Kalaplok Beran eo Am Ñõn Kõmmõn Bar Jeblak ko
1 Kwoj mõnõnõ ke in kõmmõn bar jeblak ko? Elõñ ri kwalok ro rej. Kwomaroñ kar mijak ilo jinoin, elaptata ñe kwoj bar jeblak ibben armij ro ear jab lap air kwalok air itoklimo ke kwar iion ir mokta. Ak ñe kwoj ‘beranlok ilo am Anij bwe kimin konono ñõn kom gospel an Anij’ ilo kõmmõn bar jeblak ko, kwomaroñ bwilõñ in lo joñan an bidodo im wor tokjen men in. (1 Tes. 2:2) Ewi wãwen an eindein?
2 Kin juõn men, ewor juõn oktak elap ikõtan juõn bar jeblak im ien lolok eo mokta. Bar jeblak eo kwoj kõmmõne ibben juõn armij kwoj jela kajjen, jab ibben juõn ruamaejet, im ekkã an bidodolok bwebwenato ibben juõn armij kwoj jela kajjen jen ibben juõn ruamaejet. Ikijen tokjen ko relap me rej walok jen am bõk kwunam ilo jerbal in, bar jeblak ko remaroñ tellok ñõn katak kin Bible ko ewor tokjeir.
3 Ñe jej jerbal jen em ñõn em, elõñ alen jej kebak armij ro rar jab lukkun itoklimo ke jar lolok ir mokta. Inem, etke jej wõnmanlok im lolok ir? Jej kile bwe wãwen ko ibben armij remaroñ oktak im bwe juõn armij me ear einwõt jab kea ak meñe jumae ilo ien eo mokta emaroñ kwalok an itoklimo ñe jej bar lolok e. Kin men in ilo lemnak eo ad, en emõn ad kabojak im jar kin kajerammõn an Jehovah bwe juõn men me jej ba ilo ien in enaj kammakit e ñõn uak ilo emõn.
4 Elañe, ilo jerbal eo ad jen em ñõn em, jej ilo mõnõnõ kwalok nan ñõn armij ro me rar jab kwalok air itoklimo ñõn jidik, en jab laplok ke ad mõnõnõ ñõn bar jeblak ibben jabdewõt armij me rej kwalok air itoklimo ilo ennan in Ailiñ eo?—Jerbal 10:34, 35.
5 Elõñ iar jej bed ilo mol eo rainin kinke juõn ri kwalok ilo tiljek ear kõmmõn bar jeblak ko ibbed. Elañe kwoj juõn ian rein, kwomaroñ kajitõk ibbõm make: ‘Ta lemnak eo mokta kin ña Iar kõmmõn ibben ri kwalok eo? Iar bõk ke ennan in Ailiñ eo ilo mõkaj ke ij kab roñ kake? Ear einwõt Iar jab kea ke? Jej aikwij mõnõnõ bwe ri kwalok eo ear jeblak ibbed ear watok kij tellokin juõn bar jeblak, ‘beranlok ilo am Anij bwe kimin konono,’ kõmmõn bar jeblak eo, im wõnmanlok ñõn katakin kij mol eo. Ta kin ro rar kwalok air itoklimo ilo jinoin ak tokelik rar einwõt kũttiliek jen kij? Juõn lemnak emõn ej aorõk, einwõt experience in tok ej kwalok kake.
6 Ke rar jerbal iturin ial ilo juõn jibboñ, ruo ri kwalok ro rar iion juõn kõrã eo ear bwilli stroller (wan ajiri) eo. Kõrã eo ear bõk juõn magazine im kirtok sister ro ñõn mweo imõn ilo Sunday in tok. Rar tõkeaktok ilo ien eo ejejjet, ak ri mweo ear jiroñ ir bwe ear ejelok ien an konono. Bõtap, ear kallimur bwe enaj wor an ien ilo week in tok. Sister ro rar bere bwe enaj kar kajejjet appointment eo, ak kõrã eo ear kõtar ir ke rar jeblak. Rar jino juõn Bible study, im wõnmanlok an kõrã eo ear kabwilõñlõñ. Iloan wõt juõn ien ekadu, ear jino keini an bed ilo kwelok ko im bõk kwunan ilo jerbal in kwalok nan. Kiõ emwij an baptais.
