Kejbãrok

Ennan ko ñan Kwalok Nan Rej Rejañ kaki

Wãwen eo ñan Kajerbal Insert in

Enañin aolep ennan kein kar rekoñ walok ilo copy in Ad Jerbal Ñan Ailiñ Eo ko ilo ien ko remotlok. Kajeoñ in kajerbal joñan eo kwo kõnan ilo jerbal in kwalok nan eo am, im lale tokjen ta ko rej walok. Kejbãrok insert in, im lale ñe kwoj kebojak kin jerbal in kwalok nan eo.

Kwomaroñ kaitoklimoen juõn armij ilo Nan in Anij elañe ejejjet ennan eo am. Bõkmantak juõn kajitõk ejejjet, inem readi uak eo ekadu ekkar ñan Jeje ko. Kwomaroñ kajeoñ in kajerbal nan in rejañ kein:

“Ñe kwoj lemnak kin ran ko rej itok, ewõr ke am kejatdikdik ak bere? [Kõtlok an uak.] Bible eo emwij an kar kanan kin men ko rej kõmman an limajnono ilo mour me jej loi rainin im ta jemlokier.”​​—2 Tim. 3:1, 2, 5; Ken. 2:21, 22.

“Ilo ran kein elap an armij inebata kin ejmour. Kwar jelã ke bwe Anij ej kallimur bwe enaj kajemlok aolep abañ ko ikijen ejmour?”​​—Ais. 33:24; Rev. 21:3, 4.

“Kwar jelã ke bwe Bible eo emwij an kanan bwe eliktata enaj wõr juõn wõt kien enaj iroij ilo aolepen lal in?”​​—Dan. 2:44, New World Translation; Mat. 6:9, 10.

“Ewi lemnak eo am kin naj wãwen ko ilo lal in elañe Jesus Christ ej iroij?​​—Sam 72:7, 8.

“Elõñ armij rej iion kalijeklok kinke rej maan ak kõrã, kin kabuñ eo air, ak kin unokan kiliir. Ekijkan lemnak eo am kin eñjake eo an Anij ikijien kalijeklok rot in?”​​—Jerbal 10:34, 35.

“Jej jelã bwe Jesus Christ ear kõmman elõñ men in bwilõñ ko ilo ran ko an. Elañe kwar maroñ kajitõk ibben ñan kõmman bar juõn men in bwilõñ, enaj kar ta eo?”​​—Sam 72:12-14, 16.

“Enañin aolep armij rainin rej mõk in roñ kin abañ ko. Rekõnan roñ kin mejeleir. Ejelok bere ej eindein am lemnak. Ak ia eo jemaroñ lo jibañ ko remol ñan abañ ko ad?”​​—2 Tim. 3:16, 17.

“Kwomaroñ ke kwalok Ailiñ ta eo kwoj jar kake ilo Jar eo an Iroij?”​​—Rev. 11:15.

Nan in Ijjino Bwebwenato ko

Lajrak in kajitõk ko ilal, aini jen katak ko ilo book in Reasoning (Kõmmanwa), ej kwalok number in peij eo ilo book eo ijo kwomaroñ lo uak eo ie:

Etke jej rittolok im mij? (98)

Ta wãwen eo an ro remij? (100)

Ewõr ke un ko remõn ñan tõmak ilo Anij? (145)

Anij ej lukkun ke kea kin ta eo ej walok ñan kij armij? (147)

Anij ej juõn eo emol an bed ke? (147)

Aolep armij ro remõn rej etal ke ñan lañ? (162)

Juõn armij ej aikwij ke etal ñan lañ ñan an wõr juõn an ilju eo emol an mõnõnõ? (163)

Etke eaorõk ñan jelã im kajerbal ãt eo etan Anij? (196)

Jesus Christ ilo mol ej Anij ke? (212)

Ta eo Ailiñ in Anij enaj kõtõbrake? (227)

Ta unin an armij mour? (243)

Ta eo emaroñ jibañ kakõmõnmõnlok juõn mour in belele? (253)

Kabuñ ko otemjej rej ke kabuñ buruen Anij? (322)

Ekijkan an naj juõn armij maroñ jelã ewi kabuñ eo ejimwe? (328)

