Kõnan—Elõñlok Katak kin Bible ko
1 Jehovah Anij ej kajerammõn dolul eo an ilõl kin elap laplok ko. Ilo yiõ in jerbal eo lok, 375,923 rar baptais ibelakin lõl—enañin 1,000 ri kalor ro rekãl ilo kajjojo ran, ak tarrin 43 ilo kajjojo awa! Meñe iumin elõñ yiõ ko ro jeid im jatid rar aikwij kijenmij kin abañ ko ilo mõttan ko jet ilo lõl in, jerbal eo kin Ailiñ eo ej jededlok wõt im rej lo laplok ko rekabwilõñlõñ. Elap an kairujruj ñõn read kin wõnmanlok eo ej walok ñõn kajededlok news eo emõn!
2 Ilo district ko iumin ra eo ilo Guam ilo yiõ in jerbal eo lok, kij bareinwõt jaar lo laplok ko ilo joñan ri kwalok ro im auxiliary pioneer ro, ilo awa ko jaar kajerbali ñõn kwalok nan, im ilo oran booklet ko, brochure ko, im magazine ko jaar leloki. Kar wor juõn laplok kin oran ro rar baptais im bareinwõt kin ro rar bed ilo Kwojkwoj in Kijota eo. Ta kin jerbal in kõmmõn bar jeblak ko im katak kin Bible ko? Kar wor juõn diklok ilo joñan oran bar jeblak ko jaar kõmmõni im juõn diklok jidik kin Bible study ko. Ak, wãwen jerbal kein raorõk ñõn kõmmõn ri kalor ro. Ta eo kij kajjojo jemaroñ kõmmõne ñõn ukõt wãwen diklok in ilo kõmmõn bar jeblak ko im Bible study ko?
3 Kakajurlok Kõnan eo ñõn Kõmmõn juõn Bible Study: Kij make jej aikwij lemnakelok ad kajur ilo jitõb im owõn. Ri kalor ro remol an Christ rej “kijejeto ilo jerbal ko remõn.” (Titus 2:14) Ñe jej etale jerbal eo ad, jemaroñ ke ba bwe jej kijoror ñõn bar jeblak ibben aolep ro rar bõk book ko? Jej kijejeto ke in tilmaake katak kin Bible ko ñõn aolep ro rej kwalok air itoklimo? (Rom. 12:11) Ak jej aikwij ke kaddeklok juõn kõnan elaplok ñõn kõmmõn bar jeblak ko im ñõn kajutak katak kin Bible ko?
4 Read Bible ibbõm make, keini bed ilo kwelok ko, im katak kin book ko renaj kõmmõn bwe jen emmourur ilo jitõb im jitõbõn Anij enaj kakajur kij. (Ep. 3:16-19) Men in enaj kakajurlok tõmak eo ad im liki eo ad ilo Jehovah im yokwe eo ad kin armij. Enaj kamakit kij ñõn katakin mol eo ñõn ro jet, im ilo wãwen in kõmmõn bwe jerbal in kwalok nan eo ad en limo, wor tõbrak, im kamakitkit. Aet, jej aikwij kõnan elõñlok Bible study ko!
5 Katak Ibben Family eo Mokta: Christian ro jemen im jinen me ewor ro nejiir rej jokwe ilo mweo imweir rej aikwij lemnak kin program eo air kin keini air katak Bible einwõt juõn family. (Dut. 31:12; Sam 148:12, 13; Jabõn Kennan 22:6) Enaj lap tokjen ñõn an ro jemen im jinen katak Jen Kõmmõne brochure eo inem book eo Mour Indrio ibben ajiri ro nejiir ñõn keboj ir bwe ren tellokin air ri kwalok ro rejañin baptais im ñõn wujleplok air mour im baptais. Emol, remaroñ etale katak ko jet, ekkar ñõn aikwij eo im rettan ajiri eo. Juõn jemen elañe jab jinen eo ej katak ibben nejin eo ejañin baptais emaroñ bwini katak eo, awa eo, im bar jeblak ko, einwõt rej kalãjrake ilo Box in Kajitõk eo ilo April 1987 Ad Jerbal Ñõn Ailiñ Eo.
