Wãween Kõjerbale Bok eo Juon Ennaan Em̦m̦an jãn Anij!
Kar Kõm̦m̦ane Bok in Ekããl ñan Jipañ Kõj Ñe Jej Jepl̦aak Ippãn Armej ro im Ñe Jej Jino Katak Baibõl̦ Ippãer
1. Ta bok eo ekããl me kar kõm̦m̦ane ñan jipañ kõj ñan jepl̦aak im jino katak Baibõl̦ ippãn armej ro?
1 Ilo Kweilo̦k eo El̦ap etan “Kõjparok Bũruom̦!” jaar lukkuun m̦õn̦õn̦õ in bõke juon bok ekããl me enaaj jipañ kõj ilo ad jepl̦aak ippãn armej ro im jino katak Baibõl̦ ippãer. Etan bok in ej Juon Ennaan Em̦m̦an jãn Anij! Bok in ej bõk jikin bok eo etan Ta Eo Anij Ekõnan bwe Jen Kõmmõne? Bok kein rej ãinl̦o̦k wõt juon, im bok in ekããl elukkuun bar pidodo kõjerbale. Kõn men in, enaaj pidodo ad katak Baibõl̦ ippãn armej ro ilo kõjãm in m̦oko im̦weer. Bok eo etan Ta Eo Anij Ekõnan bwe Jen Kõmmõne? ej kwal̦o̦k kõn ta ko Kũrjin ro rej aikuj kõm̦m̦ani, im remaroñ pen ñan an ri katak ro l̦oori. Bõtab, bok in ekããl ej kwal̦o̦k kõn ennaan ko rem̦m̦an ilo Baibõl̦.—Jrb. 15:35.
2. Etke kar kõm̦m̦ane bok eo etan Juon Ennaan Em̦m̦an jãn Anij?
2 Etke kar kõm̦m̦ane bok in? Ri tõmak ro m̦õttad ipel̦aakin lal̦ in rar kajjitõk bwe en wõr juon bok epidodol̦o̦k ñan aer katakin armej ro kake m̦okta jãn aer jino katak kõn bok eo Katak ko Rem̦ool. Ewõr armej ro me remijak in katak kõn bok ko remijel im el̦ap mel̦el̦e ko ie. Bõtab, kõnke bok in emãni im ejjab kanooj lõñ peij in, armej rein reban mijak in katak kake. Bareinwõt, epidodo ñan ukok bok rot in ñan elõñ kajin ko.
3. Ewi wãween an bok in oktak jãn bok ko jet me jej kõjerbali ñan katak ippãn armej ro?
3 Wãween Kar Kõm̦m̦ane: Kar kõm̦m̦ani elõñ iaan bok in katak ko ad bwe armej ro ren riiti im mel̦el̦e kõn katak ko rem̦ool meñe ejjel̦o̦k juon ej jipañ im kõmel̦el̦eik er. Ak bok in eoktak. Kar kõm̦m̦ane bwe ñe armej ro rej katak kake, ren katak kake ippãn juon ri kwal̦o̦k naan. Kõn men in, ñe jej lel̦o̦k bok in ñan juon, em̦m̦an ñan m̦okta riiti im etale juon ak ruo pãrokõrããp ko. Pãrokõrããp ko ie rekadu. Kõn men in, emaroñ pidodo ad katak kõn bok in ippãn armej ro im̦aan kõjãm ko ak ilo jikin jerbal ko aer. Em̦m̦an ñan jinoe jãn katak 1, ak jemaroñ bar kõjerbal katak ko jet ñan jino katak ippãn armej ro.
4. Ewi wãween an bok eo Juon Ennaan Em̦m̦an jãn Anij jipañ kõj ñan katakin armej ro jãn Baibõl̦ eo?
4 Ilo elõñ iaan bok ko ad, jemaroñ lo uwaakin kajjitõk ko ilo pãrokõrããp ko. Bõtab, ilo bok in, uwaak ko rej pãd ilo Baibõl̦ eo. Enañin aolep armej rekõn̦aan katak jãn Baibõl̦ im jab jãn bok ko ad. Kõn men in, enañin aolep eoon ko me rej wal̦o̦k ilo bok in, kar jab kwal̦o̦k kobbaer ilo pãrokõrããp ko. Eñin unin jej aikuj make riiti jãn Baibõl̦ eo. Men in enaaj jipañ ri katak ro bwe ren kile bwe men ko rej katak rej itok jãn Anij.—Ais. 54:13, UBS.
