Kõl ko ñan Kwalok kin News eo Emõn

JESUS CHRIST ear lukkun kaorõk jerbal eo an einwõt eo Jehovah ear jilkintok. Einwõt juõn ri keañ ekijejeto kin news eo emõn kin Ailiñ in Anij, ear likit juõn joñok emõn ñan ri kalor ro an. Ear jab jijet im kõttar an armij ro kebak e ak ear make etal ibwiljin armij ro, im konono im katakin ir ilo moko imwiir im jikin ko ilobwilij. (Mat. 9:35; Luk 8:1) Jesus ear konono ibben armij ro kajjojo, katakin ri kalor ro an ke rar make lok iair, im konono ibben kumi ko elõñ thousand orair. (Mat. 13:36; Mark 4:10-13; 6:35-44; Jon 3:2-21) Ear kortokjen jabdewõt ien eo emõn ñan an konono kin nan in kainemõn im kejatdikdik ko. (Luk 4:16-19) Ear kwalok nan ilo jabdewõt ien emõntok, meñe ilo ien ko ear aikwij kakije im mõñã. (Mark 6:30-34; Jon 4:4-34) Ñe jej konono kin bwebwenato ko kin jerbal in kwalok nan eo an Jesus, ejjab kamakit kij ke ñan ad anõk joñok eo an? Aet ej, einwõt an kar kamakit ri jilek ro.​—Mat. 4:19, 20; Luk 5:27, 28; Jon 1:43-45.

Lemnak kin ien ko remõn rebellok ñan Ri Christian ro rainin ñan air bõk kunair ilo jerbal eo Jesus Christ ear jinoe enañin 2,000 yiõ ko remotlok.

KWALOK NAN JEN EM ÑAN EM

Ri Kennan ro an Jehovah ilo ran kein rej kile aorõkin kwalok kin news eo emõn jen em ñan em ilo juõn wãwen ekwon. Kinke elap air kar kajerbal kõl in ñan jibadõk armij ro kin ennan in Ailiñ eo men in ear kõmman bwe armij ro ren jelã kajjiir kake. Tokjen ko remõn me rar walok rej kamol bwe Jehovah ej buñburuen im ej kajerammõn ir. Bareinwõt, meletlet eo ñan kajerbal kõl in ñan jibadõk elõñ million armij ro ilo juõn ien ekadu ear alikar ikijen tokjen ko remõn me rar walok. (Mat. 11:19; 24:14) Kwalok nan jen em ñan em emol an kar juõn wãwen emõn ñan ad kwalok yokwe ñan Jehovah im ro ri turid.​—Mat. 22:34-40.

Kwalok nan jen em ñan em ejjab juõn wãwen ekãl an Ri Kennan ro an Jehovah. Ear juõn wãwen elap kajerbale ilo ran ko an ri jilek ro. Ri jilek Paul ear jeje kin an kar katakin armij ro ilo moko imwiir. Ke ear konono kin jerbal in kwalok nan eo an ñan overseer ro ilo Ephesus, ear ba: “Jen ran eo mokta ke I ar itok ñõn Esia . . . I ar jab drebij jen kom jabrewõt men in kakajuror, a I ar kwalok ñõn kom, im katakin kom ilo bwilij, im jen mweo ñõn mweo.” Ilo wãwen in im bareinwõt elõñ wãwen ko jet, ear “kennan ñõn dri Ju ro, im bareinwõt ñõn ro dri Grik, ukwelok ñõn Anij, im tõmak ar iroij Jisõs Kraist.” (Jerb. 20:18, 20, 21) Ilo ien eo, ear wõr juõn aikwij elap ñan kwalok kin news eo emõn ñan armij otemjej, kinke Iroij ro ilo Rome rar kowõnmanlok kabuñ ñan ekjap im elõñ armij rar “lale men in kabuñ ko otemjej.” Ear wõr juõn aikwij ñan air bukõt “Anij eo E ar kõmõnmõn lõl im men otemjej iloan,” Eo ear “jiroñ armij otemjej ijo ko otemjej bwe ren ukwelok ibeir.”​—Jerb. 17:22-31.