Ewi kajur in kilan Satan ilo lal in rainin? (364)

Etke Anij ej kõtlok an wõr eñtan? (393)

Etke elap an wõr nana? (427)

Wõn eo ej iroij in lal in​​—Anij ke ak Satan? (436)

Nan in Rejañ ko ñan Lelok Jen Kõmmõne Brochure eo

“Ejelok bere kwonaj errã bwe elõñ armij rej tõmak ilo Anij. Aolep ro rej tõmak ilo e rej errã bwe ewõr men ko Anij ej aikwij ad kõmmani. Men eo armij rejjab maroñ errã kake ej, Ta eo Anij ekõnan bwe jen kõmmane?” Inem kwalok Jen Kõmmõne brochure eo, eliklok ñan katak 1, im etale.

“Kin an lõñ abañ ko ilo mour in family ilo ran kein, kwar lemnak ke kin ta eo ej key eo ñan lo mour in family elemõnõnõ?” Kõttar an uak, im kamelele bwe ilo Bible eo, Anij ej kwalok key eo emol kin juõn mour in family elemõnõnõ. Konono Aiseia 48:17. Inem eliklok ñan katak 8 ilo Jen Kõmmõne brochure, im jitõñlok ñan jet eon ko me rej letok tel eo emol ñan kajjojo uan family eo. Konono lajrak in kajitõk ko ilo jinoin katak eo. Kajitõk elañe armij eo ekõnan readi uak ko.

“Brochure in ewõr juõn ial in katak emõn eo ej etale irinekatak ko ilo Bible. Ilo kajjojo peij, kwonaj lo uak ko ñan kajitõk ko me armij rar inebata kaki iumin elõñ ebeben ko. Ñan wanjoñok, Ta karõk eo an Anij kin lal in?” Eliklok ñan katak 5, im konono kajitõk ko ilo jinoin katak eo. Kajitõk ibben ri mweo kin ta eo elaptata an kaitoklimoen, inem konono paragraph ko rejejjet, im lale eon ko rekkar. Kamelele bwe uak ko rekajuburu ñan kajitõk ko jet emaroñ bidodo air loi einwõt kajitõk eo rej kab etale. Ba bwe kwonaj bar jeblak ñan bwebwenato kin bar juõn kajitõk im uak.

“Ta eo kwoj lemnak ej unin aolep kowadoñ ko rej walok ilo school ko. Ej tokjen eo ej walok ke kin an jabwe an ro jemen im jinen katakin ro nejiir? Ak emaroñ ke walok kin bar juõn un, einwõt kilan Devil eo?” Kõtlok an uak. Elañe armij eo ej ba bwe ej kin kilan Devil eo, konono Reveles̃õn 12:9, 12. Kwalok kin jerbal eo an Devil eo ñan kowõnmanlok abañ ko ilo lal in. Inem kabellok Jen Kõmmõne brochure eo ñan katak 4, im kajitõk elañe armij eo enañin kar lemnak kin ia eo Devil ear itok jen e? Read im bwebwenato kin paragraph ko ruo jinoin. Elañe armij eo ej kãlet bwe “ear jabwe an ro jemen im jinen katakin ro nejiir” einwõt un eo unin ej walok kowadoñ ko ilo school, read 2 Timote 3:1-3 im kwalok kin kadkad ko me rej kobalok ñan abañ in. Inem kabellok Jen Kõmmõne brochure eo ñan katak 8, konono paragraph 5, im wõnmanlok kin bwebwenato eo.

“Kwoj lemnak ke bwe ej juõn men in kõmmanwa ñan kõtmene bwe Ri Kõmanman eo enaj letok ñan kij kein jerbal ko jej aikwiji ñan kalek juõn mour in family ewõr tõbrak ie? “ Elikin an uak, kwalok Jen Kõmmõne brochure eo. Eliklok ñan katak 8, im kamelele bwe ewõr nan in kakabilek ko jen Bible eo ñan kajjojo uan family eo. Ba bwe kwoj mõnõnõ in kwalok ñan e kilen kajerbale brochure eo ibben Bible eo ñan bõk tokjen eo elaptata jen e.