5. Etke eaorõk bwe ro ri kwal̦o̦k ro ren kõppojak m̦okta jãn aer katak ippãn ri katak ro aer?
5 Bok in ejjab kõmel̦el̦eik aolep eoon ko. Etke? Kõnke kar kõm̦m̦ane bwe en kõm̦akũt ri katak ro ñan kwal̦o̦k kajjitõk ko im bwe ri kwal̦o̦k naan eo en jel̦ã kilen uwaake kajjitõk ko an ri katak eo. Kõn men in, eaorõk bwe jen kõppojakl̦o̦k im̦aan m̦okta jãn ad katak ippãn ri katak ro ad. Jej aikuj kõjparok bwe en jab l̦ap ad kõmel̦el̦e im kõnnaan. Meñe em̦m̦an ippãd ñan kõmel̦el̦eik eoon ko, ak ekkã an l̦ap tõprak ko rej wal̦o̦k ñe jej kõtl̦o̦k bwe ri katak ro ren kwal̦o̦k ta l̦õmn̦ak eo aer kõn mel̦el̦ein eoon ko. Ñe jejel̦ã kilen kõjerbal kajjitõk ko, men in enaaj jipañ ri katak ro ad ñan make l̦õmn̦ak kõn mel̦el̦ein eoon ko.—Jrb. 17:2.
6. Ewi wãween jemaroñ kõjerbal bok in: (1) ñe jej kwal̦o̦k naan ijoko me edik an armej ro tõmak ilo Anij im Baibõl̦? (2) ñe jej jerbal in kwal̦o̦k naan jãn em̦ ñan em̦? (3) ilo ad jino kajju katak Baibõl̦ ippãn armej ro? (4) ñe jej bar jepl̦aak ippãn armej ro?
6 Bok in ej ãinwõt bar bok ko jet me jej kõjerbali ñan katak ippãn armej ro. Etke? Kõnke jemaroñ leto letak jabdewõt iien, meñe ejjab pãd ilo kein lel̦o̦k ko an allõñ eo. Elõñ renaaj lo tõprak ko ñe rej kõjerbale bok in ñan jino katak ippãn armej ro ilo kõjãm in m̦oko im̦weer. Bareinwõt, ãinwõt an kar wal̦o̦k ilo kweilo̦k el̦ap eo, jemaroñ bar kõjerbale bok in ñe jej jepl̦aak ippãn armej ro rar kwal̦o̦k aer itoklimo. Men in enaaj kõm̦m̦an bwe ad jepl̦aak ippãn armej ro en juon men ekam̦õn̦õn̦õ ñan kõm̦m̦ane.—Lale bo̦o̦k eo ilo peij 5-7.
7. Ewi wãween kwõmaroñ kõjerbal bok in ñan katak ippãn armej ro?
7 Wãween Jemaroñ Katak Ippãn Armej Ro: Jemaroñ jino ilo ad riiti juon kajjitõk, innem riiti pãrokõrããp ko kab eoon ko me rej ba “riit.” Kõjerbal kajjitõk ko ñan jipañ armej ro mel̦el̦e kõn eoon ko. Innem, m̦okta jãn am̦ etal ñan bar juon kajjitõk, bar ãliji kajjitõk eo ñan lale el̦aññe emel̦el̦e. Ilo iien ko jinoin me kwõj jepl̦aak im etale bok in ippãn, em̦m̦an ñe komiro ej etale juon kajjitõk kajjojo iien kwõj jepl̦aak. Bõtab, tokãlik, kwõmaroñ kaitokl̦o̦k amiro katak ilo am̦ etale aolepen juon katak.