7 Kõmmõn Bedbed eo ilo Ien Lolok eo Mokta: Bedbed in juõn bar jeblak ewor tõbrak ie ekkã air kõmmõne ilo ien lolok eo mokta. Lukkun roñjake nan ko an ri mweo. Ta eo rej ba ñõn kwe. Elap an tõmak ke ilo kabuñ? Ej inebata ke kin aitwerõk ko kin mour ibben don ilo juõn bukwon? Ej itoklimo ke ilo science? history? mejatoto? Ilo jemlokin lolok eo, kwomaroñ bõkmantak juõn kajitõk ej kammakit lemnak im kallimur ñõn bwebwenato kin uak eo ñe kwonaj bar jeblak.
8 Ñõn wanjoñok, elañe ri mweo ej uak ilo emõn ñõn kallimur eo an Bible kin juõn paradise ion lõl, juõn bwebwenato elaplok kin katak in emaroñ ekkar. Mokta jen kwoj etal, kwomaroñ kajitõk: “Ewi wãwen jemaroñ liki bwe Anij enaj kajejjet kallimur in?” Inem kobaiktok: “Bõlen I maroñ itok ñe ro jet ilo family in rej bed, inem I maroñ kwalok ñõn kom uak eo an Bible ñõn kajitõk in.”
9 Elañe ri mweo ear jab kwalok an itoklimo ilo jabdewõt katak, kwomaroñ bõkmantak juõn ian kajitõk ko rej walok ilo ennan ko ilo peij eo tu-lik in Ad Jerbal Ñõn Ailiñ Eo im kajerbale einwõt bedbed in bwebwenato eo am tokelik.
10 Kejbarok Record ko Emwij Jeje me Rejejjet: Record in jen em-ñõn-em eo am ej aikwij jejjet im dedelok. Je etan im address eo an ri mweo ilo ien eo wõt kwoj illok jen mweo. Kwon jab antone kin number in mweo ak etan ial eo—lale information eo ñõn kamol bwe rejejjet. Je juõn kamelele kin armij eo. Je katak eo kwar bwebwenato kake, eon ko kwar readi, jabdewõt book ko kwar doori, im kajitõk eo kwonaj uake ñe kwonaj bar jeblak. Kobaik ran eo im awa eo kin lolok eo mokta im ñãt kwar ba bwe kwonaj bar jeblak. Kiõ ededelok record eo am, jab luji! Likiti ilo juõn jikin eban jako bwe kwon maroñ lale tokelik. Lemnak wõt kin armij eo im ewi wãwen kwonaj kõmmõn bar jeblak eo ñe kwonaj bar jeblak.
11 Jela Ta Mejenkajjik ko Am: Mokta, ilo am joij, kõmmõn joñan wõt am maroñ bwe ri mweo en ainemõn. Kwalok bwe kwoj itoklimo ilo e einwõt juõn armij, ilo am jab lukkun kajnõt. Jeltokin, kakememej e kin jabdewõt kajitõk kwar bõkmantak ilo ien lolok eo mokta. Lukkun roñjake kin lemnak eo an, im kwalok am kamolol kin nan ko an. Inem, kwalok kin etke lemnak ko ilo Bible rekeie. Elañe emaroñ, kareilok e ñõn juõn lemnak einlok wõt ilo book eo Kwo Maroñ Mour Indrio ilo Paradise ion Lõl. Lemnak bwe mejenkajjik eo am elaptata ñe kwoj kõmmõn bar jeblak ko ej ñõn kajutak juõn katak kin Bible.
12 Kin an kajju book eo Mour Indrio ear kamakit elõñ iad ñõn ‘beranlok’ ilo Bible study ko ñõn rejañ ri katak ro ñõn bed ilo kwelok ko im koba ibben dolul eo an Jehovah. Ilo ien ko remotlok, jaar kõtar mae ien eo ri katak eo ear katak iumin juõn ien eaetok mokta jen jaar kirtok ir ñõn koba ibbed. Kiõ, elõñ ri katak ro rej bed ilo kwelok ko jen ien eo wõt rej jino katak, im tokjen men in emõkajlok air wõnmanlok.
13 Ruo ri belele ro rar kwalok nan ibben juõn ri jerbal mõttair. Ke ear kwalok an itoklimo ilo mol eo, rar kajitõk ibben elañe ear kõnan katak Bible ilo book eo Mour Indrio. Ilo ejja ien eo wõt, rar jiroñ e bwe enaj emõn elañe ej bed ilo kwelok ko, ijo enaj uake elõñ ian kajitõk ko an. Emaan eo ear mõnõnõ ejjab ñõn katak wõt ak ear katak ruo alen ilo juõn week im ear keini an bed ilo kwelok ko ilo Kingdom Hall eo.
