Jibañ “Ro Jabrewõt Ar Likit Ir Bwe Ren Mour In Drio”
1 Kadkadin kajjojo armij ewõr okar ko ilo buru eo buruen kõkkar. (Mat. 12:35) Bible eo ej konono kin juõn eo “buruen tõrinae wõt.” (Sam 55:21) Jet rej armij e illu. (Ken. 29:22) Ak ewõr ro bareinwõt me rej ian “ro jabrewõt ar likit ir bwe ren mour indrio.” (Jerbal 13:48) Ilo ran kein ad, Jehovah ej kokweloktok ñan e armij rein emõn burueir. (Hag. 2:7, NW) Ewi wãwen jemaroñ jibañ ir ñan erom ri kabuñ ro an Jehovah?
2 Niknik in Bar Jeblak: Bõk juõn lemnak ejimwe ikijen kõmman bar jeblak ko eaorõk bwe jen kajejjet kitien jerbal eo ad ñan kõmman ri kalor ro. (Mat. 28:19, 20) Jej mõkaj ke im lolok ro rej kwalok air itoklimo? Jej bar jeblak ke ibben aolep ro rar bõk book ko ak rej kwalok air itoklimo ilo news eo emõn? Jej kate kij ke ilo jibadbad ko ad ñan jibañ ir ñan eddeklok ilo jitõb? Kinke ej kitibuj mour an armij, jej aikwij jibadõk ñan kaddeklok jabdewõt itoklimo jej iioni.
3 Ke jej kememej wõt bwebwenato eo ad ibben juõn armij eo ear kwalok an itoklimo, bõk jidik ien ñan je etan im address eo an. Jej aikwij je ta eo jaar bwebwenato kake, jabdewõt eon ko jaar readi, im ta book ko kar lilok ñan e. Tokelik, kememej ñan bar jeblak ilo ien eo emõkajtata.
4 Kõmman juõn Bar Jeblak: Ñe kwoj bar jeblak, elap an jibañ elañe kwoj kwalok juõn jitõb emãnãn im joij im kwalok am itoklimo kin ri mweo. Kõmman bwe bwebwenato eo en lamwan im wawa ion Bible eo. Keboj juõn katak kin Bible ekaitoktoklimo ñan bwebwenato kake, im ilo jemlokin ien lolok eo, bõkmantak juõn kajitõk me kwomaroñ uake ilo trip in tok. Elañe ejjab juõn men in aikwij, kwon bõprae am aitwerõke lemnak ko rebwid me ri mweo emaroñ kwaloki. Bwebwenato kin katak ko me komro jimor komij errã kaki.—Kol. 4:6.
5 Ej aikwij wõr kate ñe jej kõmman bar jeblak ko, bõtab tokjen ko rej kajuburu. Juõn pioneer ilo Japan ear likit juõn mejenkajjik ñan kalaplok an kõmman bar jeblak ko kajjojo alliñ. Ear jino kõmmane juõn record in aolep ro ear iione ir ilo jerbal in kwalok nan jen em-ñan-em, im mokta jen an motlok jiljilimjuõn ran, ear bar jeblak ibbeir. Ear lukkun kebojak kin ta eo enaj ba im ear kõmmane jerbal in kwalok nan eo an ilo liki ennan eo ej kwalok kake. Ibben juõn ian ro ear bar jeblak ibbeir, ear maroñ jino juõn Bible study ibben juõn armij eo ear ba: “Aolep ien iar makoko in kadeloñ kom. Ej kab juõn alen iar roñjake.” Kate eo eyokwe an pioneer eo ear bõktok tokjen ko remõn. Ilo jemlokin alliñ eo ear reporte joñoul Bible study ko.
6 Wãwen ko ibben armij rej oktak jen ien ñan ien. (1 Kor. 7:31) Ekkã am aikwij bar jeblak elõñ alen mokta jen kwomaroñ lo armij eo ej itoklimo. Ilo ad tiljek in bar jeblak, jemaroñ jibañ ro emõn burueir ñan deloñ ilo ial eo ej tellok ñan mour indio.—Mat. 7:13, 14.
[Kajjitõk ko]
1. Wõn ro Jehovah ej kokweloktok ñan e make ilo ran kein ad?
2. Ta eo ej kitibuji ilo ad kajejjet jerbal eo ad ñan kõmman ri kalor ro?
3. Ta eo jej aikwij kõmmane elikin ad bwebwenato ibben juõn armij ilo jerbal in kwalok nan eo ad?
4. Ewi wãwen jemaroñ kõmman bar jeblak ko rebolemen?
5. Ta jibadbad eo juõn pioneer ear kõmmane, im ta tokjen eo?
6. Etke jej aikwij kate kij ñan kõmman bar jeblak ko?