Kwalok Itoklimo eo Emol kin Aolep Ro Emol Burueir Kwar Iion Ir
1 Keañ eo kin Ailiñ eo ibelakin lõl ejjabto enaj itok ñõn an jemlok, elikin aolep ro “rejaje Anij” naj kokkure ir. (2 Tes. 1:7-9, New World Translation) Kin men in, itoklimo eo emol kin mour ko an ro jet ej kammakit armij ro an Jehovah ñõn jibadõk elõñ armij joñan wõt air maroñ kin ennan in Ailiñ eo.—Zeph. 2:3.
2 Kajjojo alliñ, elõñ million awa ko rej kajerbali ñõn bukõt ro rekõnan roñjake “news eo emõn kin juõn men emõnlok.” (Ais. 52:7) Ilo uak ñõn book in lelok eo ekãl, elõñ rar bõk copy ko kin Imõniaroñroñ im Awake! ak brochure eo Ta Eo Anij Ekõnan Bwe Jen Kõmmõne? Itoklimo eo emol kin armij rein en kammakit kij ñõn bar jeblak ibben aolep ro emol burueir jaar iion ir.—Jabõn Kennan 3:27.
3 Kejbarok Record ko Rejejjet: Elaplok men ko jemaroñ kõtõbraki elañe jej kejbarok juõn record ededelok im jejjet kin ro rej itoklimo im book ko kwar leloki. Kamelele ko einwõt etan im address eo an ri mweo, ran im awa eo kwar lolok ir, book eo kwar leloke, im katak eo kwar bwebwenato kake enaj jibañ yuk bwe en laplok am bolemen ñe kwoj bar jeblak. Bareinwõt, elañe kwoj jeje jet nan ko ri mweo ear konono kake ilo bwebwenato eo am mokta, kwonaj maroñ eliji ñe kwoj wõnmanlok ilo bwebwenato eo ñe kwoj bar jeblak.
4 Kwon Mõkaj in Kõmmõn Bar Jeblak ko: Jete ian ro rar bõk book ko jen kwe ilo alliñ eo lok emwij am bar lolok ir? Emotlok ke elõñ week ko ak kwo jañin lolok ir? Itoklimo eo emol kin mour eo air indio en kar kammakit yuk ñõn bar jeblak ilo mõkaj, bõlen iloan wõt jet ran ko, bwe kwe im ri mweo jimor maroñ kememej bwebwenato eo. Ilo am mõkaj in jeblak ñõn kalaplok air itoklimo, kwonaj maroñ bõprae jibadbad ko an Satan mokta jen ej “bõklok nan eo ar jeor na ilo burueir.”—Mark 4:15.
5 Kabojak Ej Juõn Men Eaorõk: Am bolemen in kõmmõn bar jeblak ko ej atartar ion joñan an emõn am kabojak. Karõk ta eo kwonaj kõmmõne mokta jen kwoj etal. Peij eo tulikin ilo May 1997 Ad Jerbal Ñõn Ailiñ Eo ej kwalok jet ennan ko kwomaroñ kajerbali ñõn tõbrak ko remõn ñe kwoj lelok magazine ko ak Jen Kõmmõne brochure eo. Eo juõn ej bwe en wor jet men ko ilo lemnak eo am kwo kõnan bwebwenato ibben kake ñe kwoj bar jeblak. Ta eo kwomaroñ ba ñe kwoj bar jeblak? Ewi wãwen kwomaroñ kajutak juõn katak kin Bible?
