Juõn Etale kin Jerbal in Ekaiuriur eo kin Kõmman Ri Kalor Ro
1 Mokta jen ear ilok jen lal in, Jesus ear kakien ri kalor ro an ñan “kõmõn dri ailiñ ko otemjej bwe ren dri kalora.” Men in ear aikwij air bõk juõn jerbal elap in kwalok nan im katakin im ñan kajededlok jerbal ko air ilo jabõn ko jabõn lal. (Mat. 28:19, 20; Jerbal 1:8) Rar watõk jerbal in einwõt juõn eddo ele jen air maroñe ke? Ear jab eindein air lemnak ekkar ñan ri jilek John. Elikin an kajerbal 65 yiõ ko ñan an kõmman ri kalor ro, ear je: “Bwe eñin yokwe Anij, bwe jen kejbãrok kien ko An: im kien ko An re jab erro.”—1 Jon 5:3.
2 Report eo ilo Jeje ko kin jerbal ko an Christian ro ilo jinoin rej kamol bwe rar jerbal ñan kõmman ri kaloran Jesus Christ ilo juõn wãwen ekaiuriur. (2 Tim. 4:1, 2) Rar kõmman men in, jab kin an juõn eddo kar leloke ñan ir, ak kin kõnan eo air ej yokwe ñan nebar Anij im ñan bõklok kejatdikdik in lomor eo ñan ro jet. (Jerbal 13:47-49) Kinke aolep ro rar erom ri kalor ro rar oktak im ro rej kõmman ri kalor ro, congregation in Christian eo ear mõkaj an laplok ilo ebeben eo kein kajuõn.—Jerbal 5:14; 6:7; 16:5.
3 Rej Kamõkajlok Jerbal in Kõmman Ri Kalor eo: Jerbal eo elaptata in kõmman ri kalor ro rej kõtõbraki ilo ebeben in kein ka 20! Ñan kiõ, elõñ million armij rar bõk news eo emõn im jerbali ilo air mour. (Luk 8:15) Kin an dik bwen ien eo an jukjuk im bed in, “dri korijer e tiljek im meletlet” ear letok ñan kij elõñ kein jerbal ko ñan jibañ armij ro emol burueir ñan katak mol eo ilo mõkaj.—Mat. 24:45.
4 Ilo 1995 jaar bõk book eo Knowledge That Leads to Everlasting Life, im ilo 1996 kar brochure eo Ta Eo Anij Ekõnan Bwe Jen Kõmmõne? Ikijen book in Knowledge, July 1, 1996, magazine in Imõniaroñroñ, peij 8 (January 15, 1996, The Watchtower, peij 14), ear ba: “Book in ewor 192-peij jemaroñ katak kake ilo juõn ien ekadu, im ‘ro jabrewõt ar likit ir bwe ren mour indrio’ emaroñ bwe air katak ñõn wujleplok air mour ñõn Jehovah im baptais.”—Jerbal 13:48.
5 May 1999 Ad Jerbal Ñan Ailiñ Eo peij eo iloa, “Ewi Wãwen Jemaroñ Kõmman Ri Kalor Ro Ilo Ad Kajerbal Knowledge Book Eo,” ear letok mejenkajjik in: “Ekkar ñan wãwen ko im maroñ ko an ri katak eo, kwo maroñ kadedelok elõñ katak ko kajjojo ilo juõn ien katak me ej juõn awa aetokin, ilo am jab ekaiuriur kake. Enaj emõnlok an ri katak eo wõnmanlok ñe ri katakin im ri katak eo jimor rej kejbãrok karõk in katak eo air kajjojo week.” Katak eo ear wõnmanlok im ba: “Jej aikwij kõtmene bwe ñe juõn armij ededelok an katak Knowledge book eo, mũlal im mol in itoklimo eo an ñan karejar ñan Anij enaj alikar.” Bar juõn katak ilo Ad Jerbal Ñan Ailiñ Eo ear kamelele: “Jej aikwij kõtmene bwe iloan wõt juõn ien ekadu, juõn ri katakin ebolemen enaj maroñ jibañ juõn ri katak emol buruen ñan bwe an bõk jelãlokjen ñan kõmman juõn bebe emeletlet ñan karejar ñan Jehovah.”