8. Ñe jej iten riiti eoon ko ippãn armej ro, ta eo jej aikuj kõm̦m̦ane? Im etke jej ãindein?
8 Eoon ko me rej ba “riit” rej eoon ko me el̦aptata aer uwaaki kajjitõk ko. Ñe jej iten riiti juon eoon, kõjparok bwe jen jab ba, “Paul ear je” ak, “Lale m̦õk ta eo Jeremaia ear kanaan kake.” Armej eo jej kõnono ippãn emaroñ bõk l̦õmn̦ak eo bwe an armej ro l̦õmn̦ak ko kar je ilo eoon ko. Em̦m̦anl̦o̦k ñan ba, “Naan in Anij ej ba” ak, “Lale m̦õk ta eo Baibõl̦ ear kanaan kake.”
9. Jej aikuj ke riiti aolep eoon ko ñe jej katak ippãn juon?
9 Eoon ta ko jemaroñ riiti? Aolep eoon ko ke, ak eoon ko wõt me rej ba “riit”? Eokwe, enaaj ekkar ñan ri katak eo. Ewõr unin aer kar likũt aolep eoon ko ilo katak ko. Kajjojo iaan eoon ko rej kwal̦o̦k mel̦el̦e ko jet me rem̦m̦an ñan bar etali. Ak jet iien, em̦m̦an ñan riiti wõt eoon ko me rej ba “riit” el̦aññe jej kile bwe ejabwe iien ippãn ri katak eo, ak ejjab lukkuun itoklimo, im bõlen ejjab kanooj jel̦ã riit.
10. Ñããt eo em̦m̦an ñan jino katak kõn bok eo etan Katak ko Rem̦ool?
10 Ñããt eo Jemaroñ Jino Katak Kõn Bok eo Katak ko Rem̦ool: Ñe ri katak eo ad ej ekkeini an katak, jemaroñ kããlõt ñan jino katak ippãn kõn bok eo etan Katak ko Rem̦ool ak jemaroñ wõnm̦aanl̦o̦k wõt kõn bok eo Ennaan eo Em̦m̦an jãn Anij ñan ñe ejem̦l̦o̦k. Ri kwal̦o̦k ro rej aikuj l̦õmn̦ak m̦okta im lale el̦aññe ekkar bwe ren jino katak kõn bok eo Katak ko Rem̦ool. Ñe jej kõm̦m̦ane men in, jej aikuj ke jino katak jãn jinoin bok eo? Eokwe, ejjel̦o̦k kakien kõn men in. Eoktak ippãn kajjojo armej. Bõtab, enañin aolep ri katak ro renaaj bõk tokjãn im kal̦apl̦o̦k aer mel̦el̦e kõn ejja katak ko wõt me em̦õj aer kar katak kaki, el̦aññe jej jinoe jãn jinoin bok in.
11. Etke jej aikuj kortokjãn bok in ekããl?
11 Ilo lal̦ in, elukkuun jeja ad roñ kõn nuuj ko rem̦m̦an. Bõtab, ewõr ippãd jeraam̦m̦an eo ñan kwal̦o̦k naan kõn ennaan eo em̦m̦an bwe m̦õttan jidik Aelõñ eo an Anij enaaj irooj ioon armej ro im enaaj ukot lal̦ in bwe en juon jikin elukkuun em̦m̦an! (Matu 24:14; 2 Pi. 3:13) Jej tõmak bwe elõñ ro im renaaj roñjake renaaj ba naan kein: “Enañin baj em̦m̦an ad lale juon ri keeañ eo ej itok ibwiljin tol̦ ko, im ej bõktok naan ko rem̦m̦an, naan in aenõm̦m̦an! Ej kwal̦o̦k kõn lo̦mo̦o̦r im ej ba ñan Zaion, ‘Anij eo am ej irooj ioon men otemjej!’ ” (Ais. 52:7, UBS) Jen kõjerbal bok in ñan kwal̦o̦k kõn ennaan eo em̦m̦an ñan ro rej kõn̦aan roñjake!
