Atartar ion Jehovah ñõn Kaddeklok Men ko
1 “Ij kab lo juõn alen lõñliñ eo ejej uan ñõn jibañ kajutak juõn congregation ekãl. Men in ear bõk elaplok jen ruo yiõ ko kin jerbal ko rebin, jar ko wõt im liki Jehovah eo ej ‘kadreklok men ko.’” Eindein an juõn pioneer eo ej kate e ear je eo ear katak kin aikwij eo ñõn atartar ion Jehovah ñõn kaddeklok. (1 Kor. 3:5-9, NW) Ilo ad bukõt armij ro rej itoklimo kin men ko ilo jitõb, kij bareinwõt jej aikwiji jibañ jen Jehovah elañe jerbal eo ad enaj wor leen.—Jabõn Kennan 3:5, 6.
2 Ñõn Eddeklok Ej Aikwij Wor Kejbarok: Ineen mol eo ej aikwij wor kejbarok elañe enaj eddeklok. Bar jeblak elikin juõn ak ruo ran ko jen ien eo mokta kwar iion ir ekkã an kwalok tokjen ko remõn. Kwon joij im kwalok jitõb in jimjerã. Kõmmõn bwe armij eo juõn en ainemõn. En jab kwe wõt kwoj konono. Kõtlok bwe en jela kajjiõm, im kwalok bwe kwoj itoklimo kin e einwõt juõn armij.
3 Ilo August im wõnmanlok ilo September, jenaj lelok elõñ kain brochure ko ñõn armij ro jej iion ir. Bõtab, jej aikwij bareinwõt bar jeblak ibben aolep ro rej kwalok air itoklimo im ibben ro rar bõk book im magazine ko. Jej kõmmõn men in ilo ad bar jeblak im lelok katak kin Bible ko. (Mat. 28:19, 20) Ñõn jemlok in, jemaroñ kajerbal Jen Kõmmõne brochure eo ñõn jino Bible study ko. Kwomaroñ lo bwe nan in rejañ ko emen tok ilõl renaj juõn men in jibañ.
4 Elañe kwar konono ibben juõn eo ear itoklimo kin an nanalok wãwen ko ilo lõl in, kwomaroñ wõnmanlok ilo bwebwenato eo am ilo am ba:
◼ “Ij tõmak bwe kwoj inebata einwõt ña kin an nanalok mour erreo ibwiljin armij. Jej roñ report ko rekaburomõjmõj kin kowadoñ ilo mour in family, eo ej walok ilo jorrãn ñõn ajiri ro, ro jemen im jinen im ri belele ro. Einwõt elõñ armij rej lemnak bwe ejjab nana riap ak kwot ñõn kajuburu kõnan ko air make. Kwoj lemnak ke bwe Anij ej itoklimo kin ewi wãwen armij rej mour? [Kõtlok an uak.] Anij ear kõmmõn jet kien ko ñõn an armij mour kaki, im rejjab eddo ñõn kij.” Konono 1 John 5:3. Inem kwalok Jen Kõmmõne brochure eo, im kabelloke ñõn katak 10. Konono paragraph eo mokta. Jitõñlok ñõn nan ko rej italicized ilo jinoin paragraph 2-6, im kajitõk ibben ri mweo kin ta manit eo ej lemnak ej men eo elaptata an kauatata ñõn jukjuk im bed eo. Konono paragraph eo ekkar im lale juõn ak ruo eon ko ñe ewor ien. Kajemlok ilo am konono paragraph 7, inem kõmmõn karõk ko ñõn bar jeblak im wõnmanlok kin bwebwenato eo.
5 Ñõn ro kwoj iion ir im rej itoklimo kin mour in family, kwomaroñ ba juõn men einwõt in:
◼ “Kwoj lemnak ke bwe ej juõn men in kammanwa ñõn kõtmene bwe Ri Kõmõnmõn eo enaj letok ñõn kij kein jerbal ko jej aikwiji ñõn kalek juõn mour in family ewor tõkbrak ie? ” Kõtlok an uak. Kwalok Jen Kõmmõne brochure eo, eliklok ñõn katak 8, im kamelele bwe ewor nan in kakabilek ko jen Bible eo ñõn kajjojo uan family eo. Ba bwe kwoj mõnõnõ in kwalok ñõn e kilen kajerbale brochure eo ibben Bible eo ñõn bõk tokjen eo elaptata jen e. Lor nan in jiroñ ko jemaroñ loi ilo peij 2 ilo brochure eo. Kõmmõn karõk ko ñõn bar jeblak ñõn wõnmanlok kin katak eo, ak elañe ededelok ami etale, kwomaroñ katak bar juõn katak me ri mweo ej kãlete ilo brochure eo.
6 Ijin ej juõn wãwen ekajju kwomaroñ kajerbal ñõn tilmaake program eo ad ñõn katak Bible eo. Kwalok “Jen Kõmmõne” brochure eo, im ba:
◼ “Brochure in ewor juõn ial in katak emõn eo ej etale irinekatak ko ilo Bible. Ilo kajjojo peij, kwonaj lo uak ko ñõn kajitõk ko me armij rar inebata kaki iumin elõñ ebeben ko. Ñõn wanjoñok, Ta karõk eo an Anij kin lõl in?” Eliklok ñõn katak 5, im konono kajitõk ko ilo jinoin katak eo. Kajitõk ibben ri mweo kin ta eo elaptata an kaitoklimoen, inem konono paragraph ko rejejjet, im lale eon ko rekkar. Kamelele bwe uak ko rekajuburu ñõn kajitõk ko jet emaroñ bidodo air loi einwõt kajitõk eo rej kab etale. Ba bwe kwonaj bar jeblak ñõn bwebwenato kin bar juõn kajitõk im uak.
7 Ak kwomaroñ kõnan kajeoñ juõn wãwen ebidodolok ñõn jino juõn Bible study ilo am ba:
◼ “Kwar jela ke bwe ilo am bõk jet wõt minute ko, kwomaroñ lo uak eo ñõn juõn kajitõk eaorõk ilo Bible? Ñõn juõn wanjoñok, . . .” Inem kwalok juõn kajitõk me ej walok ilo jinoin juõn ian katak ko ilo brochure eo, juõn kwoj lemnak enaj kaitoklimoen armij eo. Kin jet kajitõk ko kwomaroñ kajerbale, lale paragraph 15 im 16 ilo peij eo iloa ilo May 1997 Ad Jerbal Ñõn Ailiñ Eo, naetan: “Kwon Beran ñõn Kõmmõn Bar Jeblak ko.”
8 Am bõk ilo mõnõnõ aitwerõk eo kin kõmmõn bar jeblak ko im kõmmõn Bible study ko ej mõttan ad “dri jerbal” ro ibben Anij.” (1 Kor. 3:9) Ñe jej kate kij ñõn kalaplok itoklimo eo jej loe inem atartar ion Jehovah ñõn kaddeklok men ko, jenaj lo juburu eo emol me bar juõn jerbal ejjab maroñ kwaloke.