6 Ñe kwoj bar jeblak ñõn kowõnmanlok bwebwenato eo kin ta eo rej aikwij kõmmõne ñõn karreoik lõl in im kõmmõne bwe en juõn jikin emõn ñõn jokwe ion, kwomaroñ ba:
◼ “Ilo ien lotok eo aõ mokta, jaar errã bwe buñten ne ko relap rej aikwij kõmmõni mokta jen an lõl in maroñ erom juõn paradise eainemõn. Kwoj lemnak ke bwe armij ewor maroñ eo ibbeir ñõn kõtõbrak jerbal in? [Kõtlok an uak.] Joij im lale etke enaj juõn men in aikwij bwe Anij en bõk kwunan ilo makitkit ko an armij.” Konono Psalm 37:38. Inem eliklok ñõn katak 5 ilo Jen Kõmmõne brochure eo, im kajerbal jet mõttan ko kar kãlete ilo paragraph 4-5 ñõn kwalok kin ewi wãwen Anij enaj kajejjet kitien kanan in. Wõnmanlok ilo am tilmaake juõn katak kin Bible ilo kajerbal brochure eo.
7 Elañe kwar bwebwenato kin Ailiñ in Anij im lelok “Jen Kõmmõne” brochure eo ilo ien lolok eo mokta, ñe kwoj bar jeblak kwomaroñ ba juõn ennan einwõt in:
◼ “Ke jaar konono mokta, jaar kile bwe Ailiñ in Anij ej juõn lukkun kien ak government me enaj iroij ion aolepen lõl in. Bible eo ej kwalok bwe Christ Jesus eo enaj iroij. Kwomaroñ ke lo jabdewõt tokjen ko ilo an wor juõn kien im ri tel rot in? ” Kõtlok an uak. Kabellok Jen Kõmmõne brochure eo ñõn katak 6. Kajerbal point ko kar kãleti ilo paragraph 6-7 im pija eo ilo peij 13, eo ej kwalok kin ta eo Ailiñ in Anij enaj kõmmõne ñõn armij ilo ran ko renaj itok. Konono Daniel 2:44, im elañe ekkar, kwalok book eo Mour Indrio im tilmaake juõn katak kin Bible.
8 Elañe kwar lo juõn armij me ear errã bwe kabuñ ko an lõl in kar kõmmõn abañ ko ñõn armij, kwomaroñ kajitõk men in ilo ien bar jeblak eo:
◼ “Kwar lemnak ke kin ewi wãwen jemaroñ jela kabuñ et eo Anij ej buñburuen kake? [Kõtlok an uak.] Brochure in Ta Eo Anij Ekõnan Bwe Jen Kõmmõne? ej kwalok kin kakõlle ko kakõl-lan kabuñ eo emol.” Eliklok ñõn katak 13, im kalikar point ko lalem kar italicize i ilo paragraph 3-7. Kwomaroñ wõnmanlok ilo am ba: “Bareinwõt ñõn ad maroñ lo kabuñ eo emol, jej aikwij jela ta eo Anij ekõnan bwe kij kajjojo jen kõmmõne.” Konono John 4:23, 24. Ba bwe kwoj mõnõnõ in naj bar bwebwenato manlok kake men in. Eliklok ñõn katak 1 ilo brochure eo, im kwalok kilen jej kõmmõne katak eo.
9 Ñe kwoj bar jeblak in wõnmanlok ilo bwebwenato eo kin mour in family elemõnõnõ, kwomaroñ ba juõn ennan einwõt in:
◼ “Ke jaar iion don, Iar bwebwenato ibbõm kin men in ittino ak key eo ñõn mour in family elemõnõnõ, eñin ñõn jerbale nan in kakabilek eo ilo Nan eo an Anij, Bible eo. Ñe ej itok ñõn etale aikwij ko an juõn family ilo ran kein, kwoj tõmak ke bwe Bible eo ej out-of-date (mor) ak up-to-date (kãl)?” Kõtlok an uak. Kwalok book eo Mour Indrio. Eliklok ñõn peij 15 im kajerbal point ko ilo paragraph 18 im 19 ñõn tilmaake juõn katak kin Bible einwõt juõn family.
10 Ilo am kejbarok record ko rejejjet, kõmmõn bojak ko rej men in aikwij, im bar jeblak ilo mõkaj ñõn kalaplok air itoklimo, jemaroñ kwalok kain yokwe eo ñõn ri turud me enaj karel ir ñõn ial eo ñõn bõk lomor.—Mat. 22:39; Gal. 6:10.