:7, NW) Ilo uak ñan book in lelok eo ekãl, elõñ rar bõk copy ko kin Imõniaroñroñ im Awake! ak brochure eo Ta Eo Anij Ekõnan Bwe Jen Kõmmõne? Itoklimo eo emol kin armij rein en kamakit kij ñan bar jeblak ibben aolep ro emol burueir jaar iion ir.—Ken. 3:27.
3 Kejbãrok Record ko Rejejjet: Elõñlok men ko jemaroñ kõtõbraki elañe jej kejbãrok juõn record ededelok im jejjet kin ro rej itoklimo im book ko jaar liloki. Kamelele ko einwõt etan im address eo an ri mweo, ran im awa eo kwar lolok ir, book eo kwar leloke, im katak eo kwar bwebwenato kake enaj jibañ yuk bwe en laplok am bolemen ñe kwoj bar jeblak. Bareinwõt, elañe kwoj jeje jet nan ko ri mweo ear konono kake ilo bwebwenato eo am mokta, kwonaj maroñ eliji ñe kwoj wõnmanlok ilo bwebwenato eo ñe kwoj bar jeblak.
4 Kwon Mõkaj im Kõmman Bar Jeblak ko: Jete ian ro rar bõk book ko jen kwe ilo alliñ eo lok emwij am bar lolok ir? Emotlok ke elõñ week ko ak kwo jañin lolok ir? Itoklimo eo emol kin mour eo air indio en kar kamakit yuk ñan bar jeblak ilo mõkaj, bõlen iloan wõt jet ran ko, bwe kwe im ri mweo jimor maroñ kememej bwebwenato eo. Ilo am mõkaj in jeblak ñan kalaplok air itoklimo, kwonaj maroñ bõprae jibadbad ko an Satan mokta jen ej “bõklok nan eo ar jeor na ilo burueir.”—Mark 4:15.
5 Kebojak Ej Juõn Men Eaorõk: Am bolemen in kõmman bar jeblak ko ej atartar ion joñan an emõn am kebojak. Karõk ta eo kwonaj kõmmane mokta jen kwoj etal. Peij eo tulikin May 1997 Ad Jerbal Ñõn Ailiñ Eo ej kwalok jet ennan ko kwomaroñ kajerbali ñan lo tõbrak ko remõn ñe kwoj lelok magazine ko ak Jen Kõmmõne brochure eo. Eo juõn ej bwe en wõr jet men ko ilo lemnak eo am kwo kõnan bwebwenato ibben kake ñe kwoj bar jeblak. Ta eo kwomaroñ ba ñe kwoj bar jeblak? Ewi wãwen kwomaroñ jino juõn katak kin Bible?
6 Ñe kwoj bar jeblak ñan kowõnmanlok bwebwenato eo kin ta eo rej aikwij kõmmane ñan karreoik lal in im kõmmane bwe en juõn jikin emõn ñan jokwe ion, kwomaroñ ba:
◼ “Ilo ien lotok eo aõ mokta, jaar errã bwe buñten nee ko relap rej aikwij kõmmani mokta jen an lal in maroñ erom juõn paradise eainemõn. Kwoj lemnak ke bwe armij ro ewõr maroñ in ibbeir ñan kõtõbrak jerbal in? [Kõtlok an uak.] Joij im lale etke enaj juõn men in aikwij bwe Anij en bõk kunan ilo makitkit ko an armij.” Konono Sam 37:38. Inem eliklok ñan katak 5 ilo Jen Kõmmõne brochure eo, im kajerbal jet mõttan ko kar kãlete ilo paragraph 4-5 ñan kwalok kin ewi wãwen Anij enaj kajejjet kitien kanan in. Wõnmanlok ilo am tilmaake juõn katak kin Bible ilo kajerbal brochure eo.
7 Elañe kwar bwebwenato kin Ailiñ in Anij im lelok “Jen Kõmmõne” brochure eo ilo ien lolok eo mokta, ñe kwoj bar jeblak kwomaroñ ba juõn ennan einwõt in:
◼ “Ke jaar konono mokta, jaar kile bwe Ailiñ in Anij ej juõn lukkun kien ak government me enaj iroij ion aolepen lal in. Bible eo ej kwalok bwe Christ Jesus eo enaj iroij. Kwomaroñ ke lo jabdewõt tokjen ko ilo an wõr juõn kien im ri tel rot in?” Kõtlok an uak. Kabellok Jen Kõmmõne brochure eo ñan katak 6. Kajerbal point ko kar kãleti ilo paragraph 6-7 im pija eo ilo peij 13, eo ej kwalok kin ta eo Ailiñ in Anij enaj kõmmane ñan armij ro ilo ran ko renaj itok. Konono Daniel 2:44 (NW), im elañe ekkar, kwalok book eo Mour Indrio im tilmaake juõn katak kin Bible.
8 Elañe kwar lo juõn armij me ear errã bwe kabuñ ko an lal in kar kõmman abañ ko ñan armij, kwomaroñ kajitõk men in ilo ien bar jeblak eo:
◼ “Kwo nañin lemnak ke kin ewi wãwen jemaroñ jelã kin kabuñ et eo Anij ej buñburuen kake? [Kõtlok an uak.] Brochure in Ta Eo Anij Ekõnan Bwe Jen Kõmmõne? ej kwalok kin kakõlle ko kakõllan kabuñ eo emol.” Eliklok ñan katak 13, im kalikar point ko lalem kar italicize i ilo paragraph 3-7. Kwomaroñ wõnmanlok ilo am ba: “Bareinwõt ñan ad maroñ lo kabuñ eo emol, jej aikwij jelã ta eo Anij ekõnan bwe kij kajjojo jen kõmmane.” Konono Jon 4:23, 24. Ba bwe kwoj mõnõnõ in naj bar bwebwenato kake men in. Eliklok ñan katak 1 ilo brochure eo, im kwalok kilen jej kõmmane katak eo.
9 Ñe kwoj bar jeblak in wõnmanlok ilo bwebwenato eo kin mour in family elemõnõnõ, kwomaroñ ba juõn ennan einwõt in:
◼ “Ke jaar iion don, Iar bwebwenato ibbam kin men in ittino ak key eo ñan mour in family eo elemõnõnõ, eñin ñan jerbale nan in kakabilek eo ilo Nan eo an Anij, Bible eo. Ñe ej itok ñan etale aikwij ko an juõn family ilo ran kein, kwoj tõmak ke bwe Bible eo ej out-of-date (mor) ak up-to-date (kãl)?” Kõtlok an uak. Kwalok book eo Mour Indrio. Eliklok ñan peij 15 im kajerbal point ko ilo paragraph 18 im 19 ñan tilmaake juõn katak kin Bible einwõt juõn family.
10 Ilo am kejbãrok record ko rejejjet, kõmman bojak ko rej men in aikwij, im bar jeblak ilo mõkaj ñan kalaplok air itoklimo, jemaroñ kwalok yokwe eo ñan ri turid me enaj kareel ir ñan ial eo ñan bõk lomor.—Mat. 22:39; Gal. 6:10.