6 Knowledge Book eo Ej Lo Tõbrak ko: Ilo ien eo juõn kõrã ear baptais, ear kwalok kin ewi lemnak eo an kin an katak book in Knowledge. Iumin jidik ien ear katak book eo Mour Indrio. Ke Knowledge book eo ear walok, sister eo ear katak ibben ear ukõt book eo ear katak ibben ñan book eo ekãl. Ejjabto tokelik, ri katak eo ear maroñ lo bwe ear aikwij kõmman juõn bebe, im men in ear kamakit e jen ien eo manlok ñan kõmman wõnmanlok ilo mõkaj. Kõrã eo, eo ej kiõ juõn sister, ej ba: “Book eo Mour Indrio ear jibañ iõ ñan yokwe Jehovah, ak book eo Knowledge ear jibañ iõ ñan kõmman bebe eo ñan jerbal ñan e.”
7 Lemnak kin ewi mõkaj in an bar juõn kõrã katak mol eo. Elikin katak eo an kein karuo, ear bed ilo juõn kwelok ilo Kingdom Hall eo ilo ien lotok eo an circuit overseer eo. Ilo ejja week eo wõt, ilo ien katak eo an kein kajilu, ear ba ñan e bwe emwij an wujleplok an mour ñan Jehovah im ear kõnan erom juõn ri kwalok ejañin baptais. Ear kwelok ibben elder ro, im rar kowãppen an erom juõn ri kwalok nan, im ilo week eo juõn ear jino kwalok nan. Joñan an itoklimo ilo Bible study eo an ear bõk ien kakije jen job eo an bwe en maroñ katak ruo ak jilu alen ko ilo juõn week im kalaplok ien an kwalok nan. Jet ien, rar etale ruo ak jilu katak ko ilo juõn ien katak. Ear jino jerbale men ko ear katak kaki ilo aolep wãwen mour eo an, ear dedelok an katak Knowledge book eo ilo emen week ko, im wõnmanlok ñan an baptais!
8 Leo belen juõn sister ear kwalok kin e make einwõt “juõn belen ejjab tõmak.” Juõn ran, juõn brother ear kajitõk elañe ekõnan katak Bible ilo Knowledge book eo ion bedbed eo bwe leo emaroñ bõjrak elikin katak eo mokta ak ilo jabdewõt ien elikin ien eo. Leo ear errã, meñe ear jab juõn ri school emõn ke ear dik im ear jab katak kin jabdewõt kain book in kabuñ iumin 20 yiõ ko. Ewi wãwen ear emmakit ñan katak eo an ilo Knowledge book eo? Ear ba: “Iar mõnõnõ in lo bwe book in jibañ katak Bible in kar eiki ilo juõn wãwen ebidodo melele kake. Kamelele ko kar kwaloki ilo juõn wãwen ekõmmanwa im alikar im ejjabto, iar reimanlok ilo kijerjer ñan ien katak eo tok juõn. Eo ear katakin iõ ear lor kõl ko Society kar kõlajraki ñan kõmman ri kalor ro, im kin jibañ jen jitõb an Jehovah, iar baptais emen alliñ ko tokelik. Emol aõ maroñ ba bwe elañe jej kaddek juõn yokwe kin jerbal in kõmman ri kalor ro, wõnmanlok im bukõt ro emõn burueir ilo jerbal in kwalok nan, kortokjen Knowledge book eo im book in Bible ko jet me Society ej litoki im, elaptata an aorõk, jar kin tel an Jehovah, emaroñ wõr ibbed jerammõn eo ejej uan ñan jibañ kõmman ri kalor ro.” Experience ko ilañ emol air kabwilõñlõñ. Jarlepju in ri katak ro ad ejjab mõkaj air deloñ ilo mol eo.
