“Ekijkan Aõ Maroñ, Elañe Ejelok En Ej Tel Iõ?”
1 Ke ri evanjel eo Philip ear kajitõk ibben ri Ethiopia eunuch eo elañe ear melele kin ta eo ear readi jen Nan in Anij, emaan eo ear uak: “Ekijkan aõ maroñ, elañe ejelok en ej tel iõ?” Philip ear mõnõnõ in jibañ e ñan melele kin news eo emõn kin Jesus, im men in ear walok ilo an leo mõkaj im baptais. (Jerbal 8:26-38) Philip ear bokake kien eo jen Christ ñan ‘kõmõn dri ailiñ ko otemjej bwe ren dri kalora, im baptais ir.’—Mat. 28:19, 20.
2 Jej aikwij bokake kien eo ñan kõmman ri kalor ro, einwõt Philip ear kõmmane. Bõtab, wõnmanlok eo ilo mõkaj me ri Ethiopia eunuch eo ear kõmmane ejeja ad loe ibwiljin armij ro jej katak Bible ibbeir. Leo, juõn proselyte ri Jew eo ear emõn an jelã Jeje ko, ear emõn buruen im men eo wõt ear aikwiji kar ñan an bõk Jesus einwõt Messiah eo kar kallimur kake. Ej juõn aitwerõk elap elañe armij ro jej katak ibbeir rejaje Bible eo, rar jebwãbwe kin katak ko rewan an kabuñ, ak rej iion abañ ko air make rebin. Ta eo enaj jibañ kij ñan lo tõbrak in tel ri katak Bible rein ñan air wujleplok air mour im baptais?
3 Kile Aikwij ko ilo Jitõb an Ri Katak Bible ro: July 1999 Ad Jerbal Ñan Ailiñ Eo peij eo iloa ear kamelele kin ewi toan ad maroñ katak ibben armij, ilo kajerbal Jen Kõmmõne brochure eo im book in Knowledge. Ear letok nan in tel in: “Ej juõn men in aikwij ñan joñe wõnmanlok eo an katak eo ekkar ñan wãwen ko im maroñ eo an ri katak eo. . . . Jejjab kõnan bõprae an ri katak eo bõk jelãlokjen eo ejimwe kin tokjen eo ñan kadedelok an katak book eo ilo mõkaj. Kajjojo ri katak ej aikwiji juõn bedbed ebin kin tõmak eo an ekãl ilo Nan in Anij.” Kin men in, ejjab juõn men kimij rejañ kake bwe kwon kakaiuriur kake katak ko ilo Knowledge book eo kin lemnak eo bwe kwo kõnan kajeoñ in kadedelok book eo iloan wõt jiljino alliñ. Emaroñ aikwij elaplok jen jiljino alliñ ñan jibañ jejjo armij ñan wõnmanlok ñan joñan eo rej baptais. Ke kwoj kõmman katak eo jen week ñan week, bõk jabdewõt joñan ien eo kwoj aikwiji ñan jibañ ri katak eo ñan melele im bõk ñan buruen ta eo ej katak kake jen Nan in Anij. Ilo jet case ko, renaj aikwij ruo ak jilu week ko ñan kadedelok juõn katak ilo Knowledge book eo. Men in enaj kõmman bwe en bwe ien eo ñan read im kalikar elõñ ian eon ko rej kwalok kaki.—Rom 12:2.
4 Bõtab, ta elañe elikin an dedelok an katak kin Knowledge book eo, kwoj kile bwe ej aikwij bolemen lok melele eo an ri katak eo ak bwe ejañin bojak ñan an jutak kin mol eo im wujleplok an mour ñan Anij? (1 Kor. 14:20) Bar ta eo kwomaroñ kõmmane ñan tel e ñan ial eo ej tellok ñan mour?—Mat. 7:14.
5 Kabwe Aikwij ko ilo Jitõb an Ri Katak Bible eo: Elañe ej alikar bwe juõn armij ej kõmman wõnmanlok, meñe jidik kin jidik, im ej kaddek juõn kamolol kin ta eo ej katak kake, inem wõnmanlok kin Bible study eo ilo bar juõn book elikin an dedelok an katak Jen Kõmmõne brochure eo im Knowledge book eo. Men in emaroñ jab juõn men in aikwij ilo aolep case ko, ak ñe kwoj aikwij, wõnmanlok im katak ilo True Peace book, United in Worship book, ak God’s Word book eo. Enañin aolep ri kwalok ro ewõr air copy kin book kein elañe ejelok ilo congregation eo. God’s Word book eo wõt jemaroñ order jen Brooklyn. Ilo aolep case ko, jej aikwij katak Jen Kõmmõne brochure eo im Knowledge book eo mokta. Bible study eo, bar jeblak ko, im ien eo kwoj kajerbale ñan wõnmanlok ilo katak eo kwoj aikwij bwini im reporti, meñe ri katak eo ej baptais mokta jen an kadedelok an katak kin book eo kein karuo.
6 Ej melelen men in ke bwe ro rej kab baptais ilo yiõ ko kiõ ak rar katak kin juõn wõt book rej aikwij bar bõk jibañ kiõ ñan katak book eo kein karuo? Ejjab juõn men in aikwij. Bõtab, remaroñ kar bõjrak air kwelok im kwalok nan ak jab wõnmanlok ilo mol eo, im remaroñ eñjake bwe rej aikwiji jibañ ñan kalaplok air jerbale mol eo ilo air mour. Kwoj aikwij kebak service overseer eo mokta jen am bar jino juõn katak ibben juõn ri kwalok eo emwij an baptais. Bõtab, elañe kwoj jelã kin jet me rar katak Knowledge book eo ak rar jab wõnmanlok ñan air wujleplok air mour im baptais, kwomaroñ kõnan kebak ir im lale elañe rekõnan bar jino air katak Bible.
7 Ej kakõllan yokwe in Christian ñan kwalok itoklimo eo emol ilo kajjojo armij jej katak ibbeir. Mejenkajjik eo ad ej ñan jibañ ri katak eo ñan bõk lolokjen eo elaplok kin mol eo ilo Nan in Anij. Inem emaroñ bõk juõn jutak ebin im ekkar ñan jelã kin mol eo im wujleplok an mour ñan Jehovah, im kalikar wujleplok in ilo an baptais ilo den.—Sam 40:8; Ep. 3:17-19.
8 Kwoj kememej ke ta eo ear walok elikin an ri Ethiopia eunuch eo baptais? “Ej lõñliñ im ilok ilo ial eo an” einwõt juõn ri karejar eo ekãl an Jesus Christ. (Jerbal 8:39, 40) Jej kejatdikdik bwe kij im ro jej lo tõbrak in tel ir ilo ial in mol eo jemaroñ lo mõnõnõ eo elap ilo ad karejar ñan Jehovah Anij—kiõ im indio!