14 Kajerbal Brochure eo Ta Eo Anij Ekõnan Bwe Jen Kõmmõne?: Brochure eo Ta Eo Anij Ekõnan Bwe Jen Kõmmõne? ekeie ñõn jino katak kin Bible ko ibben armij ro rej mijak Anij jekdon ta level in jelalokjen eo air. Ebed iloan juõn katak ebolemen kin irinekatak ko ilo Bible. Brochure eo ej juõn kein jerbal ebolemen ñõn lelok jelalokjen eo kin Anij. Ej kameleleik mol eo ilo alikar im lamwan bwe kij aolep jenaj maroñ kajerbale ñõn katakin ro jet kin men in aikwij ko an Anij. Bõlen, elõñ ri kwalok ro enaj wor jerammõn eo ñõn tel juõn katak kin Bible ilo brochure in.
15 Jet armij ro me rej eñjake bwe ejjab bwe ien eo air ñõn katak book eo Mour Indrio remaroñ mõnõnõ ñõn bõk jidik ien ñõn katak Jen Kõmmõne brochure eo. Renaj bwilõñ kin ta eo rej katak! Ilo ruo ak jilu wõt peij ko, renaj lo uak ko ñõn kajitõk ko me armij ro rar lemnak kaki iumin elõñ ebeben ko: Wõn Anij? Wõn Devil eo? Ta karõk eo an Anij kin lõl in? Ta in Ailiñ eo an Anij? Ewi wãwen jemaroñ lo kabuñ eo emol? Meñe brochure eo ej kwalok mol eo ilo juõn wãwen elamwan, ennan eo elap an kajur. Ej etale point ko relap me elder ro renaj etali ibben ro rekõnan baptais im emaroñ jerbal einwõt juõn buñten ne ñõn juõn katak emwilõllok ilo book eo Mour Indrio.
16 Ñõn lelok juõn katak kin Bible ilo juõn bar jeblak, kwomaroñ ba ilo lamwan: “Kwar jela ke bwe ilo am bõk jet wõt minute ko, kwomaroñ lo uak eo ñõn juõn kajitõk eaorõk ilo Bible?” Inem, kwalok juõn kajitõk me ej walok ilo jinoin juõn ian katak ko ilo brochure eo. Ñõn wanjoñok, elañe kwoj jeblak ibben juõn armij eo eritto, kwomaroñ ba: “Jej jela bwe ilo ien ko remotlok Jesus ear kemour armij. Ak ilo ran ko renaj itok, ta eo Jesus enaj kõmmõne kin ro renañinmij? ritto ro? ro remij?” Uak ko jemaroñ lale ilo Katak 5. Juõn armij eo elap an tõmak ilo kabuñ jemaroñ kaitoklimoen kin kajitõk in: “Anij en roñjake ke jar ko otemjej?” Rej uake ilo Katak 7. Ro uan family eo remaroñ kõnan jela: “Ta eo Anij ekõnan jen jemen im jinen im ajiri ro?” Renaj jela kake ñe rej katak Katak 8. Kajitõk ko jet rej: “Ro remij remaroñ ke kokkure ro remour?” rej kamelele kake ilo katak 11; “Etke ewor elõñ kabuñ ko me rej ba rej Christian?” rej etale kake ilo katak 13; im “Ta eo kwoj aikwij kõmmõne ñõn erom juõn jeran Anij? eo rej katak kake ilo katak 16.
17 Jiban Ro Rej Konono Bar Juõn Kajin: Ta kin ri mweo ro me rej konono bar juõn kajin? Elañe emaroñ, rej aikwij katakin ir ilo kajin eo elaptata air jela kake. (1 Kor. 14:9) City overseer eo (ak ilo bukwon eo, circuit overseer eo) emaroñ lelok information ikijen foreign-language congregation ko im kumi ko ilo jikin eo. Inem secretary eo enaj maroñ jilkinlok jabdewõt Foreign Language Follow-Up Slips (S-70a) ej bõk jen ro uan congregation eo ñõn foreign-language congregation ak kumi eo ekkar. Elañe ejelok congregation ko ak kumi ko rej bed ebak im ejelok ri kwalok ro ilo bukwon eo emaroñ konono kajin eo an ri mweo, ri kwalok eo emaroñ katak ibben ri mweo, ilo an kajerbal Jen Kõmmõne brochure eo ilo ruo kajin ko.