“Kin aolep abañ ko jej jelmaiki ilo mour ilo ran kein, kwoj eñjake ke bwe jar emaroñ lukkun jibañ kij? [Kõtlok an uak.] Elõñ rej ba bwe jar ej letok kakajur eo iloa. [Konono Dri Pilippai 4:6, 7.] Meñe eindein, juõn armij emaroñ eñjake bwe rejjab uake jar ko an. [Kabellok Jen Kõmmõne brochure eo ñan katak 7.] Brochure in ej kamelele kin ewi wãwen jemaroñ bõk tokjen eo elaptata jen jar.”

“Kim ad konono ibben ro ri turõm kin etke ej lõñ kabuñ ko reoktak jen don ilo lal in. Ak, ewõr juõn wõt Bible. Ilo am lemnak, etke ewõr bwok in kin kabuñ ko? [Kõtlok an uak. Kabellok Jen Kõmmõne brochure eo ñan katak 13, im readi kajitõk ko jinoin.] Kwonaj bõk uak ko rekajuburu ñan kajitõk kein ilo am readi katak in.”

Elikin am lelok ñan juõn armij magazine ko in Imõniaroñroñ im Awake!, kajitõk elañe kwomaroñ read juõn paragraph ekadu ñan e. Elañe rej kõtlok am kõmmane, kabellok Jen Kõmmõne brochure eo ñan katak 5. Jitõñlok ñan kajitõk ko rej kõlajraki ilo jinoin katak eo, im kajitõk ibben bwe en roñjake im bukõt uak eo ñan kajitõk eo mokta ñe kwoj readi paragraph eo jinoin. Elikin am readi paragraph eo, kwalok kajitõk eo im roñjake uak eo an. Lelok brochure eo, im elañe ej bõke, karõk ñan bar jeblak ñan bõk uak ko an ñan kajitõk ko ruo jeltokin ilo lajrak eo.

Nan in Rejãn ko nan Lelok Knowledge Book eo

Ilo am jibwe Bible eo, ijjino ilo am ba: “Kimij kwalok juõn eon ibben aolep armij ilo ial eo am rainin. Ej ba . . . ” Konono Jon 17:3, inem kajitõk: “Kwar lo ke ta eo kar kallimur kake elañe ewõr ibbed jelãlokjen eo ejimwe? [Kõtlok an uak.] Ia eo juõn armij emaroñ lo jelãlokjen rot in ie?” Elikin an uak, kwalok Knowledge book eo, im ba: “Book in ej jitõñlok ñan jelãlokjen eo ej tellok ñan mour indio. Ej kõmman men in ilo an uake kajitõk ko ekkã an armij kajitõk kaki kin Bible eo.” Kwalok peij eo ej walok kobban book eo ie, im kajitõk elañe ekar lemnak kin jabdewõt ian katak kein.

“Kwonañin ke kar lemnak elañe ewõr an Anij itoklimo kin nana ko im eñtan ko jej lo ibelakid ak ad make iioni? [Kõtlok an uak.] Bible eo ej kamol ñan kij bwe Anij ej yokwe kij im bwe enaj jibañ kij ilo ien abañ kein.” Konono mõttan ko ilo Sam 72:12-17. Kabellok book eo ñan katak 8, im kwalok bwe ej letok juõn uak ekainemõn ñan kajitõk eo me elõñ million armij rar kajitõk kake, Etke Anij ej kõtlok an armij eñtan? Elañe emaroñ, etale jet ian lemnak ko ekkar ñan Jeje ko rej walok ilo paragraph 3 ñan 5, ak kõmmane ñe kwoj bar jeblak.

“Kij aolep jaar luji ro re jitenburu ibbed ilo mij. Kwo nañin kar lemnak ke elañe kwonaj bar lo ir? [Kõtlok an uak.] Jesus ear kamol bwe ro re jitenburu ibbed remaroñ bõk lomor jen mij. [Konono Jon 11:11, 25, 44.] Meñe men in ear walok elõñ ebeben ko remotlok, ej kalikar ta eo Anij ear kallimur bwe enaj kõmmane ñan kij.” Kabellok Knowledge book eo ñan pija eo ilo peij 85, im konono nan ko iturin pija eo. Inem kwalok pija eo ilo peij 86, im kwalok jidik kake. Kõmman bedbed in am bar jeblak ilo am kajitõk: “Kwo kõnan ke jelã un eo unin an armij rittolok im mij?” Jeblak ñan bwebwenato kin katak 6.

