Bar Jeblak ko Rej Tellok ñan Bible Study ko
1. Etke jerbal in kõmman bar jeblak elap an aorõk?
1 Jesus ear kakien ri kalor ro an jab ñan kwalok nan wõt ak bareinwõt ñan “kõmõn dri ailiñ ko otemjej bwe ren dri kalora . . . , katakin ir.” (Mat. 28:19, 20) Juõn ri kwalok ej keañ, ak juõn ri katakin ej kõmman elõñlok men ko. Ej kaiñ, kamelele, im lelok nan in kamol ko. Juõn wãwen jej katakin ro jet ej ikijen ad bar jeblak ibben ro rej itoklimo kin mejenkajjik eo ñan jino Bible study ko ibbeir.
2. Wõn ro jej aikwij bar jeblak ibbeir?
2 Wõn ro kwoj aikwij bar jeblak ibbeir? Kwon jeblak ibben aolep ro rej bõk book ko ak bareinwõt ibben ro rej kwalok jidik wõt itoklimo kin news eo emõn. Elañe kwoj iion ro rej kwalok air itoklimo ñe kwoj kwalok nan ilobwilij, kajeoñ in bõk address ak telephone number eo an bwe kwon maroñ kaddeklok itoklimo eo an. Kwon bõk juõn lemnak emõn kin jino Bible study ko. Wõnmanlok im bukõt ro renaj mõnõnõ in bõk juõn katak kin Bible, im ekkã am naj lo ir.—Mat. 10:11.
3, 4. Ta eo ekoba ilo kõmman bar jeblak ko rekeie?
3 Kwalok Am Itoklimo: Kebojak ñan kõmman juõn bar jeblak emõn ej ijjino ilo lolok eo mokta. Ri evanjel ro me rej lo tõbrak rej lale ta ko rej kaitoklimoen ri mweo, im rej kajerbali einwõt juõn bedbed kin bwebwenato ko jet. Jet rej lo bwe ewõr tokjen ñan bõkmantak juõn kajitõk ilo tu-jemlokin lolok eo air bwe ren maroñ kaitoklimoen ri mweo kin ien eo renaj bar lolok ir. Itoklimo eo ad emol kin armij ej kõmman bwe jen lemnak wõt kin ir meñe emwij ad etal jen ir, im ej kamakit kij ñan bar lolok ir ilo mõkaj. Elañe emaroñ, kajeoñ in bar jeblak ke rej itoklimo wõt—bõlen elikin juõn ak ruo ran ko.
4 Ñe kwoj bar jeblak, kajeoñ in kalek bwebwenato eo am kin ta eo kwar bwebwenato kake mokta. Kõmman bwe en mejenkajjik eo am bwe kajjojo ien kwon kwalok juõn point ekõketak jen Jeje Ko, im kwon mõnõnõ in roñjake. Kwon kalaplok am jelã kajjen ri mweo. Inem ilo ien ko jet kwoj bar lolok e, kwalok kin mol ko jen Nan in Anij me rej jerbal ñan inebata ko an.
5. Ta kõl eo elamwan jemaroñ kajerbale ñan jino Bible study ko?
5 Kwon Lemnak kin Ien ko Remõn ñan Jino juõn Bible Study: Kwon kõmman bar jeblak ko kin mejenkajjik eo ñan jino juõn Bible study. Ewi wãwen jemaroñ kõmmane men in? Ba bwe kwo kõnan kwalok juõn point ekaitoktoklimo, im jitõñlok ñan juõn paragraph ilo book eo Jelãlokjen ak Jen Kõmmõne brochure eo me kwoj lemnak enaj emõn ñan armij eo. Konono paragraph eo, etale kajitõk eo, im bwebwenato kin juõn ak ruo eon ko rej kwalok kaki. Kwomaroñ kõmmane men in iturin wõt kejam eo an ri mweo iumin lalem ñan joñoul minute ko. Kajemlok ilo am kwalok kajitõk eo tok juõn im kõmman karõk ko ñan wõnmanlok kin bwebwenato eo ilo bar juõn ien.
6. Ewi wãwen ad maroñ kwalok bwe je melele kin aorõkin kõmman bar jeblak ko?
6 Kaddeklok itoklimo eo an aolep ro jej iion ir ej juõn wãwen eaorõk ilo jerbal in kwalok nan eo ad. Kin men in, karõk ien ko ilo schedule eo am kajjojo week ñan kõmman bar jeblak ko. Ilo am kõmmane men in enaj kalaplok am bolemen ilo jerbal in kwalok nan eo am im bõktok mõnõnõ eo emol.