18 Juõn ri kwalok eo ej konono kajin English ear jino juõn katak ibben juõn emaan eo ej konono kajin Vietnam im lio belen, eo ej konono kajin Thai. Book ko im Bible ko ilo kajin English, Vietnam im Thai kar kajerbali ilo katak eo. Meñe abañ eo kin kajin ear juõn aitwerõk ilo jinoin, ri kwalok eo ear jeje: “eddeklok eo ilo jitõb an ri belele rein ruo ear mõkaj. Rar lo aikwij eo ñõn jino bed ilo kwelok ko ibben ajiri ro ruo nejiir, im rej konono Bible kajjojo boñ einwõt juõn family. Ledik eo nejiir jiljino an yiõ ej tel Bible study eo an make.”
19 Ñe jej katak ibben armij ro rej konono bar juõn kajin, kadikdik am konono, ba nan ko ilo alikar, im kajerbal nan ko rebidodo. Bõtab, likiti ilo am lemnak bwe armij ro rej konono bar juõn kajin jej aikwij jerbal ibbeir ilo kautiej. Jen jab jerbal ibbeir einwõt ñe rej ajiri ro.
20 Kortokjen pija ko reaibujuij ilo Jen Kõmmõne brochure eo. Elañe “juõn pija ej konono juõn thousand nan ko,” pija ko relõñ ilo brochure eo ej kamelele kin elõñ men ko ñõn ri mweo. Kajitõk ibben ñõn read eon ko ilo Bible eo an make. Elañe katak eo remaroñ kõmmõne ilo ien eo ñe juõn uan family eo ej jela kajin English emaroñ ukok, ejelok bere enaj wor tokjen.—Lale Our Kingdom Ministry ilo kajin belle, October 1990, peij 7-8; March 1984, peij 8.
21 Kõmmõn Bar Jeblak ko ilo Mõkaj: Ewi aetokin kwoj aikwij kõtar mokta jen kwoj kõmmõn juõn bar jeblak? Jet ri kwalok ro rej bar jeblak elikin juõn ak ruo ran ko. Ro jet rej jeblak tokelik ilo ejja ran eo wõt! Elab an mõkaj ke? Emakijkij an ri mweo eo jab abõnõnõ kake. Ekkã an ri kwalok eo ej kõmmõn call eo ej aikwij kaddek juõn lemnak emõn im bareinwõt jidik beran. Lemnak kin experience kein tok.
22 Juõn ri kwalok 13 an yiõ ear jerbal jen em ñõn em juõn ran ke ear lo ruo kõrã ro rej etetal ibben don. Ilo an lemnak kin nan in rejan eo ñõn kwalok nan ibben armij ilo jabdewõt jikin ko jej lo ir, ear kebak kõrã rein iturin ial eo. Rar kwalok air itoklimo ilo ennan in Ailiñ eo, im kajjojo rar bõk book eo Mour Indrio. Brother in edik ear bõk address ko air, bar jeblak ruo ran ko tokelik, im jino juõn katak kin Bible ibbeirro kajjojo.
23 Juõn sister ej kõmmõn karõk ko ñõn bar jeblak ilo week eo tok juõn. Ak juõn ak ruo ran ko elikin lolok eo mokta, ej bojrak ñõn lelok ñõn ri mweo juõn magazine kin katak eo rar bwebwenato kake. Ej ba ñõn ri mweo: “Iar lo katak in im lemnak bwe kwonaj kar kõnan readi. I jab maroñ konono kiõ, ak I naj bar jeblak ilo elikin raelep in Wednesday einwõt jaar karõke. Ien eo ej emõn wõt ke ibbõm?”
24 Ñe juõn armij ej kwalok an itoklimo ilo mol eo, jemaroñ liki bwe enaj iion jumae ilo juõn wãwen ak bar juõn. Ad bar jeblak ilo mõkaj enaj kakajurlok e ñõn kijenmij jabdewõt ijibed ko enaj jelmaeki jen ro nukun, ro jeran ebak, im ro jet.