9 Eoktak Joñan Mõkaj in An Ri Katak ro Wõnmanlok: Jej aikwij kamol bwe maroñ ko jimor an ri katakin im ri katak ro kin Nan in Anij remaroñ oktak jen don. Eddeklok ilo jitõb emaroñ rumij ak mõkaj. Jet ri katak ro rej kõmman wõnmanlok ilo jet wõt alliñ ko me ro jet rej kõmmane ilo juõn ien eaetoklok. Jelãlokjen an juõn armij, joñan an kamolol kin men ko lor jitõb, im ikijen mũlal in an tiljek ñan Jehovah, rej aolep jelet mõkaj in an eddeklok ilo jitõb. Ejjab aolep ro jej katak ibbeir “emõkõj air bõk nan im mõnõnõ” ñan katak Jeje ko ran otemjej, einwõt Ri Beroea ro etto me rar erom ri tõmak ro.—Jerbal 17:11, 12.
10 Eñin unin June 1998 Ad Jerbal Ñõn Ailiñ Eo peij eo iloa, “Kõnan—Elõñlok Ri Katak kin Bible ro,” ej letok nan in tel in: “Emol, ejjab aolep ri katak ro renaj wõnmanlok ilo ejja joñan eo wõt juõn. Jet rejjab lukkun itoklimo ilo men ko lor jitõb einwõt ro jet ak ejjab mõkaj air melele men ko rej katakin ir kake. Ro jet reboub im ejjab maroñ bwe ien ñõn kadedelok aolepen juõn katak ilo kajjojo week. Kin men in, jet ien emaroñ juõn men in aikwij ñõn bõk elõñlok jen juõn ien katak ñõn etale jet katak ko im elõñlok alliñ ko ñõn kadedelok air katak aolepen book eo.”
11 Ro Rej Kõmman Ri Kalor Ro Rej Kejbãrok juõn Lemnak Ejokkin Wõt Juõn: Ej juõn men in aikwij ñan joñe wõnmanlok eo an katak eo ekkar ñan wãwen ko im maroñ eo an ri katak eo. Ke rej rejañ kij ñan jino katak ko ilo Jen Kõmmõne brochure eo, emaroñ bõk ruo ak jilu alliñ ko ñan kadedelok e mokta jen jemaroñ katak book in Knowledge. Elañe jej kortokjen aolep nan in rejañ ko rar kõlajraki ilo May 1999 Ad Jerbal Ñan Ailiñ Eo peij eo iloa, emaroñ bõk jiljino lok ñan ratimjuõn alliñ ko ñan kadedelok air katak Knowledge book eo. Jet ro rar jino katak ilo Knowledge book eo rar ukõtak im katak Jen Kõmmõne brochure eo ñan jibañ ri katak eo ñan katak ilo mõkaj irinekatak ko ilo Bible. Inem rar wõnmanlok im katak ilo Knowledge book eo. Elañe kwar jino juõn Bible study ilo Knowledge book eo im ej emõn an wõnmanlok, emaroñ wõr tokjen ñan katak Jen Kõmmõne brochure eo elikin ededelok an katak book eo, ilo wãwen in rej elij ilo mõkaj irinekatak ko ilo Nan in Anij. Jekdon ta eo jej kõmmane, jejjab kõnan bõprae an ri katak eo bõk jelãlokjen eo ejimwe kin tokjen eo ñan kadedelok ilo mõkaj an katak book eo. Kajjojo ri katak ej aikwiji juõn bedbed ebin kin tõmak eo an ekãl ilo Nan in Anij.
12 Ilo ad jelã tu-ia jej bed ie ikijen bwen ien in, elaplok an aorõk kiõ jen mokta ñan jibañ ro jet ñan katak mol eo. Ijellokin ad wõnmanlok im jar ñan ad ijjino Bible study ko rekãl, jen jar kin ro ededelok air katak ibbed. Inem enaj lañliñ eo ad ñan baptais elõñlok ri kalor ro “ien otemjej ñõn jemlokõn lõl.”—Mat. 28:20.