Rainin, aikwij eo ñan jibadõk aolep armij kin news eo emõn elaplok an aorõk. Jemlokin jukjuk im bed in enana elap an ebak. Mour eo an armij otemjej ej bed ilo kauwatata. Kin men in ewõr juõn aikwij ñan ad lukkun kate kij, mokta jen an itok jemlokin. Kin ad kile aikwij in, ej kamakit kij ñan kalaplok jibadbad ko ad ilo jerbal in kwalok nan jen em ñan em, kinke jejelã bwe ejelok bar juõn wãwen emõnlok jen kõl in ñan bukõt ro re kwuli kin mol eo. Jerbal in ekeie rainin joñan wõt an kar keie ilo ran ko an Jesus im ri jilek ro. Jerbal in jen em ñan em ej juõn wãwen ekajuburu ñan ad bõk kunad ilo kwalok nan.​—Mark 13:10.

Ekkar ñan wãwen ko ibbam, kwoj bõk kunam ke joñan wõt am maroñ ilo jerbal in jen em ñan em? Elañe kwoj kortokjen jabdewõt ien ebellok ñan am kõmmane, kim jelã bwe kwonaj madmõd juõn jinekjej ekalañliñ im kajuburu ilo jerbal eo am ñan Anij. (Ezek. 9:11; Jerb. 20:35) Jerbal in jen em ñan em emaroñ jab bidodo ñan yuk. Emaroñ wõr am utame ilo enbwin, ak bõlen rar karõk am jerbal ilo jikin eo elõñ armij ro rejjab mõnõnõ in roñjake. Kwomaroñ aikwij kijenmij kin an kien eo kemo jerbal eo ad. Kin kadkad ko kadkadim, emaroñ bin am jino bwebwenato ibben armij ro kwo jaje kajjiir im kin men in kwoj aikwij anjo ion am ikũmkũm ilo kajjojo ien kwoj kwalok nan jen em ñan em. Kwon jab ebwer. (Ex. 4:10-12) Wãwen ko kwoj iioni rej einlok wõt ko an ro jeõm im jatõm ilo jikin ko jet.

Jesus ear kallimuri ri kalor ro an bwe enaj bed ibbeir “ien otemjej ñõn jemlokõn lõl.” (Mat. 28:20) Kallimur in ej rejañ ri kalor ro an rainin im ej kakajur ir ilo jerbal in kõmman ri kalor ro. Jej aikwij beran im wõr ad liki einwõt Paul ear kwalok kake, ilo Pilippai 4:13. Ear ba: “I maroñ in kõmõn men otemjej ilo Eo ej kakajur iõ.” Kwon kortokjen karõk ko an congregation eo kar kõmmani kajjojo week kin jerbal in kwalok nan jen em ñan em. Ilo am jerbal ibben ro jet, kwonaj bõk kõketak im jibañ ñan konono ibben ro jet im lelok book im magazine ko ilo bolemen. Jar kin tõmak ñan anjo ion jabdewõt abañ ko kwoj jelmaiki, im kate yuk einwõt juõn ri kwalok ekijejeto kin news eo emõn.​—Luk 17:5.

Ñe kwoj konono ibben ro jet kin news eo emõn, enaj wõr ien ko remõn ñan am kwalok kin unin kejatdikdik eo am, im kejatdikdik eo am make enaj kajurlok. (1 Pit. 3:15) Enaj laplok am kile oktak eo elap ikõtan ro ewõr air kejatdikdik kin Ailiñ eo im ro ejelok. Ñe kwoj bukõt ro rej mõnõnõ in roñjake ennan in Ailiñ eo im lo wãwen an ro rejjab mõnõnõ emmakit, men in enaj kamaroñ yuk ñan lo ta eo Jesus ear jiroñ ri kalor ro an kake, einwõt emwij je ilo Matu 10:11-14. Kwonaj juburu in jelã bwe kwar bokake kien eo an Jesus ñan kõmman bwe “en romak ami maram” im kwomaroñ bõk jerammõn eo ñan jibañ ro jet ñan air jelã kin mol eo me ej tellok ñan mour indio.​—Mat. 5:16; Jon 17:3; 1 Tim. 4:16.

Rej kõmman karõk ko ñan kwalok nan jen em ñan em ilo Saturday im Sunday im bareinwõt ilo ran ko jet ilo week eo. Ilo jikin ko ebin lo armij ro ilo moko imwiir ilo ran, jet congregation ko rej karõk ñan kwalok nan ilo jota. Rar lo bwe ekkã an armij ro mõnõnõ in bwebwenato ibben ri lotok ro ilo elikin raelep ak jota jen ilo jibboñ. Bareinwõt, ewõr wãwen ko jet ilo jerbal in kwalok nan me emaroñ keie ilo jikin eo am.