25 Kaitoklimoen Ro Jaar Lo Ir ilo Jikin ko Ilobwilij: Elõñ iad jej mõnõnõ in kwalok nan iturin ial ko, ilo jikin park wa ko, ilo taxi ak bus ko, ilo jikin kaikujkuj ko, ilo jikin kallip ko, im men ko eierlok wõt. Ijellokin ad lelok book ko, jej aikwij kaitoklimoir. Ñõn jemlok in, jej aikwij kõmmõn juõn jibadbad ñõn bõk etan, address eo im, elañe emaroñ, number in telephone eo an kajjojo armij ro rej itoklimo jej iioni. Ejjab bin einwõt kwoj lemnak ñõn bõk information in. Ñe bwebwenato eo ej ebak an jemlok, kwalok book in jeje eo am im kajitõk: “Ewor ke jabdewõt wãwen jemaroñ wõnmanlok kin bwebwenato in ilo bar juõn ien?” Ak ba: “I kõnan bwe kwon read juõn katak me ij lemnak enaj kaitoklimoem. I maroñ ke bõktoke ñõn mweo imõm ak office eo am?” Juõn brother ej baj kajitõk: Number in telephone et eo I maroñ tõbar yuk ie?” Ear report bwe iumin jilu alliñ ko aolep ijellokin jilu armij rar mõnõnõ in lelok ñõn e telephone number ko air.
26 Kajerbal Telephone eo ñõn Bukõt im Kaddek Itoklimo: Juõn sister eo ej pioneer ej kajerbal telephone eo ñõn jibadõk armij ro rej jokwe ilo high-security building ko. Ej bareinwõt kõmmõn bar jeblak ko ilo ejja wãwen eo wõt. Ilo ien lolok eo mokta, ej ba: “I jela kwo jaje kajjiõ. Ij kõmmõn juõn jibadbad ejej uan ñõn kebak armij ro ilo bukwon eo am ñõn jake jibwil kin juõn lemnak jen Bible eo. Elañe ewor jidik am ien, I kõnan read kallimur eo jemaroñ loe ilo . . .” Elikin an read eon eo, ej ba: “Ejamin emõn ke elañe jemaroñ lo an ien eo itok? Iar mõnõnõ in read wõj eon in. Elañe kwar mõnõnõ bareinwõt, I kõnan bar call wõj im bwebwenato kin bar juõn eon.”
27 Ñe ej bar telephone lok, ej kakememej ri mweo kin bwebwenato eo air mokta im ba bwe ekõnan read jen Bible eo kin ta wãwen ko renaj walok ñe ejako aolep men ko renana. Inem ej bwebwenato jidik ibben ri mweo kin Bible. Elikin elõñ bwebwenato ko ilo kajerbal telephone, 35 armij ro rar kirtok e ñõn moko imweir im kar kajutak jiljilimjuõn Bible study ko. Jet ien ej bin ke ñõn kõmmõn bar jeblak ko ibben armij ro rej itoklimo ilo alliñ in bio ko kinke ekauatata ial ko, ej ice mejatoto, ak kin nañinmij? Elañe eindein, etke kwojjab kebak ir ilo am kajerbal telelphone eo?
28 Bar Jeblak Ibben Ro Rej Itoklimo Kwar Lo Ir ilo Jikin Business: Elõñlok men ko ekoba ilo am jerbal jen mõn wia ñõn mõn wia jen am baj lelok wõt magazine ko. Elõñ ri lale mõn wia ewor juõn itoklimo emol ilo mol eo, im kwoj aikwij kaddeklok itoklimo in. Ilo jet case ko, kwomaroñ kõmmõn bwebwenato kin Bible eo ak meñe juõn katak kin Bible ijo ilo jikin business eo. Ilo case ko jet, kwe im armij eo ej itoklimo maroñ iion don ilo juõn ien kakije ilo elikin raelep ak ilo bar juõn ien emõn.
29 Juõn overseer eo ej ito-itak ear kebak juõn owner in juõn mõn wia edik im ba bwe ej mõnõnõ in kwalok kilen katak Bible. Ke ear kajitõk kin ewi aetokin ien eo enaj bõke, overseer eo ej ito-itak ear ba 15 wõt minute ko. Elikin men in, ri lale mõn wia eo ear katoto juõn sign ion kejem eo: “Naj bar jeblak ilo 20 minute ko,” kwalok ruo chair ko, im irro rar etale paragraph ko lalim mokta ilo book eo, Knowledge That Leads to Everlasting Life (Jelalokjen eo Ej Tellok Ñõn Mour Indio). Emaan in emol buruen joñan an kar bwilõñ kin ta eo ear katak kake ear bed ilo Public Meeting im Watchtower Study ilo Sunday eo im ear errã ñõn wõnmanlok ilo katak eo ilo week eo tok juõn.
