Kwoj Jerbal ke ñan am Tõbar juõn Mejenkajjik?
1 Jehovah ej juõn Anij in karõk. (Ais. 55:10, 11) Jej bõk rejañ ñan kajeoñe e. (Ep. 5:1) Emol men in en alikar ilo wãwen eo jej kõmmane jerbal in kwalok nan eo ad. Inem ejejjet kajitõk eo: “Kwoj jerbal ke ñan am tõbar juõn mejenkajjik?”
2 Jerbal in kwalok nan eo am jen em ñan em, kwalok nan ilo jabdewõt ien emõn tok, im leto-letak book im magazine ko rej aolep mõttan juõn jerbal in kwalok nan ewõr un ie. Ak kememej bwe jerbal eo kar kakien kij ñan kõmmane ejjab kitibuj ad kwalok nan wõt ak bareinwõt ñan kõmman ri kalor ro. (Mat. 28:19, 20) Elikin ad jeore ine in mol ko kin Ailiñ eo, jej aikwij bar jeblak im utdikdiki im kejbãroki ke jej reilok ñan Jehovah ñan kaddeki. (1 Kor. 3:6) Jej aikwij kate kij ñan kõmman bar jeblak ko im jino Bible study ko.
3 Kalaplok Jerbal in Kwalok Nan eo Am: Ien otemjej jej mõnõnõ ñe jej maroñ reliklok ñan ta eo jaar kõmmane ilo jerbal in kwalok nan eo im ba: “Iar tõbar men eo iar karõk ñan kõmmane.” Einwõt kar je ilo 2 Timote 4:5, Paul ear rejañ: “Kwon kajejit jerbal eo am.” Men in ej koba am kalaplok jibadbad ko ñan bar jeblak ibben aolep armij ro rar kwalok air itoklimo. Ilo schedule in kwalok nan eo am kajjojo week, karõk juõn ien ñan kõmman bar jeblak ko. Jibadõk mejenkajjik eo ñan jino Bible study ko ibben ro jabdewõt ar likit ir bwe ren mour indio. Men in en mejenkajjik eo am ñe kwoj bõk kunam ilo jerbal in kwalok nan.
4 Kajitõk ibben ri kwalok ro kin ewi kar eñjake eo air ke rar lo an ri katak Bible ro air baptais ilo juõn assembly. Rar lañliñ, ilo ejja joñan eo wõt ak meñe elaplok jen ro rar baptais. Rar tõbar juõn mejenkajjik elap! Juõn eo ej kõmman ri kalor ro ear kwaloke ilo wãwen in: “Kõmman ri kalor ro ej melelen elõñlok ri nebar ro an Jehovah. Ej melelen mour ñan ro rej bõk mol eo. Elap an emõn ibba ñan katakin mol eo ñan ro jet—jerbal in kõmman ri kalor ro elap an kabwilõñlõñ! . . . Elõñ ian ro rar kaddeklok yokwe eo air ñan Jehovah rar erom ro mõtta rejitenburu.”
5 Lemnak kin maroñ eo ñan jibañ juõn armij ñan erom juõn ri karejar eo emwij an wujleplok an mour ñan Jehovah! Enaj juõn unin lañliñ elap! Leen rot in ej walok ñe kwoj kõmman jerbal in kwalok nan ilo am lemnak in kõtõbar juõn mejenkajjik.—Kol. 4:17.