Ijjino Bible Study ko ilo Jen Kõmmõne Brochure eo
1 Report ko jen belakin lal rej kwalok bwe brochure eo Ta Eo Anij Ekõnan Bwe Jen Kõmmõne? ej juõn kein jerbal ekajur ñan katakin armij mol eo. Elõñ thousand Bible study ko rej ijjino ilo brochure in kajjojo week. Kwar lo ke tõbrak in ijjino im kõmman Bible study ko ilo Jen Kõmmõne brochure eo?
2 Meñe elõñ rej lo bwe ebidodo air lelok brochure eo, jet rej lo bwe ebin air jelã ta eo ren ba ñan jino juõn Bible study. Ta kõl ko ro jet rar lo bwe rekeie ñan ijjino Bible study ko ilo air kajerbal Jen Kõmmõne brochure eo? Nan in rejañ kein tok remaroñ jibañ.
3 Ba Bwe Kwoj Mõnõnõ in Kwalok Kilen Katak Bible: Ñe jej jino lolok ak kõmman juõn bar jeblak, jen ad baj tilmaake juõn katak kin Bible ñan ri mweo, jemaroñ kwalok kin ewi wãwen jej kõmman juõn program in katak Bible. Men in enaj jolok inebata eo im elõñ ri mweo rej kobaiki ibben nan eo “katak.” Ñe jej katak kilen kõmmane juõn Bible study, jenaj lo bwe elikin juõn nan in ijjino elamwan, jemaroñ jino katak Bible eo.
4 Kebojak Ej Key eo: Kijejeto eo ad ñan jino Bible study ko ej ekkejel ibben ewi joñan jaar kebojak. Kebojak lok iman enaj jibañ kij ñan anjo ion ad ãliklik in bõk kunad ilo jerbal in kõmman Bible study ko. Ilo ad kamelmel ennan eo ad elõñ alen, enaj emõn ad bwebwenato, im jenaj maroñ kwalok lemnak ko ad ilo nan ko ad make. Men in enaj kainemõn jab kij wõt ak ri mweo bareinwõt.
5 Ñe kwoj kamelmel, enaj juõn men in jibañ ñan lale ewi aetokin ennan eo am bwe kwon maroñ ba ñan ri mweo ewi aetokin kwoj aikwiji ñan kwalok kilen katak kin Bible eo. Elikin an kwalok kin e make, juõn brother ej ba: “Iar bõjrak in kwalok ñan kwe program in katak Bible eo am ilo ejelok wõnãn. Ej bõk lalem wõt minute ko ñan kwaloke. Ewõr ke am lalem minute?” Jemaroñ kõmmane katak 1 ilo Jen Kõmmõne brochure eo iumin lalem wõt minute. Emol, jet wõt eon ko jemaroñ readi ilo joñan ien in, ak ilo am kamwijlok katak eo kein kajuõn iloan jejjo wõt minute ko, ri mweo enaj maroñ experience e katak eo an moktata. Inem kejelãik e bwe ñe kwonaj bar jeblak ñan katak Katak 2, kwonaj bõk 15 wõt minute ko.
6 Ennan in tok emwij kamol an keie:
◼ “I kõnan kwalok kin juõn program in katak Bible elamwan, ak emõkaj, ilo ad kajerbal brochure in Ta Eo Anij Ekõnan Bwe Jen Kõmmõne? Elõñ armij rar lo bwe 15 wõt minute ko ilo juõn week iumin 16 week ko, remaroñ lo uak ko jen Jeje ko rekaju buru ñan kajitõk kein raorõk kin Bible.” Ilo tu-kadu kwalok title in katak ko. Ilo am eliklok ñan Katak 1, ba: “Elañe kim maroñ bõk lalem wõt minute ko am, kimij kõnan kwalok ñan kwe ewi wãwen ej jerbal. Unin tel in Katak 1 ej ‘Wãwen Eo Kwomaroñ Jela kin Ta Eo Anij Ekõnan bwe Kwon Kõmmõne.’ ” Jeltokin konono kajitõk ko jilu, im kamelele kin number ko ilo parentheses ko. Konono paragraph 1, im kwalok kin ewi wãwen ri mweo emaroñ lo uak eo. Kwomaroñ kajitõk ibben ri mweo ñan konono paragraph 2. Inem ba: “Ekkar ñan kamelele in, ewi wãwen kwonaj kar uak kajitõk in? [Bar konono kajitõk eo, im kõtlok bwe ri mweo en uak.] Kwonaj lo bwe ewõr eon ko ilo kajjojo paragraph. Eon kein rej jitõñlok kij ñan uak eo ilo Bible ñan kajitõk kein. Ñan wanjoñok, jen konono 2 Timote 3:16, 17 im lale elañe ej jurake uak eo kwar letoke ikijen ri kõmman Bible eo.” Elikin am konono paragraph 3, lale kajitõk eo, im konono Jon 17:3, im kareilok ri mweo ñan an kile jelãlokjen eo ear bõke ilo an etale Katak 1. Kiõ kwomaroñ eliklok ñan Katak 2 im konono kajitõk eo eliktata, “Ta wãwen ko ruo jemaroñ katak kin Anij?” Inem kajitõk: “Ñããt eo enaj wõr am 15 minute bwe jemaroñ lale Katak 2 im bukõt uak eo?”
7 Eaorõk ñan kõmman bwe bwebwenato eo en lamwan im nebar ri mweo ñe ekkar. Ñe kwoj kõmman karõk ñan bar jeblak, jen am kajitõk elañe ekõnan wõnmanlok, baj rejañ e ñan lor ejja wãwen eo wõt ilo katak in tok. Ba ñan e bwe kwoj reimanlok ñan ien eo kwonaj bar jeblak. Jet ri kwalok ro rar ba bwe remaroñ katak ilo air kajerbal telephone elañe ebin air maroñ kõmman juõn karõk. Kwomaroñ bareinwõt rejañ ri katak eo ñan likit brochure eo ilo juõn jikin emõn bwe en bidodo an naj loe ñe kwonaj bar rol.
8 En Bin Bebe eo Am: Ke key eo ñan lo tõbrak ej kebojak, ej aikwij bin bebe eo ad ñan bar jeblak. Etale juõn katak ilo jejjo wõt minute ko emaroñ juõn aitwerõk elap, inem kwon bebe ñan kamelmel ennan eo ilo joñan eo kwoj aikwiji bwe en wejepedik am konono ñe kwoj kwalok kilen katak katak eo. Kajeoñ in kwalok kilen katak ibben aolep armij ro kwoj iion ir ñe kwoj kwalok nan jen em ñan em, ilo jabdewõt ien emõn tok, im ilo kajerbal telephone. Elañe ebin am ijjino juõn Bible study, jab ebwer. Ñan lo tõbrak in ijjino Bible study ko ej aikwij wõr juõn bebe ebin ilo buruõd im juõn kõnan emol ñan kwalok mol eo ñan ro jet.—Gal. 6:9.
9 Ilo am jerbale nan in rejañ kein, kwe bareinwõt kwonaj lo jerammõn eo ñan jibañ juõn armij ñan etetal ilo ial in mour, ilo am ijjino im kõmman juõn Bible study ilo Jen Kõmmõne brochure eo.—Mat. 7:14.