30 Ñõn tilmaake juõn katak kin Bible ilo juõn jikin business, kwomaroñ ba men in: “Program in katak Bible eo am ej bõk 15 minute ko ñõn kwalok kilen. Elañe ej emõn, I naj mõnõnõ in kwalok ñõn kwe kin ewi wãwen kimij kõmmõne.” Inem, jab le jen joñan minute ko. Elañe ejjab maroñ wor juõn bwebwenato eaetok ilo jikin business eo, emaroñ ekkar lok ñõn jeblak ibben ri lale mõn wia eo ilo mweo imõn.
31 Bar Jeblak Meñe Kwar Jab Lelok Jabdewõt Book: Jabdewõt itoklimo ej tellokin juõn bar jeblak, meñe rar lelok book ko ak jab. Bõtab, elañe ej alikar bwe ri mweo ejjab itoklimo ilo ennan in Ailiñ eo, enaj emõnlok ñõn kõtellok jibadbad ko am ilo bar juõn jikin.
32 Ilo jerbal eo jen em-ñõn-em, juõn sister ear iion juõn kõrã eo ear joij ak ear makoko in bõk magazine ko. Ri kwalok eo ear je: “Iumin elõñ ran ko I ar lemnak kin e im bebe bwe I ar kõnan bar konono ibben.” Eliktata, sister eo ear jar, kalaplok an beran, im kalallal ion kejem eo an kõrã eo. Ñõn mõnõnõ eo an ri mweo ear kadeloñ e. Ear jino juõn katak kin Bible, im rar bar katak ilo ran eo tok juõn. Eliktata, ri mweo ear deloñ ilo mol eo.
33 Kõmmõn Karõk lok Iman ñõn Kõtõbrak Elõñ Men ko: Rej rejañ bwe jet ien ren kajerbale ilo kajjojo week ñõn kõmmõn bar jeblak ko. Elap men ko remaroñ kõtõbraki ñe ej emõn karõk lok iman. Kalãjrak bar jeblak ko ilo ejja jikin eo kwonaj jerbal ie jen em ñõn em. Ñe kwoj kajerbal juõn wa, kumi eo en dik wõt bwe en wor ien emõn ñõn aolep ñõn kõmmõn bar jeblak ko. Ri kattõr eo ej aikwij jela lok iman tu-ia bar jeblak ko rej bed ie bwe en bõprae an tarto tartak.
34 Ro ewor tõbrak in kõmmõn bar jeblak ko im kajutak katak kin Bible ko rej ba bwe eaorõk ñõn kwalok juõn itoklimo emol kin armij im lemnak wõt kin ir meñe emwij am kõmmõn bar jeblak eo. Ej juõn men in aikwij bareinwõt ñõn an wor juõn katak emõn kin Bible ñõn bwebwenato kake im ñõn kõmmõn bedbed in juõn bar jeblak mokta jen kwoj illok jen lolok eo am moktata. Bareinwõt, eaorõk ñõn jeblak ilo mõkaj ñõn kowõnmanlok itoklimo eo. Mejenkajjik eo ñõn jino juõn Bible study en bed ilo lemnak eo am ien otemjej.
35 Juõn kadkad eaorõk ñõn an wor tõbrak in kõmmõn bar jeblak ko ej beran. Ewi wãwen jemaroñ bõke? Ri jilek Paul ej uak ilo an ba bwe jej ‘beranlok’ ñõn keañ kin news eo emõn ñõn ro jet “ilo am Anij.” Elañe kwoj aikwij eddeklok ilo men in, jar ñõn Jehovah kin jibañ. Inem, ekkar ñõn jar ko am, jeblak ibben aolep ro rej kwalok air itoklimo. Jehovah enaj kajerammõn jibadbad ko am!
[Box eo ilo peij 3]
Wãwen eo ñõn Wor Tõbrak ilo Kõmmõn Bar Jeblak ko
■ Kwalok juõn itoklimo eo emol kin armij.
■ Kãlet juõn katak ekaitoktoklimo ilo Bible ñõn bwebwenato kake.
■ Kõmmõn juõn bedbed ñõn kajjojo ien kwoj bar eblak.
■ Lemnak wõt kin armij eo meñe elikin kwoj illok.
■ Jeblak elikin juõn ak ruo ran ko ñõn kowõnmanlok itoklimo eo.
■ Lemnak wõt kin mejenkajjik eo am ñõn kajutak juõn Bible study.
■ Jar kin jibañ ñõn kalaplok beran kin jerbal in.