“Kwo nañin lemnak ke kin etke armij rekõnan bwe en aetoklok mour ko air?” Elikin an uak, kabellok Knowledge book eo ñan katak 6, im konono paragraph 3. Kõmmanwa ibben armij eo kin eon ko rej walok. Jitõñlok ñan kajitõk ko ruo ilo jemlokin paragraph eo, im kajitõk ibben armij eo elañe ekõnan jelã uak eo. Elañe ej emõn ibben, bwebwenato kin paragraph ko jet.

“Kimij kajitõk ibben armij elañe rej tõmak men in . . . Konono Jenesis 1:1, inem kajitõk: “Kwoj errã ke ibben nan kein?” Elañe armij eo ej errã, inem ba: “Ña bareinwõt. Bõtab, kwoj lemnak ke bwe elañe Anij ear kõmanman men otemjej, ej bareinwõt bõk eddon nana ko rej walok?” Elikin am kamolol kin uak eo an, konono Ekklisiastis 7:29. Kabellok Knowledge book eo ñan katak 8, im konono paragraph 2. Elañe ejjab errã ibben Jenesis 1:1, rejañ e ñan etale men in kamol eo bwe ewõr juõn Ri Kõmanman kin men otemjej.​​—Lale Reasoning book eo, peij 84-6.

“Kwoj errã ke bwe kin an mõkaj an oktak aorõkin mwil emõn rainin, jej aikwiji juõn men in tel ilo mour me jemaroñ liki? [Kõtlok an uak.] Meñe ej book eo etto tata an bed, Bible eo ej letok nan in kakabilek ko rekeie kin mour ilo ran kein im juõn mour in family elemõnõnõ.” Inem eliklok ñan katak 2 ilo Knowledge book eo, im konono paragraph 10 im sentence eo jinoin ilo paragraph 11, ekoba 2 Timote 3:16, 17.

“Kwo kõnan ke jelã ta ilju eo ej bed iman ñan kij im kin lal in? [Kõtlok an uak.] Bible eo ej ba kin ilju eo ilo juõn wõt nan​​—Paradise! Eñin jikin eo Anij ear likit ri belele ro ruo moktata ke ear kõmanman ir. Lale kamelele in kin kar wãwen eo ilo ien eo.” Kabellok Knowledge book eo ñan peij 8, im konono paragraph 9, iumin unin tel eo edik “Mour ilo Paradise.” Inem bwebwenato kin point ko ilo paragraph 10, im konono eon eo ej walok, Aiseia 55:10,11. Ba bwe kwoj mõnõnõ in wõnmanlok im bwebwenato ibben kin ewi naj wãwen mour ilo Paradise eo, eo ej kitibuj paragraph 11-16.

Ñe kwoj bar jeblak ibben ro kwar lelok Imõniaroñroñ im Awake! magazine ko, kwomaroñ ba men in:

“Ilo trip eo lok, iar mõnõnõ in door ibbam juõn copy an magazine in Imõniaroñroñ. Bõlen kwar lo bwe title in magazine in ej Imõniaroñroñ Ej Kwalok kin Ailiñ eo an Anij. Rainin I kõnan kameleleik yuk kin ta in Ailiñ eo im ta eo ej melelen ñan yuk im family eo am.” Inem kabellok Jen Kõmmõne brochure eo ñan katak 6, im read im bwebwenato kake ilo joñan eo armij eo ewõr an ien.

“Ejjabto moktalok jen ke iar itok im door ibbam copy ko kin magazine in Imõniaroñroñ im Awake! Magazine kein rej kalaplok kautiej an armij kin Bible eo im tel eo an kin mwil emõn. Kin aõ lemnak eaorõk bwe aolep armij ren melele kin Nan eo an Anij, iar bar itok ñan kwalok juõn men me enaj jibañ yuk ñan kõmman men in.” Kwalok Jen Kõmmõne brochure eo ak Knowledge book eo, im tilmake juõn Bible study.