6 Kakõmõnmõnlok Kõkkar eo Am Make: Ilo lemnak kin oran magazine ko, brochure ko, im book ko jaar leloki, ejelok bere bwe jaar kajededlok elõñ ine ko. Ine kein in mol eo ewor maroñ eo ñõn kõmmõn ri kalor ro rekãl. Ak juõn ri kõmmõn jikin kallip enaj lukkun juburu ke elañe ej etal wõt in kallip im, elikin an kate e, ejjab bõk ien ñõn madmõde? Jaab. Eindeinlok, juõn jerbal in bar jeblak ej juõn men in aikwij.
7 Ej keini ke am schedule juõn ien ñõn kõmmõn bar jeblak ko? Bar jeblak ilo mõkaj ibben aolep ro rar kwalok air itoklimo. Kõmmõn bar jeblak ko ibben mejenkajjik eo ñõn kajutak juõn katak kin Bible. Kwoj kejbarok ke juõn record ekwon im kãl kin bar jeblak ko am? Ijellokin etan im address eo an ri mweo, jab meloklok in je ran eo kwar lolok e, jabdewõt book ko kwar door ibben, juõn kamelele ekadu kin ta eo kom ar bwebwenato kake, im juõn point me kwomaroñ etale kake ilo ien in tok. Kõmmõn jidik jikin ilo record eo am ñõn je kamelele ko jet kwomaroñ kobaiki elikin kajjojo ien kwoj bar jeblak.
8 Etale Wãwen eo Kwomaroñ Kõmmõn Juõn Bar Jeblak: Ta jet ian point ko kwoj aikwij lemnak kaki ñe kwoj kõmmõn juõn bar jeblak ibben juõn armij eo ej kwalok an itoklimo? (1) Kwon okmãnãn, joij, kijejeto, im jab kijñeñe. (2) Bwebwenato kin katak ko ak kajitõk ko ej itoklimo kaki. (3) Kõmmõn bwe bwebwenato eo en lamwan im bedbed ion Bible eo. (4) Ilo kajjojo ien kwoj lolok e, kate yuk bwe kwon katakin ri mweo kin juõn point me ej kile bwe ewor tokjen ñõn e. (5) Kaitoklimoen kin katak eo komnaj bwebwenato kake ilo ien lotok in tok. (6) En jab to am bed. (7) Jab bõkmantak kajitõk ko me renaj kajook ri mweo. (8) Kajerbal lolokjen bwe kwon jab kananaik lemnak ko rebwid ak manit ko renana an ri mweo mokta jen ear maroñ kaddek juõn kamolol kin men ko lor jitõb.—Lale peij eo iloa an May 1997 Ad Jerbal Ñõn Ailiñ Eo kin jibañ ko jet kin ewi wãwen kwomaroñ lo tõbrak in kõmmõn bar jeblak ko im ñõn kajutak katak kin Bible ko.
9 Etale Aolep Ien Emõn ko: Ilo juõn congregation, rar maroñ bõk etan im address an aolep armij ro rar jokwe ilo juõn apartment me ebin air deloñ ie. Rar je juõn letter ñõn kajjojo armij, im kadeloñ ruo tract ko. Ilo tujemlokin letter eo, rar tilmaake juõn katak kin Bible im kobaik juõn number in telephone ilo bukwon eo bwe armij eo en maroñ uak. Iloan jejjo wõt ran ko, juõn likao ear kir im kajitõk kin juõn katak kin Bible. Ilo ran eo tok juõn rar kõmmõn juõn bar jeblak, im rar kajutak juoN Bible study ilo book in Knowledge. Ilo boñin ejja ran eo wõt ear bed ilo congregation Book Study eo, im ear wõnmanlok im bed ilo aolep kwelok ko. Ilo mõkaj, ear jino an keini an read Bible im kõmmõn wõnmanlok ñõn an baptais.
