Kareilok Ri Katak ro ñan Dolul eo Ilikin Ãt eo Etad
1 “Ej juõn ennan eo ej konono ilo elõñlok jen 200 kajin ko. Ej juõn ennan eo remaroñ roñ kake ilo elõñlok jen 210 ailiñ ko. Ej juõn ennan rej make jaketo-jaketak ilo jabdewõt jikin ko remaroñ lo armij ro ie. Ej mõttan jerbal in kwalok eo elaptata lal in ear jelã kake, juõn ennan eo ej kaburukuk elõñ million armij ro ibelakin lal. Ri Kennan ro an Jehovah kar karõk ir ñan kõtõbrak jerbal in iumin elõñlok jen jibuki yiõ ko!”
2 Ilo wãwen in ej jino bwebwenato eo ilo video eo Jehovah’s Witnesses—The Organization Behind the Name. Ej wõnmanlok ñan uak kajitõk kein: Wõn lukkun Ri Kennan ro an Jehovah? Ewi wãwen rej karõke jerbal eo air? Tel ir? Kõllã wõnãn? Ej kalikar ñan ri aluij ro kin mol eo bwe “Ri Kennan ro an Jehovah ibelakin lal kar kamineneik ir einwõt juõn dolul ñan jibañ ri turiir ñan kalek tõmak eo air ilo Bible eo,” im ej rejañ ir ñan air make lo dolul eo ilikin ãt eo etad. Elikin an aluij video in, juõn kõrã ri katak ear jino jañ kin lañliñ im kamolol im ba: “Ewi wãwen jabdewõt armij ejjab maroñ lo bwe dolul in ej dolul eo an Anij eo emol, Jehovah?”—Keidi 1 Korint 14:24, 25.
3 Bar juõn kõrã ear to an kar katak, ak ear jab maroñ bõk mol eo bwe Trinity kar juõn katak ewan. Inem kar kaluij e im leo belen video eo. Rar lukkun bwilõñ kin pija eo im ruo alen ilo ejja boñin eo wõt rar aluiji. Ilo ien katak eo air tok juõn, lio ear kwalok kõnan eo an ñan erom juõn Ri Kennan. Ear ba bwe ear kalimjek wõt tõmak eo an ilo Trinity im ear likjap in lale dolul eo ad im armij ro ie. Jen video eo ear kile bwe ear lo dolul eo emol an Anij. Ear kõnan mõkaj in jino kwalok nan jen em ñan em. Elikin kar kameleleik e kin buñten nee et ko kar men in aikwij ñan an erom juõn ri kwalok nan ejañin baptais, ear ba: “Jen mõkaj in jino.” Ear jolok etan jen kabuñ eo an, ear jino jerbal ilo jerbal in kwalok nan, im ear tijemlok ilo an jumae katak in Trinity.
4 Emwij an kamole bwe ri katak Bible ro enaj mõkaj air wõnmanlok im rittolok ilo jitõb ñe rej kile dolul eo an Jehovah im koba lok ibben. Eaorõk ad lale, bwe elikin an 3,000 ro kar baptais ilo Pentecost, “rar ber im bin ilo katak im komao iben dron an ro dri jilik.” (Jerbal 2:42, ftn.) Ej aorõk bwe jen jibañ ri katak ro bwe ren bareinwõt kõmman eindein. Ewi wãwen ad maroñ kõmman men in?
5 Inek Eddo eo: Kajjojo ri kõmman ri kalor ro ej aikwij kile bwe ej an eddo ñan kareilok ri katak Bible ro ñan dolul eo an Anij. (1 Tim. 4:16) Kajjojo ien katak jej aikwij watõke einwõt juõn jikin uwe ñan ran eo ekamõnõnõ ñe eo ekãl enaj kalikar wujleplok eo an ikijen baptais. Juõn ian kajitõk ko me renaj kajitõkin e kake ilo katak in baptais ej: “Kwoj melele ke bwe wujleplok im baptais eo am ej kalikar kwe einwõt juõn ian Ri Kennan ro an Jehovah ilo koba ibben dolul eo an Anij eo jitõb kwojarjar ej tel e?” Kin men in, eaorõk bwe en kile bwe ejjab maroñ karejar ñan Anij ilo an jab koba ibben congregation in Christian eo emol.—Mat. 24:45-47; Jon 6:68; 2 Kor. 5:20.