BUKÕT RO REMÕN ME REJ MÕNÕNÕ IN ROÑJAKE

Jesus ear jiroñ ri kalor ro an ñan air “bukõt” ro remõn me rej mõnõnõ in roñjake. (Mat. 10:11) Ear jab bukõt ro remõn ilo jerbal in kwalok nan jen em ñan em wõt. Ilo mol, ear kwalok nan ilo jabdewõt ien ko remõn. (Luk 8:1; Jon 4:7-15) Ri jilek ro bareinwõt rar kwalok nan ibben armij ro ilo elõñ jikin ko.​—Jerb. 17:17; 28:16, 23, 30, 31.

Eindein rainin, mejenkajjik eo ad ej ñan jibadõk aolep armij joñan wõt ad maroñ kin ennan in Ailiñ eo. Men in ej melelen bwe jej aikwij kajeoñe Jesus im ri kalor ro an ikijen kõl ko rar kajerbali ñan kõmman ri kalor ro im bareinwõt ñan jelã kin ien ko re oktaklok wõt im wãwen ko an armij ro me rekajjo jen don ilo territory eo ad.​—1 Kor. 7:31.

Ijellokin ad kwalok nan jen em ñan em, jej aikwij bareinwõt bukõt armij ro ilo jikin ko jet. Ri kwalok ro rar lo tõbrak ilo air iion armij ro ke rar jerbal ilo jikin business ko. Kwalok nan iturin ial elap an keie ilo elõñ ailiñ ko, im bareinwõt kwalok nan ilo jikin kallip ko, jikin park wa ko, ñe rej iuwe ion bus ak taxi ko, ak ilo jabdewõt jikin remaroñ lo armij ro ie. Tokjen men in, jemaroñ kwalok kin news eo emõn ñan armij ro me ekkã air jako jen moko imwiir ñe ri kwalok ro rej etal ñani.

Juõn wãwen ekeie ñan kwalok nan ibben armij ro ej ikijen ad lelok ñan ir magazine ko in Imõniaroñroñ im Awake! Jemaroñ kõmman men in ilo juõn wãwen ejoij im jelã kõppelak ñe jej kebak armij im kwalok juõn katak ekkar me ej walok ilo juõn ian magazine ko. Jemaroñ bareinwõt lelok book ko jet ñan ro rej itoklimo, im karõk ñan lolok ir ilo moko imwiir. Jen ien ñan ien, Ad Jerbal Ñan Ailiñ Eo ej letok nan in rejañ ko ikijen men in, im ej rejañ kij ñan bõk kunad ilo wãwen ko kajjojo ilo jerbal in kwalok nan. Kwomaroñ lo bwe kwalok nan ibben armij ro ilo jikin ko ilobwilij ej juõn wãwen ekalañliñ ñan kalaplok jerbal in kwalok nan eo am.

Bõtab, kwalok juõn nan in kakkõl im keañ kin news eo emõn rejjab jerbal ko wõt rej koba ilo jerbal eo kar lelok ñan Ri Christian ro bwe ren kõmmane rainin. Elañe kwokõnan lo tõbrak in am jibañ armij ro ñan bõk mol eo ej tellok ñan mour, kwoj aikwij jeblak elõñ alen ibben ro rej itoklimo bwe ren maroñ wõnmanlok ñan air erom Ri Christian ro reritto ilo jitõb.

KÕMMAN BAR JEBLAK KO

Jesus ear jiroñ ri kalor ro an: “Kom naj Aõ dri kennan . . . ñõn eneo etolok tata i lõl.” (Jerb. 1:8) Ak ear bareinwõt jiroñ ir: “Inem komin ilok, im kõmõn dri ailiñ ko otemjej bwe ren dri kalora, . . . im katakin ir bwe ren bokake nan ko otemjej I ar jiroñ kom.” (Mat. 28:19, 20) Kõmman bar jeblak ko emaroñ juõn unjen lañliñ ilo jerbal eo an Jehovah. Armij ro me rar kwalok air itoklimo kin news eo emõn ke kwar lolok ir ekkã air naj mõnõnõ ñe kwoj bar jeblak. Ñe kwoj kwalok ñan ir melele ko jet jen Bible eo, kwomaroñ kakajur tõmak eo air ilo Anij im jibañ ir ñan jelã kin aikwij ko air kin men ko lor jitõb. (Mat. 5:3) Elañe kwoj karõk ñan jeblak ilo bar juõn ien emõn im ej emõn am kebojak, bõlen kwonaj maroñ jino juõn katak kin Bible. Eñin naj mejenkajjik eo am ñe kwoj bar jeblak. Jejjab ‘kalbwin’ wõt ine in mol eo ak jej bareinwõt ‘wũtdikdiki.’​—1 Kor. 3:6.

Kõmman bar jeblak ko emaroñ bin an jet kõmmane. Bõlen kwo iminene im emõn am kwalok juõn ennan ekadu kin news eo emõn ilo jerbal in jen em ñan em, im kwoj lañliñ in bõk kunam ilo wãwen in ñan kwalok nan. Ak ñe kwoj lemnak in bar jeblak im bwebwenato ilo tibdikin kin juõn katak ilo Bible eo ibben ri mweo, men in emaroñ lukkun bin am kõmmane. Ejjab aikwij eindein eñjake eo am. Bõlen ilo lolok eo moktata, kwar lelok jet book ak magazine ko ibben armij eo ej itoklimo. Etke kwojjab bwebwenato ibben kin jet melele ko iloan book ak magazine eo? Kwomaroñ kebojak lok iman kin men in. Elañe kwoj eñjake bwe ejabwe kabel eo am ñan kõmmane, kwomaroñ karõk bwe bar juõn ri kwalok me ewõr an iminene en jibañ yuk.

Dolul eo an Jehovah ej letok jibañ eo kwoj aikwiji ñan am maroñ bolemen ilo am kõmman bar jeblak ko ibben armij ro. Kwon kortokjen jabdewõt ien ko remõn ñan kakõmõnmõnlok jelãlokjen im melele eo am make kin Jeje ko ilo Bible eo. Liki Jehovah, im bõk jibañ jen maan im kõrã ro jeõm im jatõm me ewõr air iminene. Elañe kwoj kõmmane men in, kwonaj kakõmõnmõnlok maroñ eo am ñan kõmman bar jeblak ko rebolemen, im lañliñ eo am ilo jerbal in kwalok nan enaj laplok.

KÕMMAN KATAK KIN BIBLE KO

Ke ear konono ibben juõn emaan me ear itoklimo kin ennan eo ilo Nan eo an Anij, ri evanjel eo Philip ear kajitõk ibben: “Kwoj melele ke men eo kwoj konono kake?” Leo ear uak: “Ekijkan aõ maroñ, elañe ejelok en ej tel iõ?” Inem bwebwenato eo ilo Bible ilo book in Jerbal katak 8 ej jiroñ kij bwe jino jen eon eo leo ear readi, Philip ear “kwalok Jisõs ñõn e.” (Jerb. 8:26-36) Je jaje ewi aetokin an kar Philip bed ibben leo, ak joñan an kar alikar an Philip kamelele kin news eo emõn menin ear kõmman bwe leo en erom juõn ri tõmak im kajitõk bwe en baptaisi ilo den. Ear erom juõn ri kaloran Jesus Christ.

Juõn armij jej iione rainin im ej kwalok an itoklimo emaroñ jab lukkun jelã kin Bible eo, inem jemaroñ aikwij jeblak elõñ alen im katak ilo tibdikin kin Bible eo ibben iumin elõñ week ko, alliñ ko, ak bõlen juõn yiõ ak aetoklok mokta jen an maroñ kwalok an tõmak im tellokin an baptais. Ak meanwõd im yokwe eo kwoj kwaloke ñe kwoj jibañ armij ro emol burueir ñan air erom ri kalor ro emol ej juõn jinekjej ñan yuk, einwõt Jesus ear ba: “Mõnõnõ in lelok elap jen bõk.”​—Jerb. 20:35.

Ejelok bere bwe enaj bidodolok am kõmman juõn katak kin Bible ñe kwoj kajerbal juõn ian book ko an Ri Kennan ro an Jehovah kar eiki kin un in. Ilo am lor joñok eo an eo ear katak ibbam ak ilo am bõk jibañ jen ro jet ilo congregation eo me ekeie air katakin armij, kwonaj maroñ kakõmõnmõnlok kabel eo am ñan kõmman katak kin Bible ko rej wõnmanlok, im jibañ ro jet ñan air erom ri kaloran Jesus Christ.

Elañe kwoj aikwij jibañ ñan jino im kõmman juõn katak kin Bible, kwon konono ibben juõn ian elder ro ak juõn Ri Kennan mõttam eo ebolemen ilo jerbal in kõmman katak kin Bible. Kwomaroñ bõk jibañ ñan jerbale nan in rejañ ko me rej walok ilo Ad Jerbal Ñan Ailiñ Eo im kar kwalok kilen kajerbali ilo Service Meeting eo. Ñe kwoj atartar ion Jehovah im jar kin kõnan eo am bwe en wõr juõn am ri katak kin Bible, men in enaj walok ilo tõbrak ko. (1 Jon 3:22) Inem bõk kunam ilo jerbal in kõmman ri kalor ro, im elañe kwomaroñ, kõmman bwe en am mejenkajjik ñan keini am kõmman juõn katak kin Bible ijellokin katak eo ibben family eo am. Ilo am kõmman katak kin Bible ko, kwonaj kalaplok lañliñ eo am ilo jerbal in kwalok nan.

KAREILOK RO REJ ITOKLIMO ÑAN DOLUL EO AN JEHOVAH

Ñe jej kõmman katak kin Bible ko im jibañ armij ro ñan air erom ri kaloran Jesus Christ, renaj jino air jelã Jehovah Anij im deloñtok ilo congregation eo. Kar karõk congregation ko ñan kõmanman ankil an Jehovah. Ri katak Bible ro renaj kõmman wõnmanlok im rittolok ilo jitõb elañe jej jibañ ir ñan air kile dolul eo an Jehovah im jerbal ibben. Eaorõk ñan ad katakin ir kin wãwen remaroñ kõmmane men in.

Ñan kõtõbrak men in, kwomaroñ kajerbal video ko im brochure ko kar eiki kin un in. Jet ian melele ko ilo Chapter 4 ilo book in emaroñ jibañ.

Jen jinoin bwebwenato eo am kin Bible eo ibben ro rej itoklimo, jibañ ir ñan lo bwe Jehovah ej kajerbal juõn dolul ñan kõtõbrak jerbal eo an ion lal rainin. Kwalok kin aorõkin book ko rej jibañ kij ñan katak Bible me Ri Kennan ro an Jehovah rej kajerbali, im kamelele kin ewi wãwen ro emwij air wujleplok air mour ñan Anij im rej mõnõnõ in lelok ir make, rar kõmmani im leto-letak ibelakin lal. Kir ri katak Bible ro am ñan air itok ibbamtok ñan Congregation Book Study eo. Kwalok kajjiir ñan maan im kõrã ro jeid im jatid, im kameleleik ir kin ewi wãwen rej kõmmani kwelok ko ilo Kingdom Hall eo. Rejañ ir ñan air itok. Jibañ ir ñan air jelã kajjen Ri Kennan ro jet ilo circuit assembly ko im district convention ko. Ilo ien kein im ilo ien ko jet bareinwõt, kõtlok bwe ro rekãl ren lo kin ewi wãwen ri karejar ro an Jehovah rej kwalok kadkad eo ej kakõlleik Ri Christian ro remol, eo ej yokwe. (Jon 13:35) Ke kamolol eo an ro rej itoklimo kin dolul eo an Jehovah ej laplok wõt, renaj kõmman wõnmanlok ko relaplok ñan air jelã Jehovah.

KAJERBAL BOOK IN BIBLE KO

Ri Christian ro jinoin rar erom ri kwalok ro rekijejeto kin Nan eo an Anij. Rar kõmman copy ko kin Jeje Ko ñan air make kajerbali im ñan katak kaki ilo congregation eo. Rar rejañ ro jet ñan air konono Nan eo an Anij emol. Copy ko rar make jei kin peiir rar eiet im kar lukkun kaorõki. (Kol. 4:16; 2 Tim. 2:15; 3:14-17; 4:13; 1 Pit. 1:1) Ilo air kajerbal wãwen ko ilo ran kein ñan kõmmani book ko, Ri Kennan ro an Jehovah rej kõmman elõñ million copy in Bible ko im elõñ buki million book ko rej jibañ kij ñan melele kin Bible eo​—einwõt tract ko, brochure ko, book ko, im magazine ko​—ilo elõñ kajin ko.

Ñe kwoj kwalok ñan ro jet kin news eo emõn, kwon kortokjen book ko relõñ rej jibañ kij melele kin Bible eo me “dri korijer e tiljek im meletlet” ej litoki. (Mat. 24:45) Ad Jerbal Ñan Ailiñ Eo ej kejelã kin book et ko jenaj kajerbali ilo jerbal in kwalok nan ilo alliñ eo. Kwomaroñ bareinwõt keini am bõk kunam ñan leto-letak magazine ko ilo kajjojo alliñ, ekoba ran in lelok magazine eo.

Meñe eddo eo elaptata an ‘dri korijer eo etiljek im meletlet’ ej ñan letok ekan ko lor jitõb ilo ien ekkar ñan armij ro an Anij, “dri korijer” in ear kwalok ejja emmol eo wõt an Jehovah Anij eo ej lelok elõñ ekan ko lor jitõb ñan jabdewõt ro rej kwuli kin jelãlokjen eo kin e. Kin am jelã ewi joñan am kar bõk tokjen jen am konono im katak kin book ko an Ri Kennan ro an Jehovah, ejelok bere bwe kwonaj kõnan jaketo-jaketak men ko kwar katak kaki ibben ro jet. (Hib. 13:15, 16) Ilo air kajerbal book im magazine kein, ro rekãl bareinwõt renaj maroñ lo tõbrak ko remõn ñe rej kwalok kin news eo emõn.

KWALOK NAN ILO JABDEWÕT IEN EMÕNTOK

Jesus ear jiroñ ro rar roñjake nan ko an: “Kom maram in lõl.” . . . “En romak ami maram iman mejen armij, bwe ren lo ami jerbal ko remõn, im nebar Jememi i lõñ.” (Mat. 5:14-16) Ri kalor rein rej aikwij kwalok wãwen ko an Anij ilo air kajeoñe Jesus Christ, eo ear bareinwõt ba: “Ña, maram in lõl.” Jesus ear likit juõn joñok ñan Ri Christian ro ilo an kõtlok bwe “maram in mour” en romak ñan tokjen eo an aolep ro renaj roñjake.​—Jon 8:12.

Ri jilek Paul ear bareinwõt likit juõn joñok emõn ñan ad lore. (1 Kor. 4:16; 11:1) Ke ear bed ilo Athens, aolep ran ear kwalok nan ilo jikin wia eo ñan ro rar bed ijo. (Jerb. 17:17) Ri Christian ro ilo Philippi rar lor joñok eo an, im ear konono kin ir einwõt ‘meram ko ilo lal, eo ej romak iolapen ebeben eo e ankeke im bõt.’ (Pil. 2:15) Kij ilo ran kein jemaroñ bareinwõt kõtlok bwe mol eo kin Ailiñ eo en romak ikijen nan im kõmman ko ad ilo jabdewõt ien ebellok ñan ad jiroñ ro jet kin news eo emõn. Emol, joñok eo ad emõn einwõt armij ro remol im wãnik emaroñ kõmman bwe ro jet ren lo bwe jej oktak jen jarlepju in armij ro jet. Bõtab, elañe jej kabellok loñid im konono kin news eo emõn ñan ro rej lo joñok eo ad emõn, renaj jelã etke jej oktak jen armij ro jet.

Elõñ ian Ri Kennan ro an Jehovah rej kwalok kin news eo emõn ñan armij ro rej iion ir jen ran ñan ran ilo jikin jerbal ko air, ilo school, ak ñe rej kõmman makitkit ko air kin mour. Ñe jej itoitak, jemaroñ konono ibben ri itoitak ro mõttad. Einwõt armij ro kajjojo, jej aikwij bojak aolep ien ñan ukõt bwebwenato ko ejelok tokjeir ñan juõn ien kwalok nan im bojak wõt ñan konono ibben ro jet ilo jabdewõt ien ekkar.

Jenaj mõnõnõ in jaketo-jaketak news eo emõn ibben ro jet elañe jej kememej bwe ilo jabdewõt ien jej kõmmane, jej nebar Ri Kõmanman eo ad im kaibujuij etan. Ilo ejja ien eo wõt, jenaj maroñ jibañ ro emõn burueir ñan air jelã Jehovah bwe ir bareinwõt ren maroñ karejar ñan e im bõk kejatdikdik eo kin mour me ej itok ikijen air jerbale tõmak ilo Jesus Christ. Men kein aolep rej jerbal ko rekwojarjar, im rej kabuñburuen Anij.​—Hib. 12:28; Rev. 7:9, 10.