[Bo̦o̦k eo ilo peij 5]
Ijoko me Edik an Armej ro Tõmak ilo Anij im Baibõl̦:
● Ilo jet jikin ko jej kwal̦o̦k naan ie, ñe jej kõnono kõn “Anij” im “Baibõl̦,” ekkã an kõm̦m̦an bwe armej ro ren jab m̦õn̦õn̦õ in bwebwenato ippãd. El̦aññe jej iioon armej rot in, em̦m̦an ñe jej bwebwenato kõn men ko armej rej inepata kaki. Ñan waanjoñak, jemaroñ kõnono ippãer kõn etke jej aikuji juon kien em̦m̦an, ia eo jemaroñ bõk jipañ kõn apañ ko rej jelõt baam̦le ko, im ta eo enaaj wal̦o̦k ilju im jekl̦aj. Bõlen ãlikin ad bwebwenato ippãer jejjo alen, jemaroñ kwal̦o̦k kõn bok eo Ennaan eo Em̦m̦an jãn Anij im kwal̦o̦k ñan e kõn etke jejel̦ã bwe ewõr juon Anij im etke jej aikuj lõke naan ko ilo Baibõl̦ eo.
[Bo̦o̦k eo ilo peij 6]
Ñe Jej Jerbal in Kwal̦o̦k Naan jãn Em̦ ñan Em̦:
● “Ij bwebwenato ippãn armej ro rainin kõn ta eo em̦õj an Anij karõke kõn ilju eo an armej ro. Kwõnañin ke baj l̦õmn̦ak el̦aññe Anij enaaj jol̦o̦k an armej ro eñtaan? [Kõtl̦o̦k an uwaak.] Bok in enaaj jipañ eok ñan lo uwaakin kajjitõk in ilo Baibõl̦ eo. [Lel̦o̦k bok eo, im riiti pãrokõrããp eo jinoin ilo katak 1, im riiti Jeremaia 29:11.] Ekkar ñan kõmel̦el̦e kein, kwõj ke kile an Anij kõn̦aan bwe armej ro ren m̦õn̦õn̦õ? [Kõtl̦o̦k an uwaak.] El̦aññe kokõn̦aan, kwõmaroñ bõk n̦e am̦ bok. Im ñe inaaj jepl̦aaktok, kõjro maroñ etale pãrokõrããp eo kein karuo ñan lale uwaak eo jãn Baibõl̦ ñan kajjitõk in, ‘Ewi wãween Anij enaaj jol̦o̦k aolep men ko renana me rej kaeñtaan armej ro?’ ” El̦aññe ewõr an armej eo iien, kwõmaroñ wõnm̦aanl̦o̦k im etale pãrokõrããp 2 im eoon ko jilu. Kõm̦m̦an karõk ñan bar jepl̦aak ñan etale kajjitõk eo kein karuo ilo katak eo.
● “Elõñ armej ro rej jar el̦aptata ñe rej iioon jorrããn ko. Ak baj kwe, elõñ ke iien kwõj jar? [Kõtl̦o̦k an uwaak.] Kwõj ke l̦õmn̦ak bwe Anij ej roñjaki aolep jar ko, ak ewõr ke jet jar ejjab m̦õn̦õn̦õ in roñjaki? [Kõtl̦o̦k an uwaak.] Ewõr ippa juon bok me ej letok uwaakin kajjitõk in jãn Baibõl̦ eo. [Lel̦o̦k bok eo, im etale ippãn pãrokõrããp eo jinoin ilo katak 12 im bareinwõt eoon ko me rej ba “riit.”] El̦ap an em̦m̦an bwe Anij ej m̦õn̦õn̦õ in roñjake jar ko ad. Ak bwe en maroñ uwaaki jar ko ad, jej aikuj lukkuun jel̦ã kajjien. [Ãlõkl̦o̦k ñan katak 2 im kwal̦o̦k unin tõl ko reddik.] El̦aññe kokõn̦aan, imaroñ likũti ippam̦ bok in, im bar juon iien kõjro maroñ lale ilo Baibõl̦ eo kõn uwaakin kajjitõk kein rem̦m̦an.”