Ñe kwoj kwalok jabdewõt book ko remor me 192-peij, kwomaroñ kajeoñ in kajerbal ennan in:

“Elap air kar kalikar kin aikwij eo kin jelãlokjen eo emõn. Ilo lemnak eo am, kain jelãlokjen rot eo juõn armij ej aikwij jibadõke ñan an bõk mõnõnõ eo elaptata im lo tõbrak ilo mour? [Kõtlok an uak. Inem konono Jabõn Kennan Ko 9:10, 11.] Book in [kwalok title in book eo kwoj leloke] ej wawa ion Bible eo. Ej jitõñlok ñan unjen jelãlokjen eo wõt emaroñ tellok ñan mour indio.” Kwalok juõn wanjoñok ejejjet ilo book eo, im rejañ armij eo ñan readi.

Book ko Jet

Ennan ko rej rejañ kaki kin book im brochure ko jet remaroñ loi ilo Watch Tower Publications Index iumin:

Presentations (Ennan ko)

List by Publication (Lajrak in Book ko)

Wãwen eo ñan Kajju im Kajitõk

Ñan ijjino juõn Bible study, kajeoñ in kajerbal juõn ian wãwen kein ñan kajju im kajitõk:

“Kwar jelã ke bwe ilo jet wõt minute ko, kwomaroñ lo uak eo ñan juõn kajitõk ilo Bible eaorõk? Ñan wanjoñok, . . . ” Inem, bõkmantak juõn kajitõk me ej walok ilo jinoin juõn ian katak ko ilo Jen Kõmmõne brochure eo im kwoj lemnak enaj kaitoklimoen armij eo.

“Iar bõjrak ñan kwalok ñan yuk program eo am ñan katak Bible ilo ejelok wõnãn. Ej bõk lalem wõt minute ko ñan kwaloke. Ewõr ke am lalem minute?” Elañe uake eo ej aet, kajerbal katak 1 ilo Jen Kõmmõne brochure eo ñan kwalok kilen katak eo, im read juõn ak ruo wõt eon ko kar kãleti. Tokelik, kajitõk: “Ñããt enaj wõr am 15 minute ñan etale katak in tok?”

“Elõñ armij ewõr juõn air Bible, ak rejjab kile bwe ej bed iloan uak ko ñan kajitõk ko raorõk kin ilju eo ad. Ilo am kajerbal kein jibañ in ñan katak [Jen Kõmmõne brochure eo ak Knowledge book] iumin enañin juõn awa ilo juõn week, kwomaroñ bõk juõn melele kin bedbed in katak ko ilo Bible ilo jet wõt alliñ ko. I naj mõnõnõ in kwalok ñan yuk kilen an jerbal program in.”

“Iar itok ñan tilmake juõn program in katak Bible ilo mweo imõm ilo ejelok wõnãn. Elañe I maroñ, I kõnan bõk jet wõt minute ko ñan kwalok wãwen eo armij ro ilo 200 ailiñ ko rej bwebwenato kin Bible eo ilo mweo imwiir einwõt kumi in family ko. Jemaroñ kajerbal jabdewõt ian katak kein einwõt bedbed in bwebwenato eo. [Kwalok kobban book eo ilo Knowledge book eo.] Ewi wõt eo elaptata an kaitoklimoõm?” Kõttar an kãlet juõn. Eliklok ñan katak eo ear kãlete, im ijjino katak eo ilo paragraph eo mokta.

“Ij katak Bible eo ibben armij ilo ejelok wõnãn im ewõr room ilo schedule eo aõ ñan bõk ri katak ro jet. Kimij kajerbal kein jibañ in ñan katak Bible. [Kwalok Knowledge book eo.] Program eo ej wõnmanlok iumin jet wõt alliñ ko im ej letok uak ko ñan kajitõk ko einwõt: Etke Anij ej kõtlok an wõr eñtan? Etke jej rittolok im mij? Ta eo ej walok ñan ro jitenburu ibbed remij? Im ewi wãwen jemaroñ ruaklok ñan Anij? I maroñ ke kwalok kilen katak?”

Elañe emwij am lo juõn ennan ebolemen me kwoj lo tõbrak in kaitoklimoen armij, eokwe wõnmanlok im kajerbale! Baj ukõte ñan an jejjet ñan book in lelok eo ilo alliñ eo.