10 Ri kwalok ro ilo juõn kumi rar karõk ñõn kõmmõn bar jeblak ko ibben don. Ke juõn ian sister ro ear kõmmõn bar jeblak eo an, armij eo ear bukõte ear jako, ak bar juõn jiroñ ear uake kejam eo ke ear kallallal, im ba: “I ar kõttar wõt yuk.” Ilo juõn ien lok iman ri mweo ear bõk Knowledge book eo jen juõn mõttan. Ilo ien eo sister ro rar kir, emwij an kar readi book eo ruo allen im ear bwilõñ kake. Ear ba bwe ear jab bwilõñ ñõn lo Ri Kennan ro ilo ran eo kinke ear jar bwe ren kar itok im katak Bible eo ibben. Rar katak Bible ibben, ear jino bed ilo kwelok ko an congregation, im ear kõmmõn wõnmanlok ko ilo mõkaj.
11 Juõn sister, eo ear baptais enañin 25 yiõ ko, ear lelok ilo ran kein juõn Knowledge book ñõn jinen. Jinen, eo ej juõn ian ro uan juõn kabuñ, ear jino readi book eo. Elikin an kajemlok an read ruo katak ko, ear kir kõra eo nejin im, ñõn bwilõñ eo an nejin, ba: “I kõnan erom juõn ian Ri Kennan ro an Jehovah!” Jinen ear jino katak im emwij kiõ an baptais.
12 Kajeoñ in Kajerbal Nan in Rejañ Kein: Kwo nañin ke kajerbal direct approach eo (kajju im kajitõk) ñõn jino Bible study ko? Kwomaroñ ba ilo lamwan: “Elañe kwo kõnan katak Bible ilo ejelok wõnãn, iumin jet wõt minute ko I maroñ kwalok ñõn kwe kin ewi wãwen kimij kõmmõne. Elañe kwoj mõnõnõ, kwomaroñ wõnmanlok.” Elõñ armij rejjab makoko in bõk nan in jiroñ rot kein, im rej mõnõnõ in lale wãwen kõmmõn juõn katak kin Bible.
13 Jen jinoin, kwalok ñõn ri katak eo kin ewi wãwen emaroñ keboj lok iman kin katak eo ilo an lale eon ko rejjab elij kadede nan ko im ñõn kakõlleik jejjo wõt nan ko ñõn uake kajitõk ko. Lemnakelok wõt point ko relap. Meñe jej aikwij jela ukoktak ilo jet wõt katak ko ilo jinoin, ej juõn men eaorõk bwe en keini air katak Bible. Lemnak kin ewi wãwen kwonaj bõkmantak kin jar einwõt juõn mõttan earorõk ilo katak eo im ewi wãwen kwonaj kajerbal Jeje ko ñõn keboj ri katak eo ñõn jelmae jumae. Ilo wãwen otemjej, kõmmõn bwe ien katak eo en kamõnõnõ!
14 Emol, ejjab aolep ri katak ro renaj wõnmanlok ilo ejja joñan eo wõt. Jet rejjab lukkun itoklimo ilo men ko lor jitõb einwõt ro jet ak ejjab mõkaj air melele men ko rej katakin ir kake. Ro jet reboub im ejjab maroñ bwe ien ñõn kadedelok aolepen juõn katak ilo kajjojo week. Kin men in, jet ien emaroñ juõn men in aikwij ñõn bõk elõñlok jen juõn ien katak ñõn etale jet katak ko im elõñlok alliñ ko ñõn kadedelok air katak aolepen book eo. Jet ien jemaroñ katak Jen Kõmmõne brochure eo mokta inem wõnmanlok ñõn book eo Mour Indrio. Men in, ijellokin air bed ilo kwelok ko an congregation eo, naj jibañ kajjojo ri katak ñõn ejaak juõn bedbed ebin ilo mol eo.
15 Ilõñ in men otemjej, jar kin juõn Bible study! (1 John 3:22) Juõn ian jerammõn ko relaptata an juõn ri Christian ej ñõn an Jehovah kajerbal e ñõn jibañ juõn armij ñõn erom juõn ri kaloran Jesus Christ. (Jerbal 20:35; 1 Kor. 3:6-9; 1 Tes. 2:8) Kiõ ej ien ñõn kwalok elap kijejeto ilo jerbal in katak Bible, im lukkun liki ilo kajerammõn an Jehovah kin jibadbad ko ad ñõn jino elõñlok Bible study ko!
[Naan ko ilo peij 3]
Kwoj jar ke ñõn jino juõn Bible study ekãl?