Katak Kõn Bok eo Juon Ennaan Em̦m̦an Jãn Anij!
1. Elemen aer kar kõm̦m̦ane bok eo Juon Ennaan Em̦m̦an Jãn Anij!?
1 Ilo Ad Jerbal ñan Anij eo an Jul̦ae, ear kwal̦o̦k kõn kein jerbal ko ad ilo kwal̦o̦k naan. Juon iaan kein jerbal kein ej bok eo etan Juon Ennaan Em̦m̦an Jãn Anij! Kar jab kwal̦o̦k kobban eoon ko ilo bok in. Ilo wãween in, armej ro jej katak ippãer remaroñ m̦õn̦õn̦õ ilo aer make katak jãn kobban eoon kein. Enañin aolep bok ko jej katak kaki ippãn armej kar jei im kõm̦m̦ani ilo juon wãween me remaroñ make riit im katak ippãer make kaki. Bõtab, eoktak bok in kõnke kar kõm̦m̦ane bwe en wõr juon eo ej aikuj katak ippãn armej ro kake im kõmel̦el̦eiki. Kõn men in, ñe jej lel̦o̦k bok in ñan armej, em̦m̦an bwe jen kwal̦o̦k kilen ad naaj katak kake ippãer. Ilo wãween in, remaroñ lo limoun ekkatak kõn ennaan eo em̦m̦an jãn Anij ilo Baibõl̦ eo.—Matu 13:44, UBS.
2. Ewi wãween ad maroñ kõjerbale Juon Ennaan Em̦m̦an Jãn Anij! ilo raan eo jinointata?
2 Raan eo Jinointata: Ilo raan eo jinointata in am̦ kwal̦o̦k naan ñane, kwõmaroñ ba: “Ikõn̦aan baj bwebwenato ippam̦ kõn l̦õmn̦ak eo an elõñ armej kõn ilju im jekl̦aj kõnke elõñ rej inepata kõn ta ko renaaj wal̦o̦k. Ak kwõl̦ak baj lale enaaj ke em̦m̦anl̦o̦k wãween an armej mour? [Kõtl̦o̦k an uwaak.] Eokwe, Baibõl̦ ej kwal̦o̦k kõn juon ennaan em̦m̦an kõn ilju im jekl̦aj me renaaj letok ñan kõj kõjatdikdik. Eñin jet iaan kajjitõk ko me jemaroñ lo uwaakier ilo Baibõl̦.” Lel̦o̦ke bok eo, Juon Ennaan Em̦m̦an Jãn Anij! im kajjitõk bwe en kããlõte kajjitõk eo ekõn̦aan jel̦ã uwaakin ilo tulikin bok in. Ñe em̦õj, kiiõ kajjitõk ñe emaroñ riiti pãrokõrããp eo jinoin. Bar juon kõl kwõmaroñ kõm̦m̦ane ej ilo am̦ kããlõt katak eo im kiiõ bõkm̦aantak juon kajjitõk me enaaj kãitoklimoen im ej ekkejell̦o̦k wõt ñan katak eo. Innem kiiõ kwal̦o̦k kõn wãween an bok in maroñ jipañe ñan lo uwaak eo jãn Baibõl̦. Bareinwõt, ekkã an jet rukwal̦o̦k kaalwõje armej ro rej kwal̦o̦k naan ñan er ñe katak eo ej ekkejell̦o̦k wõt ñan juon iaan pija in alwõj ko ad ilo Weep jait en̦, jw.org/mh.
3. Jouj im kõmel̦el̦eik kilen ad ekkatak ippãn armej kõn Juon Ennaan Em̦m̦aan Jãn Anij!
3 Kilen Katak Ippãer: (1) Riiti m̦oktata kajjitõk eo ñan kõpooj l̦õmn̦ak eo an rũkkatak eo ñan kile boin eo. (2) Kiiõ riiti pãrokõrããp eo itulal̦in kajjitõk eo. (3) Riiti eoon in riit ko, im kwal̦o̦k kajjitõk ko me renaaj jipañ rũkkatak eo ñan lo uwaakin kajjitõk eo ilo eoon kein. (4) El̦aññe ebar wõr juon pãrokõrããp ium̦win ejja kajjitõk eo wõt, bar l̦oore kõmel̦el̦e kan̦i ilo nõmba 2 im 3. Im ñe jet iaan pija in alwõj ko ad rej ekkejell̦o̦k wõt ñan kajjitõk eo im kwõjjañin kar kaalwõje armej eo, eokwe kwõmaroñ kaalwõje ilo iien eo. (5) Ãliktata, kajjitõk ippãn rũkkatak eo ñan uwaake kajjitõk eo ñan lale ñe emel̦el̦e.
4. Ta eo enaaj jipañ kõj bwe en em̦m̦an ad kõjerbal bok in eaorõk?
4 Em̦m̦an el̦aññe kwõnaaj make lale im katak kõn bok in eaorõk bwe kwõn jel̦ã kõn kobban. Kate eok ñan kõjerbale ilo iien ko kwõj kwal̦o̦k naan ñan armej ro. Aolep iien m̦okta jãn am̦ katak ippãn juon kake, em̦m̦an ñan l̦õmn̦ak kõn aikuj eo an armej eo kwõj katak ippãn. Bareinwõt l̦õmn̦ak kõn wãween ko rem̦m̦an kwõmaroñ kõmel̦el̦eiki rũkkatak eo ilo am̦ kõjerbal eoon ko ilo juon katak. (JK. 15:28, UBS; Jrb. 17:2, 3) Ñe el̦apl̦o̦k am̦ imminene kõn bok in, enaaj kiiõ juon iaan bok ko rem̦m̦antata ippam̦ ñan kõjerbale im katakin armej ro kõn m̦ool eo!