● “Elõñ armej rej inepata kõn ta eo enaaj wal̦o̦k ñan lal̦ in ilju im jekl̦aj. Kwõl̦ak baj lale, enaaj ke em̦m̦anl̦o̦k men ko rej wal̦o̦k ilo lal̦ in? [Kõtl̦o̦k an uwaak.] Elõñ armej rej bwilõñ ñe rej katak im loe bwe Baibõl̦ eo ej kwal̦o̦k bwe juon iien enaaj em̦m̦anl̦o̦k men otemjej. Eñin ej jet iaan kajjitõk ko Baibõl̦ ej uwaaki.” Lel̦o̦k ñane bok eo, im kajjitõk ippãn bwe en kããlõt juon iaan kajjitõk ko rem̦m̦an ippãn me rej wal̦o̦k ilo itulikin bok eo. Innem etal ñan katak eo, im etale uwaakin kajjitõk eo. Kõm̦m̦an karõk ñan bar jepl̦aak im etale kajjitõk eo tok juon ilo katak eo.
[Bo̦o̦k eo ilo peij 7]
Kajju Katak Ippãn Armej Ro:
● “Iar itok bwe in kwal̦o̦k kõn juon wãween me ekããl kõmij katak ippãn armej ro. Ilo bok in, ewõr 15 katak ko ie im rej kwal̦o̦k tuia ilo Baibõl̦ eo am̦ kwõmaroñ lo uwaakin kajjitõk ko raorõk. [Kwal̦o̦k tum̦aan im tulikin bok eo.] Kwõnañin ke kar kajjioñ in mel̦el̦e kõn kobban Baibõl̦? [Kõtl̦o̦k an uwaak.] Im̦õn̦õn̦õ in kwal̦o̦k kõn joñan an pidodo ñan katak kõn bok in. [Etale pãrokõrããp eo jinoin ium̦win kajjitõk 3 ilo katak 3, im riiti Revelesõn 21:4, 5. El̦aññe ekkar, bar etale pãrokõrããp eo tok juon im eoon ko me rej ba “riit.”] El̦aññe kokõn̦aan, imaroñ likũt ippam̦ bok in. Enaaj em̦m̦an ñe kwõnaaj jinoe katak im lale ewi wãween am̦ l̦õmn̦ak. El̦aññe kwõj loe bwe em̦m̦an, eokwe, kwõmaroñ wõnm̦aanl̦o̦k wõt im katak. Ñe ibar jepl̦aaktok kõjro naaj etale katak eo jinointata. Em̦m̦an katak kein kõnke juon wõt peij aetokier.”
[Bo̦o̦k eo ilo peij 7]
Ñe Jej Bar Jepl̦aak Ippãn Armej Ro:
● El̦aññe jej bar jepl̦aak ippãn juon eo im ear kwal̦o̦k an itoklimo, jemaroñ ba: “Im̦õn̦õn̦õ bwe ibar loe eok. Iar bõktok juon bok me ej letok uwaakin kajjitõk ko ad jãn Baibõl̦ eo. [Lel̦o̦k ñane bok eo, im kajjitõk bwe en lale tulikin bok eo.] Ewi iaan kajjitõk kein kokõn̦aan jel̦ã uwaakin? [Kõtl̦o̦k an uwaak. Innem kõpel̦l̦o̦k ñan peij eo me katak eo ej pãd ie.] Ikõn̦aan kwal̦o̦k ñan kwe ewi wãween jemaroñ kõjerbal bok in ñan lo uwaakin kajjitõk ko ad jãn Baibõl̦.” Kwal̦o̦k kilen ad katak ippãn armej ro ilo amiro etale juon ak ruo pãrokõrããp im eoon ko me rej ba “riit.” Elukkuun pidodo ñan kõm̦m̦ane men in! Likũt bok eo ippãn armej eo, im kõm̦m̦an karõk ñan bar jepl̦aak. Ñe ejem̦l̦o̦k katak eo, kwõmaroñ etale bar juon katak me em̦m̦an ippãn, ak kwõmaroñ jinoe jãn katak eo jinointata ilo bok in.