Wãween Kõjerbale Bok eo Wõn Ro Rej Kõm̦anm̦an Ankilaan Jeova Rainin?
Kar Kõm̦m̦ane Bok in Ekããl ñan Jipañ Ri Katak ro Bwe Ren Del̦o̦ñtok ilo Doulul In
1. Ta un ko jilu unin kar kõm̦m̦ane bok eo etan Wõn Ro Rej Kõm̦anm̦an Ankilaan Jeova Rainin?
1 Em̦õj ke am̦ jino kõjerbale bok eo ekããl etan Wõn Ro Rej Kõm̦anm̦an Ankilaan Jeova Rainin? Unin kar kõm̦m̦ane bok in ej ñan (1) jipañ ri katak Baibõl̦ ro bwe ren jel̦ã kõn wõn Ri Kõnnaan ro an Jeova, (2) katakin er kõn men ko jej kõm̦m̦ani, im (3) kwal̦o̦k ñan er wãween an doulul in ad jerbal. Ilo bok in, ewõr juon katak ilo kajjojo peij me jemaroñ etale ippãn ri katak eo ium̦win wõt l̦alem l̦o̦k ñan joñoul minit kajjojo iien ãlikin ad katak.
2. Ewi wãween kar kõm̦m̦ane bok in?
2 Wãween Kar Kõm̦m̦ane: Ewõr jilu m̦õttan ko ilo bok in. M̦õttan eo kein kajuon ej kõmel̦el̦e kõn kain armej rot kõj. M̦õttan eo kein karuo ej kwal̦o̦k kõn m̦akũtkũt ko ad, im kein kajilu ej kwal̦o̦k kõn wãween an doulul in ad jerbal. Ewõr 28 katak ko im aolep taitõl̦ ko rej wal̦o̦k ilo kajjitõk. Im unin tõl ko reddik ilo kajjojo katak rej kwal̦o̦k uwaakin kajjitõk ko ilo taitõl̦ ko. Ilo bok in, kar likũti pija ko jãn elõñl̦o̦k jãn 50 aelõñ ko ñan kaalikkar bwe doulul in ej pãd ipel̦aakin lal̦ in. Ilo elõñ iaan katak ko, ewõr juon bo̦o̦k jidikdik etan “Kal̦apl̦o̦k Am̦ Jel̦ã.” Kwõmaroñ kõjerbal bo̦o̦k in ñan kwal̦o̦k ñan ri katak eo jet iaan men ko emaroñ kõm̦m̦ani ñan kal̦apl̦o̦k an jel̦ã.
3. Ewi wãween jemaroñ kõjerbale bok eo Wõn Ro Rej Kõm̦anm̦an Ankilaan Jeova Rainin?
3 Wãween Kwõmaroñ Kõjerbale: Kwõmaroñ jinoe ilo am̦ kwal̦o̦k kõn kajjitõk eo ilo taitõl̦ in katak eo. Innem, komiro ri katak eo en riiti katak eo ippãn doon, im kõmel̦el̦eiki kõn unin tõl jiddik ko ilo katak eo. Ñe em̦õj amiro riiti im etali men kein, komiro maroñ etale kajjitõk in ãlij ko ilo jem̦l̦o̦kin peij eo. Komiro maroñ kajju riiti aolep pãrokõrããp ko ilo juon wõt iien im etali ippãn doon. Ñe eab, komiro maroñ riiti pãrokõrããp ko juon ilo̦k juon im bõjrak ñan etali kajjojo iaaer. Kwõn kããlõt ta iaan eoon ko im renaaj ekkar bwe komiro en riiti ippãn doon. Jab mel̦o̦kl̦o̦k in etali pija ko im bareinwõt bo̦o̦k eo etan “Kal̦apl̦o̦k Am̦ Jel̦ã.” Enañin aolep iien, em̦m̦an ñe jej etali katak ko ekkar ñan wãween aer laajrak ilo bok eo. Bõtab, ejjel̦o̦k jorrããn ñe komiro ej kajju ilo̦k ñan katak ko jet ilo bok in ñe kwõj loe bwe ej menin aikuj. Ñan waanjoñak, ñe ej pojak in wal̦o̦k juon iaan kweilo̦k ko ad rel̦l̦ap, kwõmaroñ kajju ilo̦k ñan katak 11 im komiro etale ippãn doon.
4. Etke kwõj m̦õn̦õn̦õ kõn bok in ekããl?
4 Ñe jej katak Baibõl̦ ippãn armej ro, jej jipañ er bwe ren jel̦ã kajjien Jemãd ilañ. Bõtab, jej aikuj bareinwõt katakin er kõn doulul eo an Jeova. (JK. 6:20) El̦ap ad m̦õn̦õn̦õ bwe ewõr ad kiiõ bok in ekããl im enaaj pidodol̦o̦k ad katakin armej ro kõn doulul in ad!