6 Wõnmanlok im katakin ri katak eo kin congregation eo ilo bukwon eo im kin dolul eo ibelakin lal ilikin Ri Kennan ro an Jehovah. Kõmman men in ilo kajjojo ien katak Bible, jino jen ien eo moktata. Jen jinoin, kirtok ri katak eo ñan kwelok ko, im wõnmanlok wõt im kirtok e.—Rev. 22:17.
7 Kajerbal Kein Jerbal ko Rej Letok Ñan Kij: Book ko remõntata jemaroñ kajerbali ñan kõmman katak kin Bible ko rej brochure eo Ta Eo Anij Ekõnan Bwe Jen Kõmmõne? im book eo Kwo Maroñ Mour Indrio ilo Paradise ion Lõl. Book kein jimor rej kalikar aikwij eo ñan kobalok ibben congregation eo. Tu-jemlokin katak 5 ilo Jen Kõmmõne brochure eo ej ba: “Kwoj aikwij wõnmanlok im katak kin Jehovah im bokake kien ko an. Bed ilo kwelok ko ilo Kingdom Hall eo an Ri Kennan ro an Jehovah enaj jibañ yuk bwe kwon kõmmõn men in.” Book eo Mour Indrio ekkã an rejañ ri katak ro ñan koba ilo kwelok ko. Ewõr juõn pija kin juõn Kingdom Hall ilo peij 190, im nan ko itulal rej konono: “Kwoj ruainene in etal ñõn kwelok ko an Ri Kennan ro an Jeova.” Chapter 26, paragraph 17, ej ba: “Elañe kwar katak Bible ibben Ri Kennan ro an Jeova iumin juõn ien ebwe an aitok, ejjelok berre bwe emwij am kwelok ibbeir ilo Kingdom Hall eo air. Karõk am kwelok einwõt juõn manit in ekkeini.” Ñe jej katak ibben ro jet, ej eddo eo ad ñan kalikar mõttan kein ilo book eo.
8 Brochure eo Jehovah’s Witnesses—Unitedly Doing God’s Will Worldwide ej juõn kein jerbal emõn kar kõmmane ñan kwalok ñan kajjojo armij kajjen dolul eo jemaroñ loe me Jehovah ej kajerbale ñan kõtõbrak ankil an. Tibdik in kamelele ko iloan ikijen jerbal eo ad, kwelok ko, im dolul eo enaj rejañ ri konono eo ñan koba ibbed ilo ad kabuñ ñan Anij. Ñe emwij kajutak juõn Bible study, rej rejañ kij bwe jen lelok ñan ri katak eo juõn copy in brochure in ñan an make read. Ejelok aikwij ñan katak kake ibben einwõt jaar kõmmane mokta.
9 Jet ian video ko Society kar kõmmani rej kein jerbal ko remõn ñan kareilok ri katak ro ñan dolul eo ilikin ãt eo etad. Enaj emõn elañe remaroñ aluij (1) The New World Society in Action, elij kin pija eo ilo 1954 me ear kwalok kin jitõb eo eainemõn, bolemen, im ej yokwe eo dolul eo an Jehovah ej jerbal kake; (2) United by Divine Teaching, ej etale burukuk eo eainemõn kar kwalok kake ilo international convention ko ad ilo Eastern Europe, South America, Africa, im Asia; (3) To the Ends of the Earth, ear kakõlleik yiõ eo kein ka 50 an Watchtower Bible School of Gilead im ej kwalok kin kilan missionary ro ilo jerbal in kwalok nan ibelakin lal; (4) Jehovah’s Witnesses Stand Firm Against Nazi Assault, ej konono kin bwebwenato eo ekairuj lojien kin beran eo an Ri Kennan ro an Jehovah im anjo eo air ke rar jelmaik an Hitler matõrtõre ir; im, emol, (5) Jehovah’s Witnesses—The Organization Behind the Name.
10 Likit Mejenkajjik ko Rej Wõnmanlok Ikijen Kwelok ko: Jej aikwij kameleleik ri katak ro bwe jej aikwij jimor private tutoring (ad make bõk katakin) eo katak Bible ilo mweo ej letoke im bwebwenato ko ilo class me kwelok ko ilo congregation eo ej litoki. (Jon 6:45) Juõn eo ekãl ej aikwij wõnmanlok ilo jokkin wõt juõn ilo melele eo an kin Jeje ko im dolul eo jimor. Ñan kõtõbrak men in, ejelok bar juõn men emaroñ bõk jikin ad bed ilo kwelok ko. (Hib. 10:23-25) Jino kirtok armij ñan kwelok ko an congregation ilo mõkaj. Jet ro rekãl rej bed ilo kwelok ko mokta jen an wõr juõn katak kin Bible ilo mweo. Emol, jekõnan make kõmman juõn joñok emõn ilo ad keini ad kwelok.—Luk 6:40; Pil. 3:17.
11 En bwe am kameleleik e kin kwelok ko im wãwen eo rej kõmmane bwe ri katak eo en ainemõn ñe ej itok ñan kwelok eo an moktata. Kinke jet armij rejjab ainemõn ñe rej kab etal ñan jikin ko rekãl, enaj emõn ñan karwaan ri katak eo ñan Kingdom Hall eo ñe ej itok ñan kwelok eo an moktata. Enaj laplok an ainemõn ñe kwoj bed ibben ñe ej iion ro uan congregation eo. Ilõñin men otemjej, kwon juõn ri lolorjake emõn ñan ri lotok eo am, kõmman bwe en eñjake an ruwainene im ainemõn.—Mat. 7:12; Pil. 2:1-4.
12 Rejañ ri katak eo ñan itok ñan juõn special assembly day, circuit assembly, ak district convention ilo ien eo moktata ej walok. Bõlen kwomaroñ kobaik e ilo karõk ko am in ekto-ektak armij.
13 Kadeloñ ilo Buruen Juõn Eñjake in Kamolol: Organized to Accomplish Our Ministry, peij 92, ej kamelele: “Elañe kamolol eo am emũlal kin dolul eo an Jehovah ej alikar ilo bwebwenato eo am ibben armij ro rej itoklimo, enaj bidodolok an eddeklok kamolol eo air im enaj kamakit ir ñan kõmman wõnmanlok ko relaplok ilo air jelã kajjen Jehovah.” Ien otemjej konono emõn, im jab nana, kin congregation eo am ilo bukwon eo. (Sam 84:10; 133:1, 3b) Ilo jar ko am ilo ien katak kin Bible eo, konono kin congregation eo im aikwij eo an ri katak eo ñan keini an koba ibben.—Ep. 1:15-17.
14 Emol jekõnan bwe ro rekãl ren kaddek juõn kamolol jen buru kin kamao ko rekamõnõnõ im jokane ilo jitõb me jej loe ibwiljin armij ro an Anij. (1 Tim. 3:15; 1 Pit. 2:17; 5:9) Einwõt Ri Kennan ro an Jehovah, jen kõmman joñan wõt ad maroñ ñan jitõñlok ri katak ro kin Nan eo an Anij ñan dolul eo ilikin ãt eo etad.
[Blurb]
Enaj mõkajlok an ri katak ro kõmman wõnmanlok ilo jitõb ñe rej make lo dolul eo Jab rumij in kirtok ri katak ro ñan